17
Nina Kokoeliulivuti na Tinoni Te Kabu Maemane
Ghe Lord, Ko rongovia nigua na nongi ni hahanga (ni kabu maemane).
Varongohia mai nigua na tangi ni hahanga.
Ko bosa tughua nigua na kokoeliulivuti te mai tana toba te mua kiko.
Ko tughunitateu tu kabu maemane,
ighoe to ghilalara rahei tara gehegehe uto.
Ighoe to tabotaboa na liogu mo righia na tobagu te bongi.
Ighoe to kene ngangatau mo mua topoa siki hahi.
Na pukuna inau tu ghanaghana
ge ku gei nia palugha gea na hava tu bosaa.
Inau tu taonighi tua nimua na lei vetena,
tara righitaoniu ge ku bei taonira gea na vure tara ghighirou mara dika.
Inau tu sakutua tana halautumu;
inau tu mua turipadi na taoniamu.
Inau tu kokoeliulivuti vanigho gatu
na pukuna inau tu ghilalaa ko bosatughu, ghe God.
Ko taoraghi horu mai
mo ko vaovarongo tana bona ku kokoeliulivuti.
Ko tughunia vaniu nimua na dolo te mua soko tana lei halautu te haeharegha.
Ighoe to vavolara nia na lagamu tana ghadira na levunimate
rahei tara kabu itamua.
Ko righitaoniu mo ko pilupiluu vaghaa na loka ni matamu.
Ko polou tana ungaungana na ghatamu.
Pilupiluu itadira na vure dika
tara gunaliu mara vahaghitailiu,
itadira na levunimate
tara liona na mateagu mara talighutiu.
10 Gaira tara mua loghoa na veiarovi.
Rongovia va didira na kokoe talunagho.
11 Gaira tara samataoniu mara talighutiu,
mara sonihoruu tana pari.
12 E vaghara na lion te vitolo,
ra liona ge kara pilepilea na huligu;
vaghara na lei dalei ni lion
tara polopitu ta didira na vatei polo.
13 Ko tughuru, Ghe Lord!
Hughutira mo ko lagavulera na ghagua na levunimate!
Vavolau nia nimua na isi itadira tara dika.
14 Vavolau nia na limamu te maana, Ghe Lord,
itadira tara liona ge kara loghoi na lei totobo ni maramana.
Ko torora nia na vahaghitaili to gonidilaa vanira;
Ko nea na dete mana totoro ke tona haliu
itadira na lei daledira mana kukuadira.
15 Na pukuna inau tu mua gonia siki hahi,
inau tu mua gonia siki hahi, inau ku righigho.
Tana bona ku rarai mu ku tughuru ke vonughiu na togo,
na pukuna ku righia na matamu.