☰ Mattiu 18
18
Hiyeh ara ihohin iya, ita nondriya kolo king mepo ngara kiro mu kiy aliy para kol paingan yang
1 Pe iro mwonen paramwandrai ara, hu ndramira Yesu, ara husa pe husok yiy, hupa, <<Hiyeh ndrokonan, ara ihohin iya, ita kolo king mepo ngara kiro mu kiya aliy para kol paingan yang?>>
2 Pwen iyoh mbunah hamou mendreheh isa, pe iyki yiy iro tine mwalingahu. 3 Pe Yesu ipwai, ipa, <<Yo upwai ndrokonan isa kili wawu, kapa akantapihiye wawu pe akantayah tehe hu mbunah mendreheh pwi, pwen andre akanlahiy para akasong kaya kolo king mepo ngara kiro mu kiya aliy para kol paingan yang, ara pwi. 4 Pwen tehen tora ko, yiy mepo kiyki yiy kiya pwan tehe mbunah iye, ara ihohin iya, ita kolo king mepo ngara kiro mu kiya aliy para kol paingan yang.
5 Pe yiy mepo kirawulohani mbunah hamou mendreheh tehen iye kiya ngolo, ara irawulohani yo. 6 Pe kapa sehe ndramat kimbusi hamou tahu mbunah mendreheh iye, mepo ipwotisingi lohongan isa kili yo, para kiyos kiya pakut mwomwan, ara iya hiyan para hu kandruyani pat sih namandran kiho koyun, pe kapiyani yiy para kimut pe kisomun kiya mbulu mwekeu.
7 Toimwa hu ndramat para kol pwan, nopwaran ita kili hu, iyau hu melit mepo ngara kimbusi hu ndramat kayos kaya pakut mwomwan! Hu melit tehen tora, ara andre hu kasa. Hapeko toimwa sehe ndramat mepo imbusiy, pe hu melit tehen tora hurayah! 8 Pe kapa nimam ndre ndrikam kimbusi wou pe ayos aya pakut mwomwan, ara asondritiy pe apiyaniy kiyau. Iya hiyan masih para awiri taleh kinto-kinto kiyapolo nombuwem mwomwan ndre ndrikam mwomwan. Pe kinna hiyan pwi kapa nimam malkai pe ndrikam malkai kiro hiyan, pwen kapiyani wou kiya mwan mepo kinoho mat pwi, ara pwi. 9 Pe kapa maram sih kimbusi wou pe ayos aya pakut mwomwan, ara hiyan para atangihiy pe apiyaniy kiyau. Iya hiyan masih para awiri taleh kinto-kinto kiyapolo maram sih o. Kinna hiyan pwi kapa maram malwoh kiro hiyan, pe kapiyani wou kiya nondriya ngat mepo mwan ita yat aliy, ara pwi.
Nongan pwandritiye para sipsip isongsin.
10-11 Mara wawu kiro, pe ndriya wawu mbuna kitayi hu mbunah mendreheh* iye. Paratesah, yo upwai isa kili wawu tehe hu angelou tahu, ara lang masih ngara hu koro mbulmara Tomo ita kol paingan yang.†
12 Wawu lohonganiy tapeh? Kapa ndramat hamou masipsip tan masangat, pe hamou tahu kiyasongsin, pwen tehen tapeh? Andre kitali hu androsongui pe androsomou hu koro ngondron, pe kiyaten hamou mepo iyasongsin, ndre pwi? 13 Pe kapa kiya kahiy, ara upwai ndrokonan isa kili wawu, tehe hu androsongui pe androsomou, ara ipwesani hu ihomwak o, hapeko kapa sipsip mepo iyasongsin ara kimui, ara andre kipwes namandran iya. 14 Tehen tora ko, Tama wawu iyera kol paingan yang, ara mbuwalin para hamou tahu mendreheh iye ara kiyasongsin.
Nalim kimbusi kultuw mwomwan kisa kili wou
15 Pe kapa nalim hamou kimbusi kultuw mwomwan kisa kili wou,‡ ara aya pe apwaingani mwomwan atan, pe kiho mwalinga walu kopu. Pwen kapa kihilingi wou, ara anwiri nalim kinimui. 16 Hapeko kapa mbuwalin para kihilingi wou, pwen awiri ndramat hamou ndre malmou i para hilkaya suram; pwen <titiye para tamwanye masih ara, ara ndramat malmou ndre matimou, ara andre hu karayah ndramat para kapwokeyani nongan.>§ 17 Pe kapa kihimbuwalin para kihilingi hu, apwai kiya kili hu ndramat para ekklesiya. Pe kapa kinhilingi nongnahu pwi yi, pwen aro nime yiy ara tehe ngara aro nime ndramat hamou mepo tanan ta Yapan pwi, pe tehe hamou ndramat para poya takis.
18 Pwen upwai ndrokonan isa kili wawu, tesah akawasiy kiro kol pwan, ara kol paingan yang andre kiwasiy. Pe tesah wawu kataliy kiro kol pwan, ara kol paingan yang kintaliy.
19 Pe nakupo sura nongno yi, tehe kapa walu malmou koro kol pwan, lohonga walu kiro handra ko pe alkasok hapesah, ara andre Tomo ita kol paingan yang kimbusiy tehen aliy opu kisa kili walu. 20 Paratesah, hilu malmou ndre hu matimou hu kasa rawurehu kiya ngolo, ara utasura hu.>>
Nongan pwandritiye ta ndramat para poya mbulen mepo koyun kinhosikirani hu ndramat pwi
21 Pwen Pita isa kili Yesu pe isok, ipa, <<Yapan, maporosahayeh imwonen andre kutali hu pakut mwomwan ta nali ndre pisu mepo imbusiy isa kili yo? Matisan kiya maporoandrtisap, ndre?>>
22 Pe Yesu isomwi yiy, ipa, <<Upwai isa kili wou, tehe maporoandrtisap pwi; hapeko maporoandrtingui pe andrtisap.
23 Pwen tehen tora ko, kolo king mepo ngara kiro mu kiya aliy para kol paingan yang, ara tehe king hamou nakiramwanye nahanah tan kiya polo hu ndramat para poya mbulyan. 24 Pe iro mwanye nahanah tan, pe huwiri ndramat hamou nahanah tan iramwaitini mapwesi** ara isa kili yiy. 25 Pe ndramat ara kinlahiy para kipo soiwi nahanah tan pwi. Pwen namandran tan ipwatisingiy tehe yiy, nambuyun, norun, pe menmenan masih kene, ara andre kapo pehei kaliy para kipo soiwi nahanah tan.
26 Pwen ndramat para poya mbulen ara, ara itukuruhu iya mbulmaran, pe irakamam iya kili yiy ipa, <Alonge hape na, pwen andre kupo soiwi melit masih kimui.> 27 Pwen namandran tan, ara koyun isikirani ndramiran para poya mbulyan ara. Pwen itali nahanah tan iyau o mwaihei, pe itali yiy iyau.
28 Hapeko iro mwonen ndramat para poya mbulen ara iya ngawan, pwen iya kahi ndramat hamou para poya mbulen tehe yiy o, mepo nahanah tan iro kili yiy ara masangat.†† Pe imbultuwe tahatini yiy pe niman indrek koyun pe irakekeyani yiy, ipa, <Apo soiwi nahanah tam iripo kili yo!>
29 Pwen ndramat para poya mbulen ara, ara itukuruhu iya kili yiy pe irakamam, ipa, <Alonge hape na, pwen andre kupo soiwin kimui.>
30 Hapeko yiy ara mbuwalin. Pwen pe iwiri ndramat para poya mbulen ara, pe iyaiki yiy iya nondriya kou para kiro ara, kipoo kiyki nahanah tan. 31 Pwen pe hu ndramat para poya mbulen hayah i, ara hunime tesah kintayah, pe ndriyahu isin namandran iya. Pwen huya kili namandran tahu pe huya tiyani melit masih mepo kintayah ara.
32 Pwen namandran ara iyoh ndramat para poya mbulyan ara, isa nondriyan. Pe ipa, <Wou pwassi ndramat para poya mbulen! Yo kuntali nahanah tam masih, paratesah, arakamam isa kili yo.> 33 Koyum ara andre kisikirani ndramat para poya mbulen hamou ara yi, pwen tehe kunmbusiy kinsa kili wou. 34 Pe namandran tan ndrinan ilokuh, pe iyki yiy iya nima hu ndramat para memerani kou, para andre kiwiri koran, kipoo kiyki nahanah tan topwei.
35 Pwen tehen toro ko, Tomo iyera kol paingan yang andre kimbusi tora kisa kili wawu kapa wawu kantali pakut mwomwan ta nali wawu ndre pisu wawu kiyau ndriya wawu imwonen pwi.>>
* 18:10-11 Iya nongna kol Krik, nongan ara ipa, <<hu mbunah mendreheh iye>> (iripo nongan aro pe ita v. 6 pe v. 14 iye ara iyawule tehe nongan ita Mattiu 10:42, <<hu ndramat o mwaihei tora, ara hutora surahu ndramiro yi.>> Yesu kinwong kinna kili hu mbunah o, ara pwi. Yiy iwong iya kili hu ndramiran hayah i. TP: Long tok Grik, dispela tok <<ol dispela liklik pikinini>> (long dispela lain na long lain 6 na lain 14 tu), em i wankain olsem tok i stap long Matyu 10.42, <<ol dispela manmeri nating i stap long lain disaipel bilong mi.>> I luk olsem Jisas i no tok long ol pikinini tasol. Em i tok long ol arapela disaipel bilong en tu. † 18:10-11 Iya hu puk hayah para koluw, nongan sahin i ita, pe ipa toro: v. 11 Noru Ndramat isa para kisopwat hiyeh isongsin. Eng: Some manuscripts 11 The Son of Man came to save what was lost. ‡ 18:15 Hu puk hayah para koluw, ara hupa <<kultuw mwomwan>> opu, pe hu kanpa <<isa kili wou>>, ara pwi. § 18:16 Animei ita Nongan para Pwahanou Luhin (Deuteronomy/Diuteronomi) 19:15 ** 18:24 Ndromwoya nahanah ara, ara namandra-namandran iya, tehe K10,000,000 (Greek: ten thousand talents; Eng: millions of dollars, or perhaps more than ten million kina). †† 18:28 Ndromwoya nahanah ara, ara mendreheh o.
☰