94
1 Lord, Ighoe a God, to hea na totoro na tinoni,
ko tatea nimua na rutu.
2 Ighoe to deteghai udolu tua,
tughuru mo ko hera rana talunagho na hava te manadira.
3 Ivei vaho tua kea na hauva ge kara togotogo rana dika?
Lord, ivei vaho tua kea na hauna?
4 Ivei vaho tua kara nia sara na talunagho rana dika,
ma kara nighi maghora na lei paludira?
5 Lord, gaira tara dikalara kulamu na vure,
mara nera ghua ge ra vahaghitaili.
6 Gaira tara matera rana samu ma na mate sasani,
maia rana sinogho tara ghanara tana bonada.
7 Gaira tara bosa mara ghaghua,
“A Lord te mua righighita,
Ma God ni Israel te mua nia ghaghua na hava ta gonia.”
8 Ghau kulagu na vure, ivei tea ge au sakai bule?
Ivei vaho tua kea ge kau manahagha?
9 God te gonighi na kulida, me mua rongo gaia?
me gonighi ghua na lei matada, me mua vaevane gaia?
10 Gaia te hera na totoro na lei kema, ke mua torora gaia?
me tataraighita udolu ghua, me mua manahagha gaia?
11 A Lord te ghilalaa na hava ta ghanaghanaa
me manahana ivei te vagha na voona na ghanaghanada.
12 Lord, gaira to taraira tara togotogo
to taraira nia nimua vetena.
13 Ighoe to nera ge ra mua holopangotighi na lei gunaguna te kalera haia,
polo ge ra gheli giludira rana dika.
14 A Lord ke mua tona sanira nina vure,
me ke mua ghogho sanira kulana vure.
15 Na utuni ke ghoi haghe mai tana bona ni dete,
mana vure uto kara nia togotogo.
16 A hei ke podopodou tadira rana dika,
ma hei ke niu pala tadira rana tangohahi?
17 Ke mua hangau a Lord ke,
ge mu ku mate tua.
18 Inau tu hoholo mu ghaghua,
Lord, inau tu turi madali,
mana pukuna nimua na dolo te sule ge u vola so.
19 Tana bona tu dikalio, mu kanoragha
ighoe to neu ge u togotogo mu togholuvu.
20 Ighoe to mua liodira rana dete sorisori,
tara talui na lei vetena ni goniana so na dika
21 Gaira tara detera na vure uto, ma ra riua na vetena ge ra vua matera.
22 Mana Lord te podopodou, a God te righitaoniu.
23 Gaia ke hera na totoro rana dika me ke durakera,
na pukuna na lei paludira, a Lord dida na God ke durakera.