72
Nina Solomon
1 Ghe God, Ko vahea na dete maemane na vunaghi haba
mana maemane haia vania na dalena.
2 Ko hangaa ge ke detera nina na vure nia na dete te maemane;
me ke sakai vamua tua pa vata ni talugoni kara nia vanira na lei tinoni bona.
3 Na lei ghotu kara nia totobo na uto vanira na lei tinoni soko
mana na lei ghotughotu kara vavangagha.
na pukuna na vunaghi haba te gehegehe uto.
4 Ko hangaa ge ke tughuru pungisira rana bona,
ke vavolara na lei daledira tara tinoni na hahanga,
me ke turibitara tara kana haghinira.
5 Ge me ke vola me ke kabu vuivuni tana soghaana na aho ritini tana huana,
maia ghua taonia ge mararana na vula tana lei parako.
Eo ke va me vaa.
6 A nina na bubulo ke vagha na bihibihina na uha
tana bona ni uhauha vagha na tudutuduna na kabu te vuhavuha na maramana.
7 Ge ma gaira udolu tara kabu uto kara totolo dato tana lei bongina.
Ge mana uto kara varangagha koekobe tana sosoko ni bona ni bongi.
8 A nina na malei huhuli ke saroi na lei tahi oha soko,
mi tana tavetave ni beti me ke riti tana sosokona na maramana.
9 A gaira tara tona tana bona aroha kara tua laghi tuturu tana matana;
rana lei ghana na kana kara tumu horu tana pughu ni pari tana matana.
10 Na lei vunaghi haba ni paleva bokona Tarshish
maira na lei koukomu kara vahea didira na lei kokoe ni talumava mana holouto.
na lei vunaghi haba ni paleva uluna Sheba,
ma Sheba kara vahea didira na lei hevei lee tana dolo.
11 Na lei vunaghi haba soko
kara tua laghi tuturi tana matana mana lei kema soko
kara gehegehe vania.
12 Agaia ke vavolara na lei tinoni bona
tana bona kara tangitangi vania;
agaia ke hangara tara vahaghitailira,
tara mua pukua siki sakai ke pilupungisira.
13 Agaia ke vavolara rana lei lugu mai
tara liona hahanga ta nina na veiarovi.
14 Tana pepopepo mana vahaghitaili ke vavolara iga,
na pukuna na voladira te puku ni totobo te utoutoa va itatana.
15 Na vunaghi haba ke daro na volana!
Ge ma ka vahea na Gold ni Sheba.
Na lei vure kara kokoeliulivutia haia
ma kara vautoa agaia tana dani udolu.
16 Na lei raurau ghania kara subo au vulea tana komu mana bona,
tana lei potopoto ni ghotu ghua kara totobo dato.
Na lei ghai ghania kara totolo te vagha tara ghaghua iga i Lebanon,
Tara suaka dato te vagha na buburu tana leghai.
17 Na ahana na vunaghi haba ke tona haliu ke va ma vaa;
ke tona haliu soni i sarana na aho koekobe tana luvuana na maramana.
Na lei kema soko kara vautora, na pukuna agaia
ma kara vahea na holouto.
18 Vautoa na Lord God, na God ni Israel.
A gaia heghena vamua te gonighi na lei totobo uto lee tara vaghai rakeri.
19 Vautoa na ahana tana ladana mana ngengo vaghana ke va me va!
Na maramana talighu ke vonughia na ladana mana rongoraghana.
Amen, Amen.
20 (Aeni te sosokoa a nina na lei kokoeliulivuti a David, dalena Jesse.)