11
Yoswa aŋangula Yabbini nʼabawagizi babe
1 Olwola, nga Yabbini habaha wa Hazori aŋulira ngʼolu Abayisirayiri baŋanguuye amatwale ago gosigosi. Ngʼaŋo atumisa Yobbabbu habaha wʼe Madoni ni habaha wʼe Simurooni ko ni habaha owe Akusafu,
2 nʼabahabaha abomu maniino mu hyalo ehyʼesozi, nʼabahabaha bomu hiiho hyʼe Yoludaani mu mehiriro gʼenyanja Galilaaya, nʼabahabaha bomu meeho gʼolusozi ebugwalyuba ko nʼabahabaha bomu Naposi Doori ebugwalyuba ohutiina bamuyeede ohusoosa Abayisirayiri.
3 Era gatumisa nʼabahabaha bomu Kanani abʼebuŋwalyuba nʼabebugwalyuba nʼabahabaha bʼAbamooli nʼAbahiiti nʼAbapereezi nʼAbabayebbusi mu hyalo hyʼesozi era nʼAbahiivi mu hyalo hyʼe Mizupa mu meenamo gʼolusozi Herumooni.
4 Nga baŋwayo nʼamaŋe gaawe gosigosi nʼembalaasi enyene enyingi nʼebigaali era abasirikale baali babitiirifu ni batabaliha hyʼomujehe hwigobo lyʼenyanja.
5 Abahabaha abo bosibosi baŋimba ŋalala amaŋe gaawe nga bata ekambi ŋʼamaaji gʼe Meromu ohusoosa Yisirayiri.
6 Nga Musengwa aloma Yoswa ati, “Otabatya, olwohuba olwejo esaawa hyʼejino, nja hubaŋaayo bosibosi eyiri Yisirayiri bafe. Mutemanga embalaasi jaawe mwajiremasa era mwahena mwohya nʼebigaali byawe.”
7 Ngʼaŋo Yoswa nʼeŋe lirye lyosiryosi batiina babagwaho ni batamanyire ŋʼamaaji gʼe Meromu
8 era Musengwa gabaŋayo mu ngalo jʼAbayisirayiri. Babaŋangula bababbingirira bababisya e Misurefoosi Mayimu mbabo e Sidoni nga baboosa mu hiiho hyʼebuŋwalyuba wʼe Mizupa. Ŋaŋuma owaluŋona. Oluvanyuma lwʼolutalo ohuŋwa Abayisirayiri bagamayo nga bohya ebigaali byʼabalabe baawe.
9 Yoswa gabahola ngʼolu Musengwa gamulagira, gaatema amagulu gʼembalaasi nga goohya nʼebigaali byawe.
10 Mu hiseera ehyo, Yoswa gagobolayo ngʼawaagala Hazori nga geeta habaha waayo. Habaha wʼe Hazori njʼowaali omutangirisi wa bahabaha bala bosibosi abeŋimba ohusoosa Yisirayiri.
11 Abayisirayiri basihiirihisa erala abaatu bosibosi abaali ni bamenya mu hibuga Hazori, ŋaŋuma wayire mulala oyu baaleha era nga Yoswa goohya ehibuga ehyo.
12 Yoswa gaŋamba ebibuga ebyo byosibyosi nʼabahabaha baawe ngʼabeeta ngʼolu Musa omuŋeeresa wa Musengwa galagira.
13 Aye Abayisirayiri sibasihiirisa bibuga ebibatongola hu sozi wayire hirala ohutusaho ehibuga hyʼe Hazori ehi Yoswa goohya omuliro.
14 Abayisirayiri baŋira ebyʼomunyago byosibyosi nʼebyayo ohuŋwa mu bibuga ebyo. Aye nga beeta hiisi muutu ndibaleheŋo wayire mulala.
15 Ngʼolu Musengwa galagira Musa omuŋeeresa wuwe, Musa yeesi galaabbira Yoswa era nga Yoswa yeesi ahola ngʼolu bamuloma. Gahola hiisi hiitu ngʼolu Musengwa galagira Musa.
Ehyalo ehi Yoswa gaŋamba
16 Kale Yoswa nʼeŋe lirye baŋamba ehyalo hya Yisirayiri hyosihyosi ehyʼesozi ohwola mu mehiriro. Baŋamba etwale lya Goseni lyosiryosi nʼehyalo ehyomu lulafu ko nomu hiiho hyʼe Yoludaani,
17 ohuŋwa hu lusozi Halaki ohutiina wehoonya e Seyiri ohwola e Bbaali Gaadi mu hiiho hyʼe Lebbanooni ŋaasi wʼolusozi Herumooni. Yoswa gaŋamba abahabaha baawe bosibosi ngʼabeeta.
18 Yoswa gahena ehiseera hireeŋi nʼasoola nʼabahabaha abo bosibosi.
19 Ohutusaho Abahiivi abaali ni bamenya e Gibbyoni, eŋuma hibuga ehindi wayire hirala ehyahola endagaano ohuba bulala nʼAbayisirayiri. Ebibuga ebindi byosibyosi Abayisirayiri babisoosa, babiŋangula.
20 Musengwa omwene njʼowahahanyasa emyoyo jaawe bahegula hu Bayisirayiri olutalo ko gahabasihiirihisa erala ni ŋaŋuma hubaŋambira ehisa ngʼolu Musengwa galagira Musa.
21 Mu hiseera ehyo, Yoswa nʼeŋe lirye batiina basihiirisa Abanaki abaali ni bamenya mu hibuga Kebbulooni nomu Debbiri nomu Anabbu ko nomu twale lyʼabehiha hya Yuda nomu Yisirayiri ebyalo ebyʼesozi. Yoswa gabasihiirihisa erala bosibosi ko nʼebibuga byawe.
22 Mu twale lya Yisirayiri ŋaŋuma Munaki wayire mulala owasigala ohutusaho mu Gaaza nomu Gaasi ko nomu Asidodi.
23 Yoswa gawamba ehyalo ehyo hyosihyosi ngʼolu Musengwa galoma Musa. Nga Yoswa aŋa Abayisirayiri ehyalo ehyo ohuba muŋuluko gwawe nʼatiinira hu biha byawe. Ngʼaŋo etalo jihoma Abayisirayiri bamenya miyaaya.