19
Lohongai para yesou imut
1 Pe iro mwonen Yesu ipohowe nongnan aro ihipwen, pwen itali kol namandran hape Kaliliy, pe iya kol namandran hape Yutiya, ita haroh para Ndran Yortan.
2 Pe hu ndramat soyo-soyon iya, ara huho ndruwan, pe isopwoyani hu iro hape ariya.
3 Pwen hu Parisiy hayah husa kili yiy para kanohonou yiy. Pwen husok, hupa, <<Nongan para pwahanou ta Ngindrai, ara ipa hiyan para ndramat hamou kitali nambuyun kiya sehe lohongan inamiliy, ndre pwi?>>
4 Pe Yesu isomwi hu, ipa, <<Wawu kannime Nongna Ngindrai mepo kinpwai pwen, kinpa, <Koluw-koluw kinna, Ngindrai imangsani hu ndramat malpat—kamai pe pihin,> ndre pwi?
5 Pwen Ngindrai ipwai, ipa, <Paratesah, tunan ara ko, andre kamai kitali taman hilu tinan, pe hilu pihin tan andre karayah hapat, pe nombuwe hilu kirayah hamou o,> ndre pwi?
6 Pwen pe tehen tora ko, hilu konto tehe malmou pwi; nombuwe hilu kintayah hamou o. Pwen tesah mepo Ngindrai kiniykiy kinna wule, ara hamou mbuna kimbusi mwalinga hilu kimut.>>
7 Pe hu Parisiy husok, hupa, <<Pwen paratapeh pe Mose ipwandrandrahaniy tehe ndramat hamou andre kiratuluwi nongan para yesou kimut, pe kiykiy kiya kili pihin tan, pe kirasse pihin tan kiyau?>>
8 Pe Yesu isomwi hu, ipa, <<Mose ipa hiyan para akatali pihin tawawu, paratesah, ndriya wawu ara ipwoke. Hapeko koluw-koluw kinna, ara tehen tora pwi.
9 Yo upwai isa kili wawu, kapa sehe kamai kitali pihin tan, pe kiya yesou kiya kili pihin hamou, ara imbusi kultuw para pilah. >>
10 Pwen hu ndramira Yesu, ara hupwai iya kili yiy, hupa, <<Kapa ara ndroiyi lohongai para kamai pe pihin kayesou, pwen hiyan masih para kona yesou.>>
11 Pe Yesu isomwi hu, ipa, <<Yihu ndramat masih andre hu kanlahiy para hu kapa hiyan kiya nongan iye pwi. Hapeko iya hiyan, iya kili hu ndramat opu mepo Ngindrai kiniyki nongan ara kinna kili hu.
12 Paratesah, hu ndramat hayah, ara tinahu imwalahiy tahu, pe namiliwa pihin, ara kinto kili hu pwi. Pe hu hayah tahu, ara hu ndramat hurasangi hu, pe namiliwa pihin, ara kinto kili hu pwi yi. Pe hu hayah i, ara mbuwalihu para kayesou, paratesah, hunamiliy para hu koro ko para poya mbulya kolo king mepo ngara kiro mu kiya aliy para kol paingan yang. Pe yiy mepo ilahiy para kipa hiyan kiya nongan iye, ara kipa hiyan.>>
Hu mbunah mendreheh pe Yesu
13 Pwen hu ndramat huwiri hu mbunah mendreheh huya kili Yesu para niman kiya ndrita hu, pe kitoholi hu. Hapeko ndramiran hu, ara hupomate hu.
14 Pe Yesu ipwai, ipa, <<Wawu katali hu mbunah kasa kili yo, pe wawu mbuna akakaituwe hu. Paratesah, kolo king mepo ngara kiro mu kiya aliy para kol paingan yang, ara atahu ndramat tehe hu mbunah aro.>>
15 Pe iyki niman iya ndritahu, pe itoholi hu ihipwen, pwen itali hape ariya, pe iyau.
Ndramat hamou menmenan soyon pe kolo king mepo ngara kiro mu kiya aliy
16 Pwen ndramat hamou isa kili Yesu pe isok yiy, ipa, <<Ndramat para hinonou, yo andre kumbusi tesah mepo hiyan, pwen pe andre kuwiri taleh mepo andre kinto-kinto?>>
17 Pwen Yesu isomwi yiy, ipa, <<Paratapeh pe asok yo iya tesah ara hiyan? Ngindrai hamou opu, ara yiy hiyan. Kapa nawiri taleh kinto-kinto, pwen aho ndruwa hu nongan para pwahanou ata Ngindrai.>>
18 Pe ndramat ara, ipwai, ipa, <<Hu sehe nongan para pwahanou eh?>>
Pe Yesu isomwi yiy, ipa, << <Mbuna atingundru ndramat kimat, pe mbuna apo pilah, pe mbuna apahana, pe mbuna apwandrandraman,
19 pe aranuhuyani tamam hilu tinam, pe ndriyam kimbuluhi yiy para pakeh kili wou tehe ndriyam ngara kimbuluhi wou mbukenam.> >>
20 Pe ndramat ara ipwai, ipa, <<Yo ngara kuho ndruwa hu nongan para pwahanou masih ara; pe tesah hira ndron para andre kumbusiy i?>>
21 Pe Yesu isomwiy, ipa, <<Kapa wou anamiliy para narayah imwonen masih, ara ayapo pehei kiya hu melit tam masih, pe awiri singayai para aliy, pe atainganiy kiyata hu ndramat mepo hundroisiy, pe andre awiri hu melit mwayih kennen namandran ita kol paingan yang. Kihipwen, asa oho ndruwo.>>
22 Pe iro mwonen ndramat aro ihilingiy, iyau iyapolo ndriya pworu, paratesah, menmenan, ara soyon iya.
23 Pwen Yesu ipwai iya kili ndramiran hu, ipa, <<Yo upwai ndrokonan isa kili wawu, tehe ingandrah para ndramat hamou menmenan soyon kisong kiya nondriya kolo king mepo ngara kiro mu aliy para kol paingan yang.
24 Pe upwai isa kili wawu paiwe, tehe ingandrah para kamel hamou kisong kiya ngara kannih sih, hapeko ingandrah masih, para ndramat hamou menmenan soyon, kisong kiya nondriya kolo King Ngindrai mepo ngara kiro mu kiya aliy.>>
25 Pe iro mwonen ndramiran hu huhilingi nongan aro, ara lohongahu indrap namandran iya, pe husok, hupa, <<Kapa tehen tora, pwen andre hiyeh ndrokonan andre Ngindrai kisopwat yiy?>>
26 Pe Yesu maran itis tahu, pe ipa, <<Hu ndramat, ara kanwenei pwi, hapeko Ngindrai, ara iwenei para kimbusi melit masih kene.>>
27 Pe Pita isomwi yiy, ipa, <<Yowu kantali hu melit masih para yowu koho ndruwam! Andre yowu kawiri tesah hiyan kiyau aliy yeh?>>
28 Pe Yesu ipwai iya kili hu, ipa, <<Yo upwai ndrokonan isa kili wawu, tehe kiro lang para melit masih hu nakarayah howen, pe kiro mwonen Noru Ndramat kirompwan ndrohonoku mipwan ta king tan, mepo nonowan iya, ara wawu mepo ngara akoho ndruwo, ara andre wawu kampwan sura yo koro ndrohonoku pwanpwan ta king songui pe luwoh, pwen andre wawu karayah ndramat para tamwanye, pe akaramwanye nongan tahu ndraye hu Yisrayel songui pe lupat.
29 Pe tunan yo ko, hu ndramat mepo hukatali suwehu, ndre nali hu, ndre pisu hu, ndre tama hu, ndre tina hu, ndre norun, ndre pingehu, ara andre hu kaposura melit tahu maporosangat, pe andre kawiri taleh kinto-kinto.
30 Hapeko hu ndramat soyon hutora mu, ara andre hu kaya mulan; pe hu ndramat soyon hutora mulan, ara andre hu kaya mu.