85
Netlatlajtili para Toteco ma quintlasojtla nopa israelitame
1 TOTECO, ta techtitlanilijtoc miyac tlatiochihualistli catli yejyectzitzi ipan ni tlali,
pampa sempa tiquinhualicac nica iixhuihua Jacob catli itztoyaj ipan sequinoc tlalme,
2 Tiquinquixtili inintlaixpanolhua nochi momasehualhua.
Quena, tiquixtlalpacho nochi inintlajtlacolhua.
3 Timoyoltlali tohuaya huan ayacmo tlahuel ticualantoc.
4 NoTeco Dios, ta catli titemaquixtía,
ama xijchihua para sempa ma timitzicnelica para ayacmo quema techajsis mohueyi cualancayo.
5 ¿O huelis tijsenhuiquilis ticualantos tohuaya para nochipa?
¿O huelis tijhueyilis mohueyi cualancayo para nochi xihuitl?
6 Toteco Dios, sempa techtlanana,
huan tojuanti timomasehualhua sempa timopaquilismacase ipan ta.
7 TOTECO, technextili mohueyi tlaicnelilis,
huan techmaquixti.
8 Na nijtlacaquilijtoc nochi catli quiijtohua TOTECO Dios,
pampa yaya quincamanalhuis itlatzejtzeloltijca masehualhua catli quintlapejpenijtoc.
Huan catli quiijtos quinmacas tlasehuilistli ipan ininyolo,
para inijuanti ma ayacmo mocuepaca ipan nopa ojtli catli huihuitic campa nemiyayaj ipan tlajtlacoli.
9 Melahuac Toteco Dios itztoc nechca para quinmaquixtis masehualme catli quitlepanitaj huan quiimacasij quiixpanose.
Se tonal ihueyitilis Toteco quitemitis totlal.
10 Campa hueli mopantise tlaicnelijcayotl huan catli melahuac.
Campa hueli nochi quimatise para quichihuase nochi catli xitlahuac huan quej nopa oncas tlasehuilistli campa hueli.
11 Catli melahuac elis campa hueli ipan tlaltipactli,
huan yaya catli senquistoc xitlahuac hualtlachixtos tlen nepa ilhuicac huan paquis ica catli quiitas.
12 Quena, TOTECO quititlanis itlatiochihual ipan ni totlal,
huan nochi totlatochui temacas itlajca.
13 Campa hueli yas Toteco oncas catli melahuac,
huan nochipa iojhui elis xitlahuac.