7
Hu Yisrayel mapusangat, mapuhaangui pe mahaapou (144,000) huwiri kinima Ngindrai
1 Iyamulan para ara, unime hu angelou mahaamou huro tine mbusungo kol pwan mahaasai, pe humbultuwe ndroiyi hu nohai mahaahin para pwan, pe hu penaniy para mbuna kimum kiya pwan, ndre ndras, ndre hu kei pwi.
2 Pwen unime angelou hamou i isarayah iyau te kup, pe imbultuwe mbura kunan ata Ngindrai mwalen. Pe iyoh namandran iya, iya kili hu angelou mahaamou mepo pwoke kinna kili hu para hu kaiki nopwaran kiya pwan pe ndras ipa,
3 “Wawu mbuna akaiki nopwaran kiya pwan, ndre ndras, ndre hu kei, kipoo yowu kaiki kinima Ngindrai kiya kene hu kombuye hu ndramat para poya mbulya Ngindrai torou.”
4 Pwen uhilingi ndromwoya hu ndramat mepo kaniyki kinima Ngindrai kinna kili hu, ara: mapusangat, mapuhaangui, pe mahaapou (144,000) para hu kamaye Yisrayel masih hawum-hawum.
5 Iyau kamaye Yutah, ara hu ndramat pusongui pe lupou (12,000) hu kantakinimahu,
pe iyau kamaye Rupen, ara hu kantakinimahu ndramat pusongui pe lupou,
pe iyau kamaye Kat, ara hu ndramat pusongui pe lupou,
6 pe iyau kamaye Aser, ara hu ndramat pusongui pe lupou,
pe iyau kamaye Naptali, ara hu ndramat pusongui pe lupou,
pe iyau kamaye Manasseh, ara hu ndramat pusongui pe lupou.
7 pe iyau kamaye Simeyon, ara hu ndramat pusongui pe lupou,
pe iyau kamaye Lepi, ara hu ndramat pusongui pe lupou, pe iyau kamaye Isakar ara hu ndramat pusongui pe lupou,
8 pe iyau kamaye Sepulun, ara hu ndramat pusongui pe lupou,
pe iyau kamaye Yosep, ara hu ndramat pusongui pe lupou,
pe iyau kamaye Penyamin, ara hu ndramat pusongui pe lupou hu kantakinimahu ta Ngindrai.
Hu ndramat soyo-soyon iya hu suluye hu iya koyau pallen
9 Pwen iyamulan para aliy, unimei iro mbulmoro ndrohos sih ta hu ndramat soyo-soyon iya, pe kinlahi hamou kindromwahu pwi. Hu ndramat ara, huyau hu kol namandran masih para kol pwan masih, pe huyau kili hu kamaye hu ndramat masih, pe hu ndramat, pe hu nongna kol masih pe huro tine mbulmara ndrohonoku pwanpwan ta king pe mbulmara Noru Sipsip. Pe hu suluye hu iya hu koyau pallen pe huro mbultuwe hu polopa pam iro nimahu.
10 Pe huyoh namandran iya iyau mbulukoyuhu huropa,
“Ngindrai torou pe Noru Sipsip opu, ara hilu ngara kasopwat, pe kawiri tou kamui.
yiy Ngindrai imirampwan ndrohonoku pwanpwan ta king.”
11 Pe hu angelou masih huro tine pe hu rakaiyani ndrohonoku pwanpwan ta king, pe iyasura hu pohon lungui pe haamou (24) iyasura hu kan mahaamou mwalen, ara hu tukuruhu pe kombuye hu iya pwan mbulmara ndrohonoku pwanpwan ta king, pe hu totohun iya kili Ngindrai,
12 hupa,
“Ndrokonan!
Pwesai pe kahari ngalan
lohongai waison pe tawuloh pe haiye ngalan
pwoke ihohin, pe pwoke masih
iya kili Ngindrai torou mepo andre kinto pe kinto.
Ndrokonan!”
13 Pwen pohon hamou, ara isok yo ipa, “Hu ndramat hu suluye hu iya hu koyau pallen ara, ara hiyeh hu, pe huyau aleheh?”
14 Pwen usomwi yiy upa, “Namandran, apahasaniy.” Pe ipwai ipa, “Yihu ara, ara hu mepo husa mawen nondriya nopwaran namandran iya. Pe hu hurahi koiwehu iya ndreye Noru Sipsip, pe imbusi koiwehu irayah pallen.
15 Pwen tora ko,
hu tora mbulmara ndrohonoku pwanpwan ta king Ngindrai.
Pe lang pe ping ngara hu kambulyani mbulya Ngindrai nondriya yumwa totohun namandran tan.
Pe yiy mepo itampwan ndrohonoku pwanpwan ta king, ara andre kiro sura hu pe kilohowihu.
16 Pe andre hu kanmundrui pwi
pe koyuhu andre kinsapak pwi,
pe ngana mwandrai ndre hapesah andre kintimwi hu pwi.
17 Paratesah, Noru Sipsip imira pupura ndrohonoku pwanpwan ta king, ara andre kirayah ndramat para pwokereya hu
pe kiluwani hu kaya hu ndrakoyou para taleh.
Pe Ngindrai andre kikuwe ndruimarahu masih kene kiyau.”