16
Na kokoeliulivuti ni Varava Ngasi
Ko righitaoniu tana lei totobo dika ke bei kaleu,
ghe God, inau tu varava itamua ge ko pilupungisiu.
Inau tu bosa vania va Lord,
“Ighoe nigua na God!
Na lei totobo uto tu loghoi tara butu mai tamua.”
Gaira tara kabu tabu tana maramana
itadira te ghanaa nigua na ghanaghana ge ku kabu kolura!
Gaira tara mina samataonighi na lei God keha
ke vonughira na dikalio.
Inau ku mua tangomana ge ku hahanga ta didira na sukaghi,
mu ku mua tangomana na kikinima vaniadira.
Lord, itamua heghemu vamua na lei totobo tu loghoi,
maia nigua na seu ni vauto.
Mo righitaonighi nigua na lei totobo.
Na pari to vaheu te togotogogha.
Ivei vaho te vaghaa na utona nigua na lologho iga.
Inau ku holoutoa Lord na pukuna te uhuliu
mi tana bongi ghua na tobagu te taraiu.
Inau tu ghilalaa a Lord te kabu haia itagua.
Ku tangomana na aleale, na pukuna gaia tana lilighigu.
Ku mua nia hava na tobagu te vonughia na togotogo mana rivurivu,
mana mangagu te nia ghu na holohabaana.
Na huligu te aheahe tana mabo.
10 Na pukuna ko mua tangomana
ge ko sania na tarungagu itadira tara mate,
mo ko mua lubatia a nimua na puku ni tinoni lutu tabu
ke sele tana gilu ni mate.
11 Ighoe ko tuhua vaniu na halautu te huliu va tana vola,
me ke ghaha koluu ke me ke vonughiu haia na togotogo, mana na rivurivu haia kasila.