17
Pihin pe kan puyap namandran
1 Pwen angelou hamou ta hu angelou manandrtimou mepo hu mbultuwe pwelekei manandrtoyoh, ara isa pe ipwai isa kili yo ipa, “Asa, pe nakupwaingani kora pihin para ndroiyi pilah mepo imira mipwan ndrita hu ndran soyon.
2 Yihu king para kol pwan hu popilah iya sura pihin ara, pe hu ndramat masih para kol pwan ara hu popilah iya sura yiy i, pe huyin wain para hu kultuwayi pilah tan.”
3 Pwen Mwoiwan Haiyan isa ndrito pe angelou ara isap yo iya nondriya kol ndrohoyin sih. Pe uro ariya pe unime pihin hamou iro mipwan ndrita kan puyap hamou laman, pe mandrakuyun ara nongan para pwasisiman iramburuhiy. Pe hu paya pihin ara manandrtoyoh pe hu ndrosuwan masongui.
4 Pihin ara kinsuluye yiy kinna koyau anandritan pe laman, pe hu nowi yiy iya kolt ma nganan, pe hu pat lahayan pe hu sowiy. Pe imbultuwe pweniu kolt sih iro niman, pe pweniu ara ipep iya hu pakut mwomwan pwassin masih, pe hu pakut mwomwan handra-handra para hu pilah tan.
5 Pe ndroiyi nongan kokohon kantatuluwiy iro kombuyen, ara ipa toro:
PAPILON KOL PWOKEYAN MASIH
NDROHONOKU KULTUW PARA HU PILAH
PE NDROHONOKU HU KULTUW PWALAN MASIH PARA KOL PWAN MASIH.
6 Pe unimei tehe pihin ara iymwi ndreye hu ndramat haiyan ta Ngindrai, pe imbui iya ndreye hu, ndreye hu mepo hu tiyani titiye ta Yesu. Pe iro mwonen unime yiy, ara lohongo indrap namandran iya.
7 Pwen angelou ipwai isa kili yo ipa, “Paratapeh wou alohonge ndrit? Andre kutiyani ndroiyi nongan kokohon satam, ta pihin pe ta kan puyap mepo ita ngaplaniy, mepo hu payan manandrtoyoh pe hu ndrosuwan masongui.
8 Pe kan puyap namandran mepo annimei, ara mamumu iro, pe mahapo kinto pwi, pe andre kisa ngawan Ngat Mbulun Pwi, pe Ngindrai andre kipwalngani yiy. Pe hu ndramat para kol pwan mepo ngalahu kantatuluwiy kinto nondriya puk para taleh pwi, mepo mapu kanmangsani kol pwan, ara andre hu kalohonge ndrit kiro mwonen hu kanime kan puyap ara. Paratesah, yiy mamu iro, pe mahapo kinto pwi, hapeko kiyamulan andre kisa yi.
9 Ndramat mepo lohongan waison opu, ara andre lohongan kileu kiya melit iye. Hu paya kan puyap manandrtimou ara hu parangondron manandrtoyoh mepo pihin ara impwan ngondron manandrtoyoh ara kene.
10 Pe hu paya kan puyap manandrtimou ara, ara ipwaingani hu king manandrtimou i. Hu king mayimou ara hu kanyos, pe hamou iripo, pe hamou ara mapu kinsa. Hapeko kapa kisa, ara andre kinto ndrangan niwen pwi.
11 Pe kan puyap mamu iro, pe mahapo kinto pwi, yiy, ara king androlmou. Yiy, ara para sura hu king manandrtimou ara, pe andre kapwalngani yiy.
12 Hu ndrosuwan masongui mepo annimei ara ipwaingani hu king masongui mepo andre hu karayah kolo king hakol, pe hu kantayah mapu. Hapeko andre hu kawiri pwoke nopwaran tehe hu king kiho nondriya paramwandrai sih opu, kiyapolo kan puyap ara.
13 Hu king ara, ara lohongahu handra ko, pe andre hu kaiki pwoke pe pwoke nopwaran kiya kili kan puyap.
14 Pe andre hu kapopahun kiya polo Noru Sipsip, hapeko Noru Sipsip andre kiramwaitini hu, paratesah, Yiy ara Yapane hu yapan masih, pe King ta hu king masih—yihu mepo huropolo yiy, ara hu mepo iyoh hu, pe irakinimahu pe hu mepo hupwotisingi lohongahu ndrisiyon iyatan.”
15 Pwen angelou ara ipwai isa kili yo, ipa, “Hu ndran mepo annimei, mepo pihin para pilah impwan ndrita hu, ara hu ndramat, pe hu kamai hawum-hawum, hu kol namandran masih, pe hu nongna kol handra-handra.
16 Pe kan puyap ara, pe hu ndrosu masongui mepo annimei ara andre hu kahingasi pihin para pilah ara. Pe andre hu kawiri menmenan topwei, pe hu katali yiy kiro mwaheh opu. Pe andre hu kaini sangin, pe katimwi yiy kiya mwan.
17 Paratesah, Ngindrai kiniykiy lohongai kinna ndriyahu para hu kapwaingani lohongan handra ko kirayah, pe hu kapa hiyan pe hu kaiki pwoke tahu kiya kili kan puyap ara, para kiro mu tehe king, kipoo hu nongna Ngindrai kasaha manan.
18 Pe pihin mepo annimei, ara kol namandran pwokeyan masih mepo iromu tehe king, ta hu king masih para kol pwan.”