111
1 Holoutoa Yahweh!
Inau ku holoutoa Yahweh nia na tobagu udolu,
tana bona tu sakai soni kolu itadira na lei nina vure God.
2 E haeharegha sughua na lei nina gehegehe Lord,
ahei tara nighi togotogo,
te manana sughua kara kene ghanaghanani,
3 Na lei totobo soko te nei,
te tughu ni tatea iga nina rongoragha mana malei haba,
ma nina maemane ke tona haliu.
4 Ma ahei ke nia ponolio nina lutu te haeharegha?
Dida na Lord te lio dolo maia te veiarovi.
5 Agaia te vahera na vanga, gaira tara varava itatana,
me ghanaghana olia haia nina baubahu.
6 Agaia te tatea nina maana laga vanira nina vure,
me vahera na pari ni tunuva.
7 Na hava te ne tua te uto, maia te maemane,
mana lei nina vetena te utuni.
8 Ma gaira udolu tara utuni haliu,
te manana na pangoti kikinimaani nia na lutu maemane.
9 Ma gaia te pelu horuna nina vure,
te ngasi nia nina baubahu ke va me va.
E tabu na mamataghugha na ahana.
10 Na nia kikinima Lord na vuivunina na manaha.
Oliolina na manaha te mai vanira ahei tara lavipangotia.
Holoutoa na ahana ke va me va.