50
A Lord God puku ni maana te bosa,
me detera na lei tinoni tana soghaana mai ga na aho,
maia te va huu iga.
Tana ghotu i Zion te vatei ghagharugha iga
God te mararaa nia na marara uto.
Ghada na God, te nia dutu mai na [dedemo]/[talamo] ni viviha
na lake ke durake na lei totobo i naghona
mana gutuveve ni maraghata sule ke talighutia.
I kokou mi pari koro nina komu ni righi kale utuni.
tatana a gaia ke detera nina na vure.
Lavira mai itagua nigua na vure taluutuni
Agaira ra hei tara gonia na baubahu nia na sukaghi.
Lubatia i kokou ke talutatea nina uto te maemane
A God heghena vamua ke dete.
Aghau nigua na vure, kau rongo!
Inau ku bosaa;
raeni nigua na kakage vanigho Israel
Inau God, nimua na God.
Inau tu mua loghoa siki bosa ni huhuru
ta nimua na sukaghi, pa na lei sukaghi kekere.
To lavia mai ta nigua na bela ni sukaghi.
Mi nau tu mua liona siki buluka tana valemu,
Mu mua liona ghua siki goat ta nimua na pilu.
10 Na lei maumanu udolu na leiao a nigua:
Inau tu loghora na lei bolo soko tana lei togha ni ghotu.
11 Na lei manu ni popopo
mana lei maumanu udolu ni nanata ke a nigua.
12 Ge tuku vitolo ke, mu ku mua tughurua vanigho
Na pukuna na maramana udolu a nigua,
mana lei hegohego soko i lokana.
13 inau tu mau nia ghaghua to nia sukaghi na buluka
mu mua nia ghaghua na ghabu ni Goat.
14 Mana hava vamua tu puku ni liona ke,
nimua na puku ni holouto vamua God,
Mi nau tu liomu ge nimua na baubahu ke kale utuni
vania gaia te haba i kokou.
15 Ko ghanaghanau tana bona ko haghagho tana gunaguna
mi nau ku vavolagho, mi ghoe ko va heu na talumava.
16 Ma God te ghaghua vanira tara tangohahi
Kau bei ghoi nighi ghaeghahe nigua na lei vetena,
ma kau bei ghoi tate ghau heghemiu tau taotaoniu inau.
17 Ighoe to nia sika nigua na totoro ni taraghi
mo nighi lei nigua na vetena me totobo lee vamua.
18 Tana bona to righia agaia te gito ke, mo hangaa
Mi ghoe to sonileaa vamua nimua na bona
itadira tara ngelera na taudira rana keha.
19 Na Mangamu te bosai na lei bosa dika,
mana lapimu te vonughia na sorisori.
20 Ighoe o sopou kolili ni bosa pungisiana na hoghomu,
Na pukuna dalena tinamu hoghomu.
21 Tana bona to gonighi na lei totobo udolu raeni ke,
Inau tu kabu todore, mo ghanaghana ighoe tu mua nia ghaghua na hava:
mi taeni inau ku tatei na lei nimua na hahi,
mu ku gegerei na lei nigua na totobo i vuvungamu.
22 Kau tughui na liomiu.
Ighau rahei tau mua ghanaghana God,
ku vuti keha ghau gea,
me taho siki sakai ke vavolaghau.
23 Mana niana hevei na holouto
gaia keri na sukaghi ni talumavaagu.
Inau ku talutatea vanigho a nina maana ni vola a God.