3
1 Akahalingiy, Tama rou ndriyan imbuluhi rou namandran iya, pe iyki ndriyan isa kili tou, para kapohowe rou noru Ngindrai! Pe worou, ara tehen tora! Pwen ndroiyin ara pe hu ndramat para kol pwan kanpahasani worou pwi, paratesah, yihu kanpahasani yiy pwi.
2 Wawu kowase, mahapo worou noru Ngindrai, pe worou nakasarayah tesah kamulan, ara kinileu mapu. Hapeko tupahasaniy tehe kiro mwonen Kristus kisarayah, ara andre tukarayah tehe yiy, pe andre tukanime yiy, ara tehe yiy imwonen.
3 Hu ndramat masih mepo hutora longani melit itapo isa iyau kili yiy, ara andre hu mbukenahu kambusihu karayah howen tehe yiy mbukenan ara yiy howen.
4 Pe hu masih mepo hu mbusi pakut mwomwan, ara hu ndrihisani nongan para pwahanou ta Ngindrai, ndrokonan para aliy pakut mwomwan, ara kultuw mwomwan para ndrihisani nongan para pwahanou ta Ngindrai.
5 Wawu pahasaniy tehe Kristus kinsarayah, para kirapiyani hu pakut mwomwan torou kayau. Pe pakut mwomwan, ara kinto kili yiy pwi.
6 Pe hamou kiro kili yiy, ara andre kinto waiyaniy para kiro mbusi pakut mwomwan , ara pwi. Pe ndramat kiro mbusi pakut mwomwan manau, ara andre kinnime Kristus pwi, ndre kinpahasani yiy pwi, ara pwi.
7 Wawu noru, hamou mbuna kiluwani wawu kayasongsin. Ndramat mepo imbusi melit imwonen, ara kultuwayin imwonen tehe Kristus i, yiy kultuwayin imwonen.
8 Pe ndramat mepo ngara kimbusi pakut mwomwan, ara yiy ata sinai, paratesah, sinai ara kinmbusi pakut mwomwan koluw kinna. Pwen ndroiyin ara pe Noru Ngindrai Kamai isarayah, ara para kipwalngani mbulya sinai.
9 Yiy mepo irayah noru Ngindrai, ara andre kinro waiyaniy para kiro mbusi pakut mwomwan ndron, ara pwi, paratesah, nongna Ngindrai, ara ita ndron kili yiy, pe andre kiro mbusi pakut mwomwan manau, ara pwi. Paratesah, yiy kintayah noru Ngindrai pwen.
10 Pwen andre tukayirowe hu noru Ngindrai, pe hu noru sinai, ara tehen toro: Ndramat kinmbusi kultuw kinmwonen pwi, ndre kinnamili nalin pwi, ara yiy noru Ngindrai pwi.
Ndriyam kimbulihi hamou-hamou
11 Nongan mepo wawu kanhilingiy koluw kinna, ara iye: Ndriya rou kimbulihi hamou-hamou.
12 Wawu mbuna akarayah tehe Kain, mepo yiy ata sinai, pe itingundru nalin. Pe paratapeh pe itingundrun? Paratesah, kultuwayin ara mwomwan masih, pe kultuwayi nalin, ara imwonen.
13 Wawu nali, mwoiwa wawu mbuna kihin kapa hu ndramat para kol pwan hu kamwisnani wawu.
14 Worou tukanpahasaniy tehe tukantali kimat pe tukanwiri taleh mepo andre kinto-kinto, paratesah, ndriya rou imbuluhi nali rou hu. Pe yiy mepo ndriyan kinmbuluhi nalin pwi, ara ita ndron pahandra pwoke para kimat.
15 Ndramat kimwisnani nalin, ara yiy ndramat para tingundru ndramat, pe wawu pahasaniy tehe ndramat para tingundru ndramat, ara andre kinwiri taleh kinto-kinto pwi.
16 Pwen andre tukapahasani kultuw para namiliwai, ara tehen toro: Yesu Kristus, ara iyki mwoiwan para kisopwat rou. Pwen worou i, ara tukaiki mwoiwa rou para kasopwat nali rou hu.
17 Kapa ndramat hamou mamenmenan soyon para kol pwan pe kinime nalin iro ndroisi handra-handra, hapeko koyun kinsikirani nalin pwi, tehen tapeh pe namiliwa Ngindrai andre kiro kili yiy?
18 Pwen wawu noru, mbuna tukanamili ndramat kiya hu nongan ndre kiya poho rou opu, hapeko kiyapolo hu kultuwayi rou pe nongan ndrokonan.
19 Pwen iye ko imbusi worou tupahasaniy tehe worou ara para nongan ndrokonan, pe karahatini worou koro mwoimwoi mbulmara Ngindrai,
20 kapa ndriya rou kiporu. Paratesah, tupahasaniy tehe Ngindrai, ara ipahasani melit masih, pe lohongan ara iramwatini lohongai masih iripo ndriya rou.
21 Wawu kowase, kapa ndriya rou kinporu pwi, ara tukarahatini rou koro mbulmara Ngindrai.
22 Pe kapa tukatohun pe kasok yiy, ara andre kiykiy kisa kili worou, paratesah, ngara tukoho ndruwa hu nongan para pwahanou tan, pe ngara tukambusi kultuw mepo inamiliy.
23 Pwen nongan para pwahanou tan, ara iye: Tukapwotisingi lohonga worou kiya ngala Norun Yesu Kristus, pe ndriya rou kimbulihi hamou-hamou tehe kinpwandrandrahani worou.
24 Pe hu mepo huho ndruwa nongan para pwahanou tan, ara huppai sura yiy, pe yiy ippai sura hu. Pwen aro ipwainganiy tehe Ngindrai ippai sura tou. Pe tupahasaniy tehe Ngindrai ippai sura tou, ara iyau kili Mwoiwan Haiyan mepo Ngindrai kiniykiy iripo kiltou.