119
Mama Kuurrku Wangkaku-rna Mukulyanytju Nyinarra
97 Yuwa Mama, nyuntuku wangkaku-rna mukulyanytju nyinarra.
Wantinytjamaaltu-rna kulira-wanara tjirntu tjarrpatjura.
98 Nyuntuku wangka-rna pinangka kanyilpayi.
Palunyalanguru-rna nintipukarringu nyinarra,
nyarra yanyan-yanyanpa-ya nyinarra, palunyangka munkarra.
99 Nyuntuku wangka-rna tirtu kuliranytjatjanu
nintipukarringu nyinarra,
nyarra ngayunya-rniya nintipungkulanytja,
palunyangka munkarra.
100 Nyuntuku wangka-rna wangarnarralu kulira palyaranytja.
Palunyalanguru-rna nintipukarringu nyinarra,
tjiinya nyalpa pirningka munkarra.
101 Yiwarra lipinya-rna wantipayi
tjiinya nyuntuku wangka wangarnarralu kulira palyalkitjalu.
102 Nyuntuku wangka-rna wantikitjamunu.
Nyuntulumarntu-rnin nintipungkulanyangka.
103 Nyuntuku wangka pukarapirinypa
tjiinya yirliltungka munkarra.
104 Nyuntuku wangka kuliranytjatjanu-rna
nintipukarringu nyinarra.
Palunyalanguru-rna yiwarra nyarra lipiku yanyan-yanyanpa nyinarra.
Mama Kuurrku Wangka Tilipirinypa
105 Yuwa Mama, nyuntuku wangka tilipirinypa
tjiinya yiwarra-tju pirntaltjingara kanyilpayi.
Nyuntuku wangka pirntal-pirntalpirinypa.
Nyangka-rna palunyatjarra tjukarurru mapitjalayilku parrapitjaku.
106 Nyuntuku wangka tjukarurru mularrpa ngarala.
Nyangka-rnanta watjarnu wantingu wangka palunyanya
wangarnarralu kulira palyalkitjalu.
107 Wiya, yarnangu pirnilu-rniya parrawanarayirni mirri pungkula tjunkukitjalu.
Palunyakutarra-rni wankarura kanyila,
tjiinya-rnin watjarnu wantitjalu.
108 Yuwa Mama, pukurlarriku-munta-tjun
tjiinya-rnanta marninypungkulanyangka?
Pukurlarrirralpi-rni nyuntuku wangka tirtu nintipungama.
109 Wiya, tirtu-rniya parrawanarayirni pungkula mirri tjunkukitjalu.
Nyangka nyuntuku wangkaku-rna watarrkurrikitjamunu.
110 Nyangka yarnangu palyamunu pirninya-ya mukurringkula piwarrtjingalkitjalu-rniya.
Parturtu-rna nyuntuku wangka wantikitjamunu.
111 Yuwa, nyuntulu-rnin wangka walykumunu nintirnu.
Nyangka-rnanku tirtu kanyilku kanyinma.
Tjiinya-rni wangka palunyalu tirtu pukurlmara kanyira.
112 Nyangka-rna wangarnarralu kulira palyarayilku ma-mirrirriku.