80
Netlatlajtili para Toteco ma quicualtlali tlali Israel huan imasehualhua
1 ¡Ta catli tiinintlamocuitlahuijca israelitame huan techyacana quen tielisquíaj timoborregojhua,
techtlacaquili!
Ta catli timosehuijtoc tlatlajco nopa querubines tequihuajme,
ximohuijtzoma quentzi huan techtlacaquili quema timotlatlajtíaj.
Xijnexti mohueyi chicahualis huan mohueyitilis catli petlani.
2 Xijchihua para nochi tiisraelitame,
hasta nojquiya iniixhuihua Efraín, Benjamín huan Manasés,
ma tiquitaca quenicatza timotlananas huan techmanahuis ica mohueyi chicahualis.
3 Toteco Dios, techchihua ma timocuepaca ica ta.
Techtlachili ica se moixayac catli senpactoc.
Techicneli huan techmaquixti.
4 TOTECO, ta tiDios Catli Tijpiya Nochi Chicahualistli,
¿hasta quema tlamis ticualantoc ica tojuanti huan amo tijtlacaquilis quema timotlatlajtíaj?
5 Techmacatoc ma tijcuaca pantzi ica choquistli, huan ma tiquijica toixayo.
6 Tijcajtoc ma techpinahualtica nopa tlalme catli techyahualohuaj huan ma techhuetzquilica tocualancaitacahua.
7 Toteco Dios, ta tiDios Catli Tijpiya Nochi Chicahualistli, xijchihua ma timocuepaca ica ta.
Techtlachili ica moixayac catli senpactoc.
Techicneli huan techmaquixti.
8 Techhualicac tlen tlali Egipto quen tieltosquíaj se xocomeca tzontli catli selic.
Tiquintojtocac nopa sequinoc masehualme catli amo mitziximatque huan nopona techtojqui.
9 Tijcualtlali nopa tlali huan elque quen tijpixque miyac tonelhuayohua.
Huan tijtemitijque nopa tlali.
10 Nopa tepeme tiquintlamitzajque ica toecahuil.
Huan tielque quen tiocuame catli huejcapantique catli moaxcahua, Toteco.
11 Tichamanque huan moscaltijque tomacuayohua.
Huan toecahuil tiisraelitame ajsic hasta campa nopa hueyi atl catli itoca Mediterráneo huan hasta campa nopa hueyatl Eufrates.
12 Huajca ¿para tlen ayacmo techmocuitlahuía?
Eltoc quen tijtlamisosolo itepanyo moxocomecamil huan tijcahua ma quitlamicuaca nochi ojtipanyani.
13 Inijuanti itztoque quen cuapitzome catli hualahuij huan tlapoxoníaj yahualtic tlen tojuanti,
huan eltoc quen nopa tecuanime ya techtlamicuaj.
14 Yeca Toteco Dios Catli Tijpiya Nochi Chicahualistli timitztlajtlaníaj,
ximocuepa huan techtiochihua.
Techhualtlachili tlen nopona ilhuicac,
ximomaca cuenta quenicatza tiitztoque huan xijmocuitlahui ni moxocomecamil.
15 Quena, xijmocuitlahui catli ta tijtojqui huan nopa ichamanca catli cuali tijtlatzquiltijtoc.
16 Pampa tocualancaitacahua techhuejhuelojtoque huan techtlatijtoque.
¡Xiquintzontlamilti ica mohueyi cualancayo!
17 Xijmaca chicahualistli nopa telpocatl catli tiquicnelía huan tijtlapejpenijtoc para tlanahuatis.
18 Quej nopa ayacmo quema timitztlahuelcahuase.
Techmaca yancuic nemilistli huan sempa timitznotzase huan timotlatlajtise moixpa ta.
19 Techchihua ma timocuepaca sempa ica ta, TOTECO,
ta tiDios Catli Tijpiya Nochi Chicahualistli.
Sempa techtlachili ica se moixayac catli senpactoc.
San ica ta motlapalehuil timomaquixtise tlen tocualancaitacahua.