86
Netlatlajtili para Toteco ma quipalehui
1 TOTECO, ximohuijtzoma quentzi huan techtlacaquili quema nimotlatlajtía.
Technanquili pampa niteicneltzi huan niitztoc ipan tequipacholi huan tlaohuijcayotl.
2 NoTeco Dios, techmanahui pampa na nijchihua campica para nijchihuas catli quiijtohuaj motlanahuatilhua.
Techmaquixti pampa na nimitztequipanohua huan san ipan ta nimotemachía para techmocuitlahuis.
3 TOTECO, xijpiya hueyi moyolo ica na pampa nochi se tonal nimitztzajtzilijtoc,
huan ipan ta nimochiya para techpalehuis.
4 Toteco, techmaca paquilistli pampa na san ta nimitzhueyichihua.
5 Toteco, ta nelía ticuali huan timoquetztoc timocualtlalijtoc para titetlapojpolhuis.
Tiquinicnelía huan nimantzi tiquintlasojtla nochi catli mitztlajtlaníaj motlapalehuil.
6 TOTECO, techtlacaquili quema nimotlatlajtía.
Quena, techtlacaquili quema nimitztzajtzilía.
7 Nimitztzajtzilis ipan nopa tonali quema nechajsis tlaohuijcayotl,
pampa san ta technanquilía huan techpalehuía.
8 Ipan nochi sequinoc catli quintocaxtíaj “dioses”,
amo onca seyoc quen ta, Toteco.
Huan amo aqui hueli quichihua huejhueyi tlamantli quen ta tijchihua.
9 Elqui ta catli tiquinchijchijqui nochi tlalme ica ininmasehualhua.
Yeca hualase huan mitzhueyichihuase, Toteco.
Huan mitzhueyitlalise ta catli titlatzejtzeloltic,
10 pampa ta tlahuel tihueyi huan tijchihua huejhueyi tlamantli.
¡San ta nelía tiDios!
11 TOTECO, technextili moojhui huan nijtoquilis pampa san ya nopa temachtli.
Xijchihua para noyolo ma mitzhueyitlepanita,
huan ma quiimacasis mitzixpanos nochi nonemilis.
12 TOTECO Dios, nimitzpaquilismacas ica nochi noyolo huan nimitzhueyitlalis para nochipa,
13 pampa tlahuel hueyi motlaicnelilis noca na,
huan amo quema tlami.
Ta techmanahuijtoc para amo niyas mictla campa tlanahuatía miquilistli.
14 Toteco Dios, miyac masehualme catli mohueyimatij huan catli mosisiníaj motlanantoque para nechhuilanase.
Huan miyac tlahuilanca masehualme huan tlaixpanoni quinequij nechmictise,
huan amo monejnehuilíaj tlen ta.
15 Pero ta Toteco nelía titetlasojtla huan hueyi moyolo.
Amo nimantzi ticualani.
San ta titeicnelía huan san ta timelahuac.
16 Techtlachili ica miyac tlaicnelijcayotl huan techmaca chicahualistli na nimotequipanojca.
Huan xijmanahui icone mosihua tequipanojca.
17 Xijnexti se tlanextili para ta techcualita.
Quej nopa quiitase nocualancaitacahua,
huan mopinahuase pampa momacase cuenta para ta, TOTECO,
tlahuel techpalehuía huan techyoltlalía.