12
1 Omuutu afugiirira ohumuŋa amagesi aba genda ohumanya
aye oyo atenda humunenya nagodeeme aba muŋubeebe.
2 Omuutu omulaŋi asuna obuhoda ohuŋwa eyiri Musengwa
aye Musengwa asalira abakuyikuyi omusango.
3 Ohuba omuhosi wʼebibi sihireeta obuhuumi hu bulamu wʼomuutu
aye eŋuma aŋanga ohugengula omugwalaafu.
4 Omuhasi omwegenderesa agima abaatu baŋa wamwe eŋono
aye omuhasi aŋuma esambo aba oti bulwaye obuleetera amagumba ga wamwe ohuseseŋa.
5 Etegeha jʼabaatu abagwalaafu jiba jʼamazima
aye amagesi agʼabahosi bʼebibi gabudulingi.
6 Endoma yʼabahosi bʼebibi yahujuha mafugi
aye endoma yʼabagwalaafu yibanunula.
7 Abahosi bʼebibi basihiiriha bosibosi
aye olulyo lwʼabagwalaafu nirwo siruŋwaŋo.
8 Singa oba mugesi, abaatu baja huhusiima
aye onaba muŋubeebe, balihunyooma.
9 Hiraŋi abaatu ohuhunyooma ne waholerera obulamu wuwo ohuhira olu weranga ohuba omwegingihiriri
aye nʼohaya nʼehyohulya.
10 Abaatu abalaŋi balabirira ebyayo byawe
aye abahosi bʼebibi sibafayo hu byawe.
11 Omuutu ahola emirimo nʼamaani asuna emere nyingi
aye oyo ahenera ebiseera hu biitu ebitagasa muŋubeebe.
12 Abahosi bʼebibi baŋemba hu huhola bibi
aye abagwalaafu sibatangatanga.
13 Obudulingi wʼababi wubaŋambirayo abeene
aye omugwalaafu aŋunuha ebigosi.
14 Omuutu asuna omuhemba ohwema hubi aloma nʼebi ahola
hiisi muutu aja husuna ehimusaanira.
15 Omuŋubeebe aŋeega mbo ati hiisi ehi ahola hiraŋi
aye omugesi aŋuliirisa ebi bamulomera.
16 Omuŋubeebe saalwa hulaga busungu wuwe
aye omuutu omutegeefu geŋomeha nʼolu bamuduha.
17 Omujulizi owʼamazima aŋa obujulizi obutuufu
aye abadulingi baloma byakalebule.
18 Ebibono abaatu abaŋubeebe ebi beromboja bifumita bugali hyʼepiima
aye ebyʼamagesi bireeta ohuŋona.
19 Amazima sigaŋwaŋo emirembe nʼemirembe
aye obudulingi wa haseera buseera.
20 Abahosi bʼebibi bejuuye budulingi mu myoyo
aye abo abateesa ebiraŋi baleeta esangaalo.
21 Eŋuma habi ahoola hu mugwalaafu
aye ebigosi bingi bigwira abahosi bʼebibi.
22 Musengwa acaawira erala abaloma ebyʼobudulingi
aye asangaalira abo abaloma amazima.
23 Omuutu omutegeefu sigehenamo ebi amanyire
aye abaŋubeebe berebula.
24 Ohuhola nʼamaani hihuleetera ohuŋuga
aye obugayaafu buhuleetera ohuba omwidu.
25 Omwoyo omuti guhuhenaho esangaalo
aye ebibono ebiraŋi bigobosamo amaani.
26 Omuutu omugwalaafu aluŋamya meriiwe
aye amagira gʼabahosi bʼebibi gabaŋira mu hubbaama.
27 Sosuna ehi wenda onaba nʼoli mudoto
aye atamba nʼamaani aligwa mu biitu.
28 Engira yʼomugwalaafu yimuleetera ohuba nʼobulamu
era oluguudo olwo luli ŋaleeŋi nʼohufa.