42
Mama Kuurrku Waarka Palyalpayinya
1 Mama Kuurrtu watjarnu,
“Ngaanya-tju ngayuku waarka palyalpayinya.
Ngayulu-rnalu ngurrkarntanu wantingu.
Palunyalu-rna tirtu miranykanyira.
Palunyalu-rna tirtu pukurltu nyakula.
Kuurti Walykumununya-rnalu tjarrpatjunu wantingu.
Nyangka-tjananya yarnangu pirninya ngurra kutjupa-kutjupangkatja walykumunulu kanyinma.
Nyangka-ya tjukarurru nyinama.
2 Tjiinya wati palunyanya lingkirrpa mirrakitjamunu.
Palunyalu karnany-karnanytju watjalkitjamunu pirnilu-ya kuliltjaku.
3 Tjiinya nyaku-tjananya tjiinya-ya wanara punkaranyangka puntura watjalkitjamunu.
Palunyalu-tjananya nyaku kurltjirr-kurltjirrpa-ya nyinarranyangka payilkitjamunu wantiku.
Palunyalu-tjananya yarnangu pirninya walykumunulu kanyinma.
Nyangka-ya tjukarurru nyinama.
4 Tjiinya talypurringkula wantinytjamaaltu ngayuku waarka palyarayilku,
nyangka-ya manta lipingkatjanya tjukarurru nyinama.
Palunyatjanu-ya palunyaku wangkaku mukurringama.”
Palunyapirinypa Mama Kuurrtu watjarnu.