136
Yinkarra Mama Kuurrnga Marninypungkulatjaku
1 Mama Kuurrnga-la marninypungama,
tjiinyamarntu walykumunu mularrpa.
Palunyalu-lanya ngarltunytjulu tirtu kanyira.
2 Mama Kuurrnga-la marninypungama,
tjukurrtatja pirningka munkarra nyinarranyangka.
Palunyalu-lanya ngarltunytjulu tirtu kanyira.
3 Mama Kuurrnga-la marninypungama,
puurrpa pirningka munkarra nyinarranyangka.
Palunyalu-lanya ngarltunytjulu tirtu kanyira.
4 Kutju-palunyalu yayirninytjulu kutjupa-kutjupa palyalpayi.
Palunyalu-lanya ngarltunytjulu tirtu kanyira.
5 Mama Kuurrtu ninti purlkanyalu yilkari palyarnu.
Palunyalu-lanya ngarltunytjulu tirtu kanyira.
6 Palunyalu manta parratjunu kapi yirralawanalu.
Palunyalu-lanya ngarltunytjulu tirtu kanyira.
7 Palunyalu tjirntu puru kirnara palyarnu.
Palunyalu-lanya ngarltunytjulu tirtu kanyira.
8 Tjiinya tjirntu palyarnu karlarlara kanyiratjaku.
Palunyalu-lanya ngarltunytjulu tirtu kanyira.
9 Puru kirnara pirntirritarrartu palyarnu
mungangka yutira kanyiratjaku.
Palunyalu-lanya ngarltunytjulu tirtu kanyira.
10-16 Mama Kuurrtu-tjananya Yitjurayilku tjamupirti
yayirninytjulu ngurra nyarra Yiitjipulanguru pakaltjingara katingu.
Palunyalu-lanya ngarltunytjulu tirtu kanyira.
17-20 Mama Kuurrtu puurrpa warrmarlatjarra pirninya
pungkula-wanarayirnu wiyarnu.
Palunyalu-lanya ngarltunytjulu tirtu kanyira.
21-22 Palunyalu Yitjurayilku tjamupirti-tjananya katingu
tjarrpatjunu ngurra kalkurnu wantitjala.
Palunyalu-lanya ngarltunytjulu tirtu kanyira.
23-24 Nyangka yanyan-yanyanpa nyinapayilu-lanya pika pungkulanyangka
Mama Kuurrtu-lanya nyakulalpi paalytjunu kanyirnu.
Palunyalu-lanya ngarltunytjulu tirtu kanyira.
25 Yuwa, Mama Kuurrtu yarnangu-lanya
puru yanamulpa pirninya parltjara kanyilpayi.
Palunyalu-lanya ngarltunytjulu tirtu kanyira.
26 Marninypungama-la Mama Kuurrnga
yilkaringka nyinarranytjanya.
Palunyalu-lanya ngarltunytjulu tirtu kanyira.