6
Noru Sipsip irapele hu mbura kunan
1 Pe uro nimnim iro mwonen Noru Sipsip irapele mbura kunan ihomu para hu mbura kunan manandrtoyoh. Pwen uhilingi kan hamou tahu kan mwalen mahaamou ara iwong pe mbulukoyun tehe palan ipa, “Asa!”
2 Pwen moro pakiya pwi, unime hos hamou pallen iho tine mbulmoro! Pe yiy para ngaplaniy, ara imbultuwe kei tapuiwe sih. Pe huiki kasapai sih iya kili yiy, pe ingap iyau tehe ndramat hamou kintamwaitini pahun, pe iro ramwaitini pahun manau.
3 Pe iro mwonen Noru Sipsip irapele mbura kunan luwoh, ara uhilingi kan mwalen iho mulan ipa, “Asa!”
4 Pwen hos hamou laman i, ara isa ngawan. Pe ndramat para ngaplaniy, ara pwoke iro kili yiy para kiwiri ndriya wayis kiya mawen kol pwan, pe para kimbusi hu ndramat katingundru hamou-hamou. Pe huiki semela pahun hapai namandran iya, iya kili yiy.
5 Pe iro mwonen Noru Sipsip irapele mbura kunan toyoh, ara uhilingi kan mwalen toyoh ipa, “Asa!” Pwen unime hos hamou lokuran iho mbulmoro. Pe yiy mepo para ngaplaniy, ara imbultuwe sikel malwoh iho ndrungak niman.
6 Pwen uhilingi nguluwa mbulukoyu hamou iro mwele hu kan mwalen mahaamou ara, ipa, “Kilo sih para wit, ara para kene mbulen para lang sih sesek, pe kilo toyoh para pali, ara para kene mbulen para lang sih sesek. Pe mbuna akapwalngani ndraikei pe wain!”
7 Pe iro mwonen Noru Sipsip irapele mbura kunan haahiu, ara uhilingi mbulukoyu kan mwalen haamou, ara ipa, “Asa!”
8 Pwen unime hos hamou salau iho mbulmoro, pe ndramat para ngaplaniy, ara ngalan Kimat, pe Ngare Hu Suw iho pakeh ndruwan. Pe kaniyki pwoke iro kili hilu iya kili hu ndramat para kol pwan haroh para katingundru hu ndramat kiya semela pahun niwen, pe song, pe nopwaran namandran, pe hu kan puyap para yangiy para hu katingundru hu ndramat.
9 Pe iro mwonen irapele mbura kunan yimah, ara unime mwoiwa hu ndramat mepo hupwotisingi lohongahu pe kanitingundruhu, ara huro pahandra pere tuntun, paratesah, tunan huhaiyani nongna Ngindrai pe tiyeyan.
10 Mwoiwa hu ndramat ara huyoh namandran iya hupa, “O Yapan, haiyan pe ndrokonan, mwalaihe andre yowu koro toro ko, pe aniyki hu ndramat para kol pwan koro tine nongan mapu ko, para hu kakuni kora ndreye yowu?”
11 Pwen hamou-hamou tahu, ara Ngindrai iyki koyau pallen iya kili hu. Pe hu pwai iya kili hu para hu koro longe hape na, kipoo ndromwoya hu ndramat para poya mbulya Ngindrai tehe yihu, iyapolo nali hu mepo hu pwotisingi lohongahu, ara andre katingundruhu tehe yihu ko yi, ara kihipwen.
12 Pwen uro nimnim pe Noru Sipsip ara irapele mbura kunan annoh, pe nunuw sih namandran iya, ara irayah. Pe mwandrai ara irapaiwani ilokuh tehe koyau lokuran mbusiy iyau yomwu sipsip kamai, pe walah sih seksek irapaiwaniy irayah laman tehe ndrai.
13 Pe hu piriy para yang ara huyos husa kol pwan, tehe hu mbuwa kei pik mambulen hakou ilon iro mwonen nohai imum pwokeyan pe ilohoyani hu.
14 Pe yang ara ises tehe puk maiye sih maiyaniy, pe hu ngondron masih pe hu mbuson, ara huret huya mawen ndrohonokuhu.
15 Pwen hu king para kol pwan, hu noru king kamai, hu ndramat huhohin ta hu ndram, hu ndramat menmenahu soyon, hu ndramat pwokeyan, hu ndramat para pwandrendres pe hu ndramat huro mwoimwoi, ara hu kohoni hu huya nondriya hu ngat sou, pe mwalinga hu pat namandran para hu ngondron.
16 Pe huyoh iya kili hu ngondron pe hu pat hupa, “Akayos kasa ndrita yowu pe akakulani yowu kiya mbulmara yiy mepo imira mipwan ndrohonoku pwanpwan ta king, pe iya ndrinalokuh ta Noru Sipsip!
17 Paratesah, lang namandran para ndrinalokuh ta hilu, ara kinsa, pe hiyeh ilahiy para kindrihisaniy eh?”