112
1 Holoutoa Lord!
Kau togotogo gaira ahei nia kikinima Lord,
Eo, nira togotogo ma kau nira rivurivu,
ahei tara kabu taonighi nina lei vetena.
2 Ge na lei daledira ivei mi ivei,
kara tangomana tana lei vavata,
mana lei nina vure God kara lavia nina vauto.
3 Na gehegehedira na vure lologho te uto,
kara mua ponoliodira nia.
4 Tana bona na pungi, te laga vulera nina vure God,
na marara te haghe mai tua.
Na pukuna tara hevei tatavahale,
mara vei arovi mara kabu maemane.
5 Ahei tara hevei tatavahale na lei totobo soko te uto vanira,
Ma rahei tara hola te tatavahale didira na lei lutu.
6 Na vure raini ke mua laga vulera na lei totobo te dika,
ma gaira na maemane kara ghanaghana oli talaura.
7 Ma gaira tara mua mataghunia na rongorongo te dika,
mara varavaghingasi vamua i tatana Lord te righitaonira.
8 Ma gaira tara mua mataghu, mara varava ngasi,
kara tangomana na hughuhughu kolu
tadira ghadira na levunimate ma kara laga vule.
9 Agaira tara hevei tatavahale vanira tara bona,
na nilabudira te uto, ka mua nighi ponolio.
Ke vagha ke vaa suasuanighita ma ka ghanaghana mavai.
10 Na lei tinoni dika kara rutu papara tara righia eni,
ma kara ghalati ma kara sakutua keha,
ma didira ghanaghana dila ke luvu lee.