35
Ngurra Yayilurru Walykumunurriku Ngarama
1 Nyangka ngurra nyarra yayilurru ngaralanytja,
palunyanya pukurlarriku kapi purlkanya punkannyangka,
tjiinyamarntu yitjarnu purlkanya ngarama.
2 Yukiri purlkanya yirnuntjitarrartu ngarama.
Nyangka-ya yarnangu pirnilutarrartu-ya pukurltu mirrawarnima.
Palunyangka warta wirrmira tjultjulpa ngarama,
ngurra nyarra Lapananta tjultjulpa ngarapayi, palunyapirinypa.
Nyangka-ya mirrka purlkanya kaatanpangka kanyinma,
ngurra nyarra Kaamulta Tjarantatarrartu-ya mirrka purlkanya kanyira, palunyapirinypa.
Nyangka-ya pirnilu nintilu kulilku
tjiinya Mama Kuurrtu yayirninytjulu ngurra kutjupanu.
3-4 Nyangka-tjinguru-ya mara patalypa nyinarra puru murtitarrartu tiltirrmankupayi,
puru kurrurnpa ngurlunytju-ngurlunytju nyinarra.
Nyangka-tjananya watjala,
“Wiya, ngurlumaalpa-ya kurrurnpa rapa nyinama.
Mama Kuurrtu-tjananyanta pitjaku wankarura kanyinma.
Palunyalu-tjananya mirri pungkupayi pirninya ngaparrtjika pungku wiyalku.”
5 Nyangka-ya kurutjarra nyinapayilu kuru yarlarringkulalpi nyangama.
Puru-ya pinatjarra nyinapayilu pina yarlarringkulalpi kulinma.
6 Nyangka-ya wawanypa nyinapayi pirninya pakaralpi wuurlmara parrawirrtjanma.
Nyangka-ya purtu wangkapayi pirninya wangkatjarrarringkulalpi pukurlpa mirrama.
Nyangka kapi warla pilawana kukurrmanama.
7 Nyangka parna nyarra tjina kampapayinya
kutjuparrinyangka yirrala purlkanya ngarrima.
Nyangka parna nyarra kapimaalpa ngarapayinya
kutjuparringkulalpi kapi pirnitjarra ngarama.
Nyangka yirriya paka-pakaralpi parltju-parltjungka ngarama
ngurra nyarra ngupanu-ya kurranyulpi nyinapayingka.
8 Nyangka yiwarra walykumunu palunyangka ngarama.
Nyangka-ya tjapilku, “Mama Kuurrku yiwarra walykumununya.”
Nyangka-ya palyamunu palyalpayinya
yiwarra palunyangka kamu mapitjaku.
Tjiinya-ya tungun-tungunpa pirninya
yiwarra palunyawana mapitjakitjamunu.
9 Nyangka-ya layinpa ngupanu pirninyatarrartu
yiwarra palunyangka kamu mapitjaku.
Ngarna-ya yarnangu nyarra Mama Kuurrtu wankarnu
palunyanyakutju-ya yiwarra palunyangka mapitjaku.
10 Mapitjalayilku-ya turlku pukurltu yinkarrayilku parratjarrpaku Tjurutjamala.
Palunyalu-ya pukurlpa tirtu nyinama.
Tjiinya-ya tjuni kartakatikitjamunu
pukurlpa nyinaku nyinama.