71
1 Ighoe a nigua na hahanga ni vola, Ghe God, ko bei lubatiu ge ku nia kale torotoro.
2 Vavolau tana vahaghitaili, ko pilupungisiu itadira na lei ghagua na kana;
Ighoe to maemane, ko talu kulimu mai itagua ge ko varongohiu,
mo ko niu tatavahale tana kaukauli.
3 Ge ke vaghagho na vatu ni pilupungisi vaniu,
to lavipangotiu haia iga,
ko nia hevei na bosa ni vevetena ge ke vavolau.
Ighoe nigua na vatu ngasi mana vatei tuturi kauha.
4 Ko vavolau ta didira na maana na lei tinoni dika Ghe God.
Ta didira na lei hughuhughu na lei tinoni dika tara kana haghiniu.
5 Ighoe heghemu vamua, ghe Lord, a nigua na ghanaghana dila.
Tana pileaghai mai tua ghe Lord, Inau tu ghanaghana ngasi.
6 Eo, Ighoe to kabu koluu mai tua tana vahuagu,
mi tana kutuna tinagu,
Ighoe to righitaoniu mai tua mughua ge u holoutogho.
7 Na volagu ke, na vavaghaha vanira tara subo;
na pukuna ighoe ke a nigua na laga mana pilupungisi.
8 Keri ge ku mua ghoi beto tua na holoutoamu;
Inau tu talutatea na ladamu tana dani udolu.
9 Mi taeni, tana tonikamagu, ko bei talu kehau.
Ko bei saniu tana bona ku kubolu na lagagu.
10 Na lei ghagua na kana tara niu vaevane kolu,
gaira tara padangi koukolua na mateagu.
11 Ara bosa mara ghaghua,
“A God te talukehaa tua,
Gatu ma ka lavia tua,
na pukuna te taho tua siki sakai ke ghoi hangaa.
12 Ko bei kapu sagau, Ghe God.
Mina mo ko hangau ghe nigua na God.
13 Ko va hera na totoro mana haurake
agaira tara hughuhughu.
Na mamaagha mana totoro ke sarora,
agaira tara liona na ghighirouagu.
14 Hauva ka, mi nau ku talua haia so itamua nigua na ghanaghana ge ko hangau,
ke papara nigua na holouto vaniamu.
15 Inau ku bosa vanira na lei vure soko a nimua na kabu marabu.
Inau ku ladavaghinia nimua na maana ni vavola.
Nia Inau to laga vuleu tua na lei totobo soko to gonighi vaniu.
16 Nimua na lei gehegehe tara mava ngangata,
Ghe Lord, puku ni haba.
Ku holoutogho nia.
Inau ku kokoea vanira na lei vure soko,
ge ighoe heghemu vamua to maemane mo to uto lee.
17 Tana pileagu mai vaho tua to vuivuni ni taraiagu tua Ghe God.
Mi nau tu mua beto tua na bosaana vanira na balu nia na utoni na lei totobo to gonighi.
18 Mi taeni Inau tu tonikama tua me vuare tua na vuvulu ni ulugu,
mo ko bei talu kehau gea ghe God.
Inau ku ladavaghinia nimua na maana tara vavata vaghana eni;
nimua na lei butuli sule ngangata vanira agaira tara mai i murigu.
19 Na lei nimua na gehegehe uto, Ghe God, tara riti i kokou;
Ighoe to gonighi na lei totobo utoutoa,
Ahei ke nigho tautau pa ka Ghe God?
20 Ighoe to talagu ge ku nighi vahaghitaili na lei vahola,
hauva ka, mi ghoe ko ghoi talu goni oliu sono tana vola
mo ko sake datou tana bona ni gilu.
21 Ighoe ko ghoi talugoni oliu ghua,
haba va, tana talu mavaa sule ngangata
mo ko ghoi togho luvu ghua.
22 Keri ge ku holoutogho nia na tigitigi mana ghalevu.
Na pukuna to talua nimua na taluutuni
ta nimua na lei baubahu, Ghe God.
Inau ku nia linge vanigho na ghalevu ghalo.
Ighoe na puku ni tabu ni Israel.
23 Inau ku nia ghaeghahea na togotogo
mu ku nighi lingelinge nimua na lei holouto.
Ighoe to vavolau Inau.
24 Tana dani udolu, Inau ku tughunitatei na lei nimua na gehegehe tara marabu,
ge ara hei soko tara tabotabo ge kara niu ghighirou tara mamaagha mu laga vulera.