18
Kol Papilon iyos iya mwomwan
1 Iya mulan unime angelou hamou i iyau kol paingan yang isa pwan. Pe yiy mapwoke nopwaran namandran iya iro kili yiy, pe ngannganan ara ilengani kol pwan.
2 Pe iwayeh sahin namandran iya, ipa,
“Kinyos! Kol namandran Papilon kinyos!
Yiy irayah seu hawum ta hu payit,
pe ndrohonoku hu payit pwassin masih,
pe ndrohonoku hu norukan kolsahu mwomwan masih,
pe ndrohonoku hu kan puyap kolsahu mwomwan masih.
3 Paratesah, hu kol namandran masih, ara huyin wain tunguyan pe lohongahu imeu,
pe huro ndruwa hu kultuwayen para pilah.
Pe hu king para kol pwan hu popilah iya sura yiy,
pe hu ndramat para popehei para kol pwan, ara menmenahu iya soyo-soyon, ara iyau hu melit lahayan atan.”
4 Pwen uhilingi yoholai sahin iyau kol paingan yang ipa,
“Wawu ndramiro, akasa mawen kol namandran ara,
pwen pe andre wawu konto nondriya hu pakut mwomwan tan pwi,
pe hu nopwaran mwomwan masih atan, ara andre akankuniy pwi;
5 paratesah, hu pakut mwomwan tan ara mambuniyan iya paingan kol paingan yang,
pe Ngindrai ilohongani hu kultuw pwassin tan masih.
6 Pwen tesah imbusiy, ara akapo soiwin kimui tehen aliy kiya kili yiy;
pe akapo suran maporolusap kimui kiya kili yiy, iya tesah kinmbusiy.
Akasuluyani wain kiya pweniu tan, ara akapo suran maporolusap kiya tunguyan.
7 Yiy impwan ndrita hu melit lahayan atan, pe ihari ngalan
pe isikiye yiy mbukenan, ipa,
‘Yo urupompwan tehe kwin, pe yo pihinau hamou pwi,
pe andre kuntang pwi.’
Pwen akaiki ngandran namandran pe ndriyang kiya kili yiy.
8 Pwen tehen tora ko, nondriya lang sih, kimat, pe ndriyang, pe song, hu nopwaran mwomwan tan masih, ara andre kahali yiy.
Pe andre kisongut kiya mwan,
paratesah, Yapan Ngindrai ara pwoke ita kili yiy pe iyki yiy iya nongan.”
9 Pe kiro mwonen hu king para kol pwan mepo hupopilah iya sura yiy pe hupo hu melit lahayan tan, hu kanime kiro songut pe kosumwonon kirotunam, pwen andre hu karangsi yiy.
10 Pe andre hu kanoh kiya ngandran iro hingorowei, pwen andre hu koro tine mawen o, pe hu karang hu kapa,
“Toimwam! Toimwam, O kol namandran pwokeyan masih!
O Papilon, kol namandran pwokeyan!
Paratesah, nondriya paramwandrai sih opu akuni koram!”
11 Hu ndramat para popehei para kol pwan, ara andre hu karangsi yiy, paratesah, hamou tahu andre kinsou hu kennahu kiro kili yiy. ara pwi —
12 hu kennahu tehe kolt, siliwa, hu pat ma nosahu pe sowiy; koyau mwayih lahayan, anandritan, pe silik pe koyau laman; pe kei ngonohon handra-handra, hu nombungong handra-handra humbusi hu iyau yaha elepen ipori, hu kei kenen namandran, paras, haiyen pe pat totolwan;
13 pe hu kennahu sinamon, pe koiyo, pe melit ngonohon layin, ndraikei ngonohon layin, pe melit ngonohon layin para kaikiy tehe yukyuk, wain pe ndraikei holip, palawa pe wit, hu kan para hang-hang pe sipsip, hu hos, pe hu karis; pe hu ndramat mepo ngara kapo pehei kiya tahu tehe hu ndramat para pwandrendres.
14 Pe andre hu kapa,
“Hu melit hiyan masih anamiliy, ara kinna mawen kili wou.
Hu menmenam soyon, pe melit hiyan lahayan, ara kintan kili wou, pe andre ankahiy pwi.”
15 Hu ndramat para popehei mepo hu pehei iya hu melit aro, pe hupo menmenahu soyon iyau aliy, ara huro tine mawen, pe hunoh iya kora mwomwan tan. Pe andre hu karang mali hu, pe karang tisingihu
16 pe hupa,
“O toimwam! Toimwam, kol namandran pwokeyan,
asuluye wou iya koyau lahayan, anandritan pe laman,
pe ngana koiwem lahayan iya iyapolo pipirya kolt, iyapolo hu pat lahayan pe iyapolo hu sowiy!
17 Pe iho nondriya paramwandrai sih opu, hu melit soyo-soyon lahayan masih, ara hu kanna pwalngengei!”
Hu ndramat masih para ngaplani ndroi para ndras, pe hu masih mepo ngara kahis ndroi, hu ndramat para mbulen para ndroi, pe hu masih mepo hu ngara kawiri hiyan tahu kiyau ndras, ara andre hu koro tine mawen.
18 Pwen kiro mwonen hu kanime kosumwonon kirotunam, pwen andre hu kapa, “Hakol kol namandran tehe kol namandran pwokeyan iye, ndre pwi?”
19 Pwen andre hu karahun kohu pwan kiya ndrita payahu, para kipwaingani koisirai tahu, pe andre hu karang pe kamangaliye pe hu kapa,
“O toimwam! Toimwam, kol namandran pwokeyan,
hu masih mepo hu mbukena hu ndroi para ndras,
ara menmenahu hu iya soyon iyau hu menmenan soyon!
Paratesah, nondriya paramwandrai sih o, kinna pwalngengei!”
20 Pwen wawu para kol paingan yang, ara akapwes!
Pe wawu ndramat haiyan ta Ngindrai pe wawu aposel pe wawu poropet!
Paratesah, tesah imbusiy isa kili wawu, ara Ngindrai kiniyki koran.
21 Pwen angelou hamou pwokeyan isoli pat sih namandran iya tehe pat para raluluwi wit, pe ipiyaniy iya nondriya ndras, pe ipa,
“Kiyapolo ndrangsai
kol namandran pwokeyan Papilon ara andre kapiyaniy kiya pwan,
pe andre kanlahiy para kakahiy pwi masih.
22 Pe ngasa kuwah pe hu ndramat para taya hu ndramiy, hu ndramat para haliya hu pwenou pe hu para haliya ndrah
andre kanhilingi ngasa hu kiro kili wou paiwe pwi.
Pe hu ndramat para poya mbulen handra-handra,
ara andre kankahi hu konto kili wou paiwe pwi.
Pe ngasa pat namandran iya para raluluwi wit,
ara andre kanhilingiy kinto kili wou paiwe pwi.
23 Pe ngana sui sahin,
andre kiniyat kili wou paiwe pwi,
pe mbulu koyu pwesai para yesou ta kamai pe pihin,
ara andre kanhilingiy kinto kili wou paiwe pwi.
Pe hu ndramat para popehei ara hu ndramat mangalahu para kol pwan.
Pe iya kultuw para tayakau tam, apakarawani hu kol namandran masih.
24 Hu poropet pe hu ndramat haiyan ta Ngindrai, pe hu masih mepo kanitingundruhu huro kol pwan, ara ndreyehu ita ndritam.”