4
Wawu kanohonou hu mwomwoyou
1 Wawu kowase, wawu mbuna akapwotisingi lohonga wawu kiya kili hu ndramat mepo Mwoiwan Hiyan kinto kili hu pwi. Hapeko akanohonou pe akayirowei hiyan namu tehe hu mwomwoyou ara ata Ngindrai ndre pwi, paratesah, hu poropet para pwandrandraman, ara hu kanna kene kol pwan.
2 Pe andre tukayirowe Mwoiwa Ngindrai, ara tehen toro: Hu ndramat masih mepo huwong ngawan tehe Yesu Kristus ara irayah ndramat, ara huyau kili Ngindrai.
3 Hapeko yiy mepo kinwong ngawan pe kinhari ngala Yesu pwi, ara kinyau kili Ngindrai pwi. Aro ara mwoiwa kristus para pwandrandraman, mepo wawu kanhilingiy tehe andre kisa, pe mahapo, ara kinsa iripo kol pwan pwen.
4 Wawu noru, wawu yau kili Ngindrai, pe wawu kantamwaitini hu poropet para pwandrandraman, paratesah, yiy mepo ita nondriyam, ara pwoke tan namandran iya, iya kili yiy mepo iripo kol pwan.
5 Yihu, ara para kol pwan, pwen hu wong iya marai para kol pwan, pe hu ndramat para kol pwan, ara huhilingi hu.
6 Worou tuyau kili Ngindrai, pe yiy mepo ipahasani Ngindrai, ara ihilingi rou, hapeko hiyeh kinyau kili Ngindrai pwi, ara andre kinhilingi rou pwi. Iya lohongai aro ko, worou andre kayirowe Mwoiwa nongan ndrokonan pe mwomwoyou pwasoyou.
Namiliwa Ngindrai pe namiliwa rou
7 Wawu kowase, ndriya rou kimbuluhi hamou-hamou, paratesah, ndriyai para kambuluhi hamou-hamou, ara iyau kili Ngindrai. Hu masih mepo ndriyahu imbuluhi hu ndramat, ara hu noru Ngindrai, pe hupahasani Ngindrai.
8 Pe yiy mepo ndriyan kinmbuluhi hu hayah pwi, ara ikowu ta Ngindrai, paratesah, Ngindrai, ara ndriyan ngara kimbulihi hu ndramat.
9 Ngindrai ipwaingani namiliwan isa kili worou, ara tehen toro: Ipwandrisa Norun hamou opu isa kol pwan, pwen andre tukoro wiri taleh kiyau kili yiy.
10 Ndriya rou imbuluhi hamou, ara tehen toro: Worou tukannamili Ngindrai imu, ara pwi, hapeko yiy inamili worou pe ipwandrisa Norun isa tehe yukyuk para kirapiyani hu pakut mwomwan torou.
11 Pwen wawu kowase, kapa Ngindrai ndriyan kinmbuluhi rou, pwen ndriya rou, ara kimbulihi hamou-hamou i.
12 Ndramat hamou kinho nime Ngindrai pwi, hapeko kapa ndriya tou kimbulihi hamou-hamou, Ngindrai iripo kili worou, pe namiliwan, ara irayah ngawan isa kili worou.
13 Tehen toro ko, tupahasaniy tehe turopo mwalen, ara iyau kili yiy, pe yiy iripo kili worou, paratesah, Mwoiwan, ara kiniykiy kinsa kili worou.
14 Pe tukannimei pe tukantiyaniy tehe Taman, ara ipwandrisa Norun Kamai para kirayah Ndramat para Sopwat hu ndramat para kol pwan.
15 Kapa ndramat hamou kiwong ngawan tehe Yesu ara yiy Noru Ngindrai Kamai, pwen Ngindrai ita kili yiy, pe yi i, ara ita kili Ngindrai.
16 Pwen tupahasaniy pe tupwotisingi lohongarou tehe Ngindrai ndriyan imbuluhi rou. Ngindrai ara ndriyan ngara kimbulihi hu ndramat. Hu mepo hutora nondriya namiliwai, ara hutora kili Ngindrai, pe Ngindrai ita kili hu.
17 Iyau meresai tehen toro ko, wou kanamili ndramat hamou tisingiy, pwen andre tukarahatini rou pwokeyan kiro lenge tamwanye, paratesah, turayah tehe Yesu turopo kol pwan iye.
18 Worou andre kannoh ta Ngindrai pwi, kapa worou kanamili yiy imwonen masih. Paratesah, hamou kinoh, ara andre kiwiri koran. Pe yiy mepo inoh, ara namiliwai ndrokonan kinto kili yiy pwi.
19 Tunamili hamou-hamou, paratesah, yiy kinnamili worou imu.
20 Kapa ndramat hamou kipa, “Yo unamili Ngindrai, ” hapeko ihingasi nalin, ara yiy ndramat hamou para pwasoyou. Paratesah, kapa ndramat hamou kinho namili nalin mepo ngara kiro nime yiy, ara kinlahi para kinamili Ngindrai mepo kinho nime yiy pwi.
21 Nongan para pwahanou iye, ara kiniykiy kinsa kiltou: Tehe ndramat mepo ndriyan kimbuluhi Ngindrai, ara ndriyan kimbuluhi nalin i.