यहुदा ने लिखा हुआ पत्र
यहुदा लिखेल पोत्रो
ओलखात
यहुदा नावान पोत्रीन नाव ज्या लेखणारान नावा पोर मिलाय जायेल हे। यहुदा सोताह याकुब यीशु मसीन बायाख ने रूप माय ओलखात आपेह। तानकेरता तो यीशुन बायह्याख माय रेन एक मानाय जाथे। 1 आमु नाह जाणते काय ज्यी पोत्री खास मोंडलीन केरता एती, पुण जुनाला नेमान कारेण यहुदा पोत्रीन मुखी वाचणारे यहुदि एता। पुण तो तान पोत्रीह लिखेह ता आखाह जा हादाड़ाय जायेल हेते, जाह आबाख हेऱ्यो मोंग हे एने यीशु मसीन केरता मेलाय जायेल हेते। 1:1 ज्यी पोत्री नाहते मसीन जेल्मान 60 वोरह्या बाद लेखाय जायेल एतो।
आखा बुरहो केरनार माणहाह पोत्री लेखणेन तान निसाण ताह जुठा मास्तेर्यान द्वारा बोटेकणेन विरोद चेतावणी आपेह 1:4 जुनाला नेमान गेटना एने पोत्री ताकेत आपणेन केरता किथे। ज्यी पोत्री दुसरा पतरसा हेऱ्यो जुठा मास्तेर्या 1:4, 2 पतरस 2:1 हेरोगदुत एने सदोम अमोरान विरोद चेतावणी हेऱ्यो जुलूम विचार बेचकातेह।
रूपरेखा
1. यहुदा पेल वाचणाराह संबोदित किरेह। 1:1-2
2. तान बाद तो लेखणेन कारेण एने जुठा मास्तेर्यान विरोद चेतावणी आपेह। 1:3-4
3. तान बाद तो जुनाला नेमावाला माणहान एने गेटनान किस्सो आपेह। 1:5-16
4. ओवतो तो ताह किथे काय तान उलेट चेतावणीन केरता काय एणे जुवे। 1:17-23
5. बोगवानान बोड़ाय केरीन पोत्रीह निवरावेह। 1:24-25
1
नमस्कार
1 यहुदान उगे रेन जो यीशु मसीन पावोर एने याकुबान बाहख हे,
ता हादेल माणहान नावे जा आबाख बोगवाना माय मोंगाल्ला एने यीशु मसीन केरता होमालेल हेते:
2 गीण एने सान्ती एने मोंग बोरपुर तुमूह जुड़ते रेय।
जुठा मास्तेर्या
3 एय मोंगाल्ला, जेवी मी तुमूह ता सुटकारान बाराम लेखणेम जुलूम मेहनेत केरीन कोसीत केरने बाजरियेल ईतो जा माय आपु बागी हेते, ते मी तुमूह ज्यो सोमजाड़नेन जोरेवरी जाणेल काय ता बोरहान केरता पुरो कोसीत किरो जो चोखाला माणहाह एकुच वार होपायेल एतो।
4 काहाकाय कोलाक माणहे आपु माय लिकाएन आव मीलानाह, तान डेंडान बाराम जुनाला टेम माय पेलुच लेखाय जायेल एतो: ज्या विणबोकत्या हेते, एने आमरा बोगवानान गीणाह लुच्चाय माय बोदेल देतेह, एने आमरा मालीक यीशु मसीह नाकारतेह।
5 तुमूह ज्यो आखो मालुमूच हे, तीबी तुमूह ज्यी वातु एर केरावु ओहलो माहु लागेह, तो ज्यो काय मालीक एक जातीह मीस्र देसा माय रेन निवाड़ेन बाहेर काड़ेल, एने ओवतो जा बुरहो नाह मीलेल एता ताह खेतेम किर दियेल।
6 जा हेरोगदुत तान पोदाह होमालीन नाह मेल्या एने तान जो जागो ईतो ताह बी सोड़ देना, तो ताह बी नियाव ने दिह्यान केरता आदारा माय, जो जेलेमक्या कालान केरता हे, बांदिन मीलेल हे।
7 तान गेतुस सदोम एने अमोरा एने तान आहने पाहनेन गावे, जा न्यान गेत सिनाल्या बोण जायेल एता एने पारका सेरीरान पासाण लाग जायेल एता, आक्ठान जेलेमक्यो डेंडा माय देरीन किस्सो ठेरायेल हेते।
8 तिहेस केरीन ज्या होपनो देखणारे बी तान तान सेरीराह एठो केरतेह, एने बोगवानान आदिकाराह खाराब जाणतेह, एने उचा पोदवालाह हाजो बाकतो केती रेतेह।
9 पुण मुखी हेरोगदुत मीखायेल, जेवी सैतान मुसान देड़ान बाराम बोलचाल किऱ्यो, ते ताह हाजो बाकतो केयीन आरोप नाह लागाड्यो पुण ज्यो कियेल, “मालीक तुवाह दोपकावी।”
10 पुण ज्या माणहे नाह सोमेजते ओहल्यु वातुह हाजो बाकतो केतेह, एने ती वातुह विणएकल्या जेनवेरान गेत सोबाव मायच जाणतेह, एने ता माय सोताह खेतेम केरतेह।
11 ता पोर हाय! काहाकाय ता केनान गेत चाल चालना, एने बिलाम ने गेत मोंजरीन केरता खाराब एय गीयाह, एने विरोद केरीन कोरह ने गेत खेतेम एय गीयाह।
12 ता तुमरा मोंगान सबा माय तुमरी हेऱ्या खाता पिता, देरीया माय लिकायेल देगड़ान गेत हेते, एने बिंदास तान पेटाह बोरनारे राखवाल्या हेते; ता वारा माय उड़ीन आयेल ठाल्ला वादला हेते, ता उनालान विण फोल्या जाड़े हेते, जा दुय वार मोर जायेल हेते; एने मुला बेलुच उखील जायेल हेते।
13 ज्या देरीयान मोटला जेलखा हेते, जाह लाज आवीह केरीन उसेलतेह; डावाडोल तारे हेते, ज्यानकेरता कायेम ने केरता मोटलो आंदारो मेल रेनोह।
14 हनोक बी जो आदमाह रेन हातवी पिढी माय ईतो, न्यान बाराम इहकेरीन जाणाव किरेल, “मालीक तान लाखो चोखाला हेऱ्यो आवो।
15 काय आखान नियाव केरी, एने आखा विणबोकत्या तान विणबोक्तीन आखा कामान बाराम जा ता विणबोक्ती माय किरेल हेते, एने ता आखा केड़ेक वातुन बाराम जा विणबोक्ती पापी तान विरोद कियेल हे, आरापी ठेरावी।”
16 ज्या ते असंतुष्ट कुड़कुड़ावणारे, एने ताह जो पुटीह तो केरनारे हेते, एने सोतान मुया केरीन गोमेंड ने वातु बोलतेह, एने तान फायदान केरता मुय देखीन बोड़ाय केऱ्या केरतेह।
चेतावणी एने हिकवोण
17 पुण एय मोंगाल्ला, ती वातुह तुमू एर मीलो जा आमरा मालीक यीशु मसीन प्रेरित पेलुच केय दियेल हेते।
18 ता तुमूह कियेल एता, सेवल्या काला माय ठेट्ठा केरनारे आवती जा तान विणबोक्तीन खाराब मोरजीन गेत चालती।
19 ज्या ता हेते जा फुट पाड़तेह; ज्या सारिरीक माणहे हेते, न्या माय जीव नाह।
20 पुण एय मोंगाल्ला, तुमरा चोखाला बोरहा माय तुमू वोड़ती केरतीन एने चोखाला जीवा माय विन्ता केरतीन,
21 सोताह बोगवानान मोंग माय बोणावीन मीलो; एने जेलेमक्यो जीवाय ने केरता आमरा यीशु मसीन गीणान वाट जोवते रिवो।
22 ता पोर जा सेंका माय हेते गीण किरो;
23 एने मोकतास माणहाह नेरगान आक्ठाम रेन निकालो; एने मोकतास माणहाह पोर बिय हेऱ्या गीण किरो, पुण ता फाड़काह बी नफरत किरो जो सेरीरान उगे रेन ढागावाला एय जायेल हे।
बोरकेतवालो वचन
24 एवी जो तुमूह ठोकेर खाणे से वोचाड़ सिकेह, एने तान बोड़ाय ने बोरपुरीन सामने खुसी एने निर्दोस केरीन उबो केर सिकेह,
25 ओहला आपणा सुटकारो केरनारा बोगवानाह, यीशु मसी आपणो मालीक ज्यान द्वारे बोड़ाय, महत्व, ताकेत एने आदिकार दुनियान पेल, एवी बी एय एने कायेम ने कायेम रेय। आमेन।