10
Baŋangula Abamooli
1 Adoni Zedeki habaha wʼe Yerusaalemu ngʼaŋulira ngʼolu Yoswa gaŋamba ehibuga Ayi gahisihiirisa era gahola habaha wa Ayi ngʼolu gahola Yeriko ni habaha waawe. Nga nindi aŋulira ati Abagibbyoni baholire endagaano nʼAbayisirayiri era bali bulala.
2 Adoni Zedeki nʼabaatu babe esisi yabaŋamba olwohuba Gibbyoni hyali hibuga hyʼamaani era hyʼomugaso. Mu bibuga omwali owahabaha, Gibbyoni hyali hibuga hibbala ni hihira Ayi era abasirikale baayo baali basooli abʼamaani.
3 Olwʼehyo, Adoni Zedeki habaha wa Yerusaalemu gasunga obuyeedi ohuŋwa ewa Hohamu habaha wʼe Kebbulooni ni Piramu habaha wʼe Yarumusi ni Yafiya habaha wʼe Lakisi ni Debbiri habaha wʼe Egulooni ati,
4 “Muuje munjeede hulumbe ehibuga hyʼe Gibbyoni olwohuba abaatu baamo baholire endagaano ni Yoswa nʼAbayisirayiri.”
5 Ngʼaŋo abahabaha abo abataanu abʼAbamooli, ko nje habaha wʼe Yerusaalemu nowe Kebbulooni nowe Yarumusi nowe Lakisi nowe Egulooni nga bagaata ŋalala amaŋe gaawe nga beswanigirisa ehibuga hyʼe Gibbyoni bahigulaho olutalo.
6 Ngʼaŋo abaatu bʼe Gibbyoni baŋeeresa Yoswa obuhwenda mu kambi e Gilugaali eyi gaali baati, “Otatuleha efe abeedu babo. Nja mangu otununule! Tuyeede olwohuba abahabaha bosibosi abʼAbamooli ohuŋwa mu hyalo hyʼesozi bataaye ŋalala amaŋe gaawe era batulumbire.”
7 Olwʼehyo Yoswa genyoheramo ohuŋwa e Gilugaali nʼeŋe lirye lyosiryosi nga pomuli abasirikale abʼamaani.
8 Nga Musengwa aloma Yoswa ati, “Otabatya, kenire ohubaŋaayo mu mihono jijo. Siŋaja hubaŋo wayire mulala aja hu husobola.”
9 Nga Yoswa agenda owiire wosiwosi owo nʼeŋe lirye ohuŋwa e Gilugaali ngʼasinduhirisa Abamooli.
10 Nga Musengwa atabujula Abamooli, Abayisirayiri ni babona. Nga Yoswa nʼAbayisirayiri babasihiirihisa erala e Gibbyoni. Abayisirayiri baŋiima abaali ni basigaaye hu ngira eyitiina Bbesi Horoni era babeetira mu hibuga Azeka ni Makeda.
11 Ni baali ni baduluma Abayisirayiri ohwihirira hu ngira eyiŋwa e Bbesi Horoni ni yitiina Azeka, nga Musengwa akukumusa agabaale agʼefula gabahubba era bangi abafa nʼohuhiraho ababeeta nʼepiima.
12 Hu ludaalo olu Musengwa gaŋayo Abamooli eyiri Abayisirayiri, Yoswa galomba Musengwa Abayisirayiri ni baŋulira ati,
“Ewe eryuba yemeerera ŋamugulu wa Gibbyoni otatenga,
era ewe omwesi yemeerera ŋamugulu wʼehiiho hyʼe Ayijalooni.”
13 Ngʼeryuba lyemeerera,
nʼomwesi nga gwetegemeha,
ohwola olu gwanga lya Yisirayiri lyahena ohuŋangula abasigu balyo
ngʼolu babiŋandiiha mu hitabo hya Yasari.
Eryuba lyemeerera ŋagati wʼebbanga lyahena huupi oludaalo lulamba ko lyagwa mu maaji.
14 Siŋabangaŋo ludaalo hyʼolwo enyuma eyo era siŋalibaŋo ludaalo hyʼolwo olu Musengwa gaŋulira ohusaba hwʼomuutu. Mu butuufu oweene Musengwa gasoolerera Yisirayiri!
15 Ebyo ni byaŋwa, nga Yoswa nʼAbayisirayiri bosibosi bagamayo mu kambi e Gilugaali.
Yoswa geeta abahabaha abataanu abʼAbamooli
16 Abahabaha abataanu abʼAbamooli baali badulumire ni behwehire mu pungulu yʼe Makeda.
17 Ni balomera Yoswa baati abahabaha abataanu babageene ni behwehire mu pungulu e Makeda,
18 ngʼabaloma ati, “Muŋiringisye agabaale mwigale omulyango gwʼepungulu era muhene muteŋo nʼabahuumi.
19 Aye enywe mutasigala aŋo, mweyongere ohulumba abalabe benywe ni mubaŋwera enyuma era mutabaganya hwingira mu bibuga byawe olwohuba Musengwa Hatonda wenywe abataaye mu mihono jenywe.”
20 Yoswa nʼAbayisirayiri baŋangulira erala abaatu abo era batono bugali abeŋunula boola mu bibuga byawe ebi batongoleraho olukomera.
21 Eŋe lyosiryosi lyagobola miyaaya mu kambi e Makeda eyi Yoswa gaali. Era ohuŋwa hulwo ŋaŋuma muutu wayire mulala owagobolayo ohwenyanyira hu Bayisirayiri.
22 Nga Yoswa aloma abasirikale babe ati, “Ŋaahani muŋigule ogubaale ŋa mulyango gwʼepungulu muleete abahabaha abataano abo ŋano.”
23 Nga batusa abahabaha abo abataanu mu pungulu, habaha wʼe Yerusaalemu nowe Kebbulooni nowe Yarumusi nowe Lakisi ko nowe Egulooni.
24 Yoswa ni gahena ohulanga abasooli Abayisirayiri bosibosi, ngʼalambaasa abahabaha bala abataanu, ahena aloma abaduumisi aba gatiina ni nabo ati, “Muuje ŋano mute amagulu genywe mu mamiro gʼabahabaha bano.” Nga baŋwayo babataho amagulu mu mamiro.
25 Nga Yoswa abaloma ati, “Mutatya era mutaŋwamo maani. Mugume emyoyo era mutatya olwohuba Musengwa aja huhola atyo abalabe benywe bosibosi aba muja husoola ni nabo.”
26 Ngʼaŋo Yoswa geeta abahabaha abo abataanu ngʼahena alagira babaŋaniha hu misaala ohwola egulo.
27 Eryuba aŋa ligwira mu maaji, Yoswa gaŋa ehiragiro baŋanula emirambo jaawe hu misaala bajidanya mu pungulu omu babatuuhira ni behwehire. Hu mulyango gwʼepungulu eyo, begaliraŋo agabaale era gahiiriho nʼohwola olwaleero luno.
Yoswa abbulyaga ebibuga ebyomu mehiriro
28 Hu ludaalo olwo Yoswa gaŋamba ehibuga Makeda. Nga geeta habaha waamo nʼabaatu bosibosi abaali mu hibuga ehyo, ndalehaŋo wayire mulala ngʼolu gahola habaha wʼe Yeriko.
29 Ni bahena ohusihiirisa Makeda, nga Yoswa nʼAbayisirayiri bosibosi balumba ehibuga Libbuna.
30 Nga nindi Musengwa aŋa Abayisirayiri ehibuga hya Libbuna ehyo hyosi bahiŋangula. Ŋaŋuma eyi galeha nʼali mulamu. Era nga beeta habaha nʼabaatu bosibosi ngʼolu gahola habaha wʼe Yeriko.
31 Ni baahena ehibuga ehyo nga Yoswa nʼAbayisirayiri bosibosi baŋwa e Libbuna batiina mu hibuga Lakisi bahyeswanigirisa era bahiwaagala.
32 Nga Musengwa aŋa Abayisirayiri ehibuga hyʼe Lakisi era nga Yoswa geeta abaatu bosibosi ahiŋangula hu ludaalo olwohubiri ngʼolu baahola e Libbuna.
33 Nga habaha Horamu owʼe Gezeri atiina ohuyeedaho Lakisi aye Yoswa gamusihiirisa nʼabasirikale babe ohwola olu ŋaŋuma owasigalaŋo.
34 Nga Yoswa nʼAbayisirayiri bosibosi baŋwa e Lakisi, batiina mu hibuga hyʼe Egulooni bahyeswanigirisa, nga bahiwaagala.
35 Bahiŋamba hu ludaalo olwene olwo nga beeta abaatu bosibosi ngʼolu bahola e Lakisi.
36 Yoswa nʼAbayisirayiri baniinaniina ohuŋwa e Egulooni batiina balumba ehibuga hyʼe Kebbulooni.
37 Nga bahiŋamba era nga beeta habaha nʼabaatu bosibosi abaali ni bahimenyamo ko nʼabaatu bomu byalo ebyʼohumulirano. Ŋaŋuma oyu baaleha nʼahiŋeera. Gasihiirisa hiisi muutu ngʼolu basihiirihisa ehibuga hyʼe Egulooni.
38 Nga Yoswa nʼAbayisirayiri bosibosi bacuuhira ehibuga Debbiri bahiwaagala.
39 Gaŋamba ehibuga ni habaha waawe nʼebyalo ebiririheene nga babeeta. Basihiirihisa erala hiisi muutu. Era ŋaŋuma kadi mulala oyu baleha nʼahiŋeera. Yoswa gahola abaatu bomu hibuga hyʼe Debbiri ni habaha waawe ngʼolu gahola ehibuga hyʼe Libbuna ni Kebbulooni.
40 Yoswa gaŋangula amatwale gosigosi nga pomuli nʼehyalo ehyʼesozi ni Negevu nʼabomu mehiriro gʼebugwalyuba nʼabahabaha abandi bosibosi. Ŋaŋuma oyu galeha nʼahiŋeera. Gasihiirihisa erala bosibosi ngʼolu Musengwa Hatonda wa Yisirayiri gaali nʼalagiiye.
41 Yoswa gababbulyaga ohuŋwera erala e Kadesi Bbaruneya ohwola e Gaaza, nʼohuŋwa e Goseni ohwolera erala e Gibbyoni.
42 Yoswa gabbulyaga abahabaha abo bosibosi nʼebyalo byawe omulundi mulala olwohuba Musengwa Hatonda wa Yisirayiri gabasoolerera.
43 Ebyo ni byaŋwa, nga Yoswa gagamayo nʼAbayisirayiri bosibosi mu kambi e Gilugaali.