युहन्ना का प्रकाशितवाक्य
योहान ने प्रकाशितवाक्य
ओलखात
प्रकाशितवाक्यान ज्यो पुस्तेक नोवाला नेम ने आखरी पुस्तेक हे, एने ज्यो सेवली बुखेत लेखाय जायेल हे। प्रेरित योहान यीशु मसीन जेल्मान पासाण 95 वोरह्यान आस पास लिखेल हे 1:1 एने तोच योहान ने हाजाली खुबेर एने योहान ने 1, 2, 3 पोत्रा लिखेल हे। ज्याज योहानाह माणहे, “यीशु जाह पोर मोंग किरेह।” इहकेरीन मानेन ओलेखतेह, योहान 13:23 यीशु मसीन हाजाली खुबेर केरता पदमुस नावान टापु पोर सेजा बोगतणे बाजरियेल ईतो, तेवी योहान ज्या पुस्तेकाह लिखेल। 1:9
ज्यो पुस्तेक लेखणेन योहान ज्यो एतो काय ज्या पुस्तेकाह वाचणारे यीशु हेऱ्या बोरहा माय रेणेन केरता खुसी जुड़ी, एने यीशुन पुशो आवणो आहने एतो केरीन ता माय आसा पायदा केरने 1:3; 22:7 तो ज्या पुस्तेकाह आखा बुरहो माणहान केरता लिखेल। पुण खास केरीन मोंडलीह लिखेल ईतो, तान बाराम बाग2–3 माय जुड़ेह। योहान खुद ने लेख्याह बोगवानान उगे रेन आयेल खुबेर एने जाणाव किथे, एने जी वातुह तो दिखेल ईतो तान पुरावो अलंकारीक बाषा माय आपेह, न्यो जो पुस्तेक हे तो जुनाला नेम ने थोड़ाक बाग हेऱ्यो मिलतो जुलतो हे एने जकर्या 6:1-8 ज्या बाग हेऱ्यो मिलेह। तिहेस केरीन हात पावल्यु एने हात वाटका ज्यो मीस्र देस पोर आयेल पिड़ान गेत हे, निर्गमन 7–9 अद्याय वोर प्रकाशितवाक्य आखरी दिह्यान बाराम वर्णन किरेह, ओवतो यीशु किहीक जिके एने ता पोर बुरहो केरनारे किहीक कायेम वोर जीवताला रेती तो किथे। ज्या पुस्तेकान माद्यम से चेतावणी आपेह एने यीशुह पोशो आवणेन बाराम तुमूह आसा जुड़ी।
रूपरेखा
1. योहान खुद ने ओलखात आपेह काय ज्यी जाणाव ताह किहीक जुड़ेल। 1:1-20
2. यीशुन उगे रेन हात मोंडलीह प्रतक्श रूप माय बोगवाना फाय रेन जुड़ेल खुबेर किथे। 1:1–3:22
3. हात सिक्कान बाराम उल्लेख केरने। 4:1–8:5
4. एने हात पावलीन वर्णन किरेह। 8:6–11:19
5. योहान एक आतल्या सोरान एने हात मुंडा वाला एजगेरा हेऱ्यो किहीक लेड़ाय केरने ज्यो किथे। 12:1–14:20
6. योहान हात रागान वाटकान बाराम लिखीह। 15:1–16:18
7. बोगवान तान जुगा वाला दुसमोना पोर जिक किहीक प्राप्त किरेह। 17:1–20:15
8. योहान नोवालो जुग एने नोवाली देरती जी आवणी हे तान बाराम वर्णन किरेह। 21:1–22:21
1
1 यीशु मसीन प्रकाशितवाक्य ज्यो ताह बोगवान ज्यानकेरता आपेल काय तान पावराह त्यु वातु। जीन जेल्दी एणेन जोरवरी हे देखाड़ी। एने तो हेरोगदुताह मोकलीन तान द्वारे तान पावोर योहानाह केयो,
2 योहान बोगवानान वचन एने मसी यीशुन गोवाही। मतलब जो काय तो दिखेल ईतो तान गोवाय दिनो।
3 बोरकेतवाला ता हेते जा जी जाणाव ने खोबरीन वचनाह होमेलतेह एने ज्या माय जो लिखेल हे तान गेत चालतेह! काहाकाय ज्यु आखी वातुह एणेन टेम आहने हे।
हात मोंडलीह नमस्कार
4 योहान ने उगे रेन त्यु हात मोंडल्यु, ज्यु आसीया देसा माय हेत्यु:
तुमूह गीण एने सान्ती जुड़ी ता बोगवानान उगे रेन जो हे, जो ईतो, एने जो आवण्यो हे, एने ता हात जीवान उगे रेन जा तान राजगादिन ओंगाण हेते,
5 एने मसी यीशुन उगे रेन, जो खीरलो गोवाह हे, एने मुरेल माय रेन जीव उठणार पिल्लो एने देरतीन राजान आदिकारी हे। तुमूह गीण एने सान्ती जुड़ी।
तो आपुह मोंग किरेह एने तो तान लुय केरीन आपणा पापा माय रेन आपुह सोड़व्यो।
6 एने आपुह एक राज एने तान आबाख बोगवानान केरता चाकर्यो बाणाव दिनो। यीशु मसीन बोड़ाय एने आदिकार कायेम कायेम एती रेय! आमेन।
7 दिखो, तो वादला हिऱ्यो आवण्यो हे! एने आखा माणहे ताह देखती, ता माणहे बी देखती जा ताह मारील एता। एने देरतीन आखा माणहे तान कारेण साती ठोकीन रेड़ती। आमेन।
8 मालीक बोगवान जो हे, एने जो ईतो एने जो आवण्यो हे, जो आखाह रेन ताकेतवालो हे, तो ज्यो किथे, “मीच पिल्लो, एने आखरी हे।”
योहानाह मसीन दर्शन
9 मी योहान, तुमरो बाहख यीशु मसीन कारेण दुख एने राज एने दिर माय तुमरी हिऱ्यो बागीदार हे। मी पतमुस नावान टापु माय बोगवानान वचन एने यीशुन गोवाय केणेन कारेण बोंदी ईतो।
10 मी एप्तान पेल्ली दिह चोखाला जीवा माय बोराय गीयो, एने मार पासाण पावलीन आवाज ने गेत मोटलो बोल होमलानो,
11 तो ज्यो केणे बाजरियेल एतो, “जो काय तु दिखेह, ताह पुस्तेक माय लिखते जा एने त्यु आसीयान सात मोंडल्यु: इफिसुस, समुरना, पिरगमुन, थुआतीरा, सरदीस, फिलादिलफिया, एने लोदिकिया फाय मुकेल दे।”
12 तेवी मी जो मार हिऱ्यो बोलने बाजरिनोह, ताह देखणेन केरता पासाण फिरनु एने पासाण फिरीन मी होनान हात दिवा मेलनेन जागु दिख्यो,
13 एने ता दिवान विची माय माणहान सोरान गेत एक एदम्याह मी दिख्यो, जो पाया हिऱ्यो वोर फाड़का पेरीन, एने हाती पोर होनान पुट्टो बांद रियेल ईतो।
14 तान मुंड एने लेट्या बोरफान एने कापसान गेत चोमेकता एता, एने तान डोला आक्ठान आसीन गेत एता।
15 तान पाय बाठी माय तापाड़ीन चोमकाड़ेल पितलान गेत एता, एने तान आवाज ते जोवराम पोड़तालो पाण्यान गेत एतो।
16 तो तान जेवड्या आथा माय हात ताराह लीय रियेल ईतो, एने तान मुयाम रेन दाराल्ली दुय दारान तालवार निकेलने बाजरियेल एती। एने तान मुय हिराण पोर निकलेल दिह्यान दोप ने गेत चोमेकतालो।
17 जेवी मी ताह दिख्यो ते मुरेल ने गेत तान पाया पोर पोड़ गीयो। तेवी तो माहु पोर तान जेवड्या आथा मेलीन केयो, “बिय मा! मीच पिल्लो एने आखरी हे।”
18 मी तोच हे! जो मोर जायेल ईतो, पुण एवी मी कायेम ने केरता जीवतालो हे। मोत एने आंदारकेली दुनिया पोर मार फाय आदिकार हे।
19 केरीन जी वातु तु दिखेल हे, एने जी वातु एणे बाजरेन्युह, एने जी वातु ज्यान पासाण एण्यु हेत्यु, त्यु आख्युह लिख ली।
20 मतलब ता हात तारान मालमात जाह तु मार जेवड्या आथाम दिखेल ईतो, एने ता हात होनान दिवान मालमात: ता हात तारा मोंडलीह खुबेर पोचाड़नारे हेरोगदुत हेते, एने ता हात दिवा हात मोंडल्यु हेत्यु।