121
Na linge ni tona dato
Inau tu reitada tana ghotu,
Iga va mai nigua na hahanga?
Nigua na hahanga te va butu mai tatana Lord,
te gonia na parako mana pari.
ke mua lubatigho ge ko kabalaghi mo ko kutu,
gaia sakai ke vatoghagho, mo ko mua maturu!
E utuni, gaia te vatogha ghua Israel,
mete mua maturu me ke mua lugu.
Ma Lord heghena vamua te vatoghagho ighoe.
Ma Lord te tughuru lilighimu
te vagha nimua na ungaunga ni puipungisi.
Na aho ke mua ghoi paregho ghua tana dani,
vagha ghua na vula tana bongi.
Ma Lord ke pilupungisigho tana lei totobo dika soko,
me ke pabea na volamu.
Gaia Lord ke vatogha na rughu hagheamu mai
mana rughu horuani itaeni maia ke va me va.