11
1 Musengwa acaawa abatambisa ebipimo ebicaamu
aye asiima ebipimo ebituufu.
2 Ohwepaahapaaha huleeta ohuswala
aye ohweŋomeha hihufuula mugesi.
3 Onahola ebiraŋi amazima gaja huhuluŋamya
aye abatali besigwa basihiiriha.
4 Obuŋinda buŋuma mugaso hu ludaalo olwʼohusaliraho emisango
aye ohuhola ebiruŋamu hiri huŋonia ohufa.
5 Obugwalaafu wʼomuutu bumuleetera ohumulaga ehyʼohuhola
aye ebikolwa byʼabahosi bʼebibi bibaleetera ohusihiiriha.
6 Obuluŋamu wʼabagwalaafu bubanunula
aye ohwegomba ohubi ohwabatali besigwa hubafuuhira mutego.
7 Esuubi lyʼomuhosi wʼebibi anafa lisihiiriha.
Era ebi galubiriranga ohuhola olwʼamaani gage byosi bihoma.
8 Omuutu omugwalaafu aŋunuha ebigosi
aye omuhosi wʼebibi abigwamo.
9 Omuutu atali mwesigwa alimirira muliranwawe
aye amagesi gʼomugwalaafu gamuŋonia.
10 Omuutu omugwalaafu anasuna ekabi
abaatu mu hibuga basangaala
aye omuhosi wʼebibi anafa basaŋalya.
11 Olwʼekabi jʼomugwalaafu ehibuga hifuuha hyʼeŋono
aye ebibono byʼabahosi bʼebibi bihireetera ohusihiiriha.
12 Hyabuŋubeebe ohunyooma abahyo
aye omuutu ategeera geŋolerera.
13 Omuutu owʼolugambo sahuuma byama
aye omwesigwa abihuuma.
14 Ŋanaŋumaŋo omuutu owʼamagesi aluŋamya egwanga hirireetera ohugwa
aye aŋali abaŋi bʼamagesi abangi, ŋabaaŋo obuŋangusi.
15 Oyo ateeraŋo oweŋola oyu atamanyire omusingo, himuŋweramo ohubonaabona
aye ohutabyeyingisamo njʼehisinga.
16 Omuhasi owʼehyere bamuŋa eŋono
aye abaatu abaŋuma sambo basuna obuŋinda woŋene.
17 Omuutu owʼehisa aganyulwamo
aye omuhambwe omwene gereetera ebigosi.
18 Omuhosi wʼebibi asuna ebiitu ebyʼobudulingi
aye onahola ebiruŋamu oja husuna ebiitu ebyʼamazima.
19 Omuutu ahola ebiraŋi asuna obulamu
aye ahola ebibi himuŋweramo ohufa.
20 Musengwa acaawa abʼemyoyo ejekirihindi
aye asangaalira abo abahola ebituufu.
21 Obutuufu aŋaŋuma hubuusabuusa baligudya abahosi bʼebibi,
aye abaatu abagwalaafu baja hwebeera bulaŋi.
22 Omuhasi omuŋoono aŋuma episa
ali hyʼepeta eyʼezaabbu mu suulu yʼembiiji.
23 Ebiitu ebi bagwalaafu baŋeegaho biba biraŋi
aye ebi bahosi bʼebibi basuubira ohuhola bireeta obugosi.
24 Ŋaliŋo aŋamba ebbeesa gayeeda abaatu era geyongera ohuba muŋinda
aye nakumuumu geyongera hwafuŋala.
25 Omuutu omugabi aja husuna obuŋinda,
oyo ayeeda abahye yeesi baja humuyeeda.
26 Omuutu ahweha emere nʼahuuma ebbeeyi ohweyongera, bamulomaho wubi
aye oyo abagusa bamuloma biraŋi byereere.
27 Ebigendererwa bibyo binaba biraŋi baja huhusiima
aye ebigosi bija hugwira oyo abyendula.
28 Oyo owesiga obuŋinda wuwe aligwa
aye omuutu ahola ebiruŋamu aja huhulahulana hyʼamahoose gʼomusaala.
29 Oyo aleetera amago gaawe ebigosi alihaya ehyʼohusikira
era omuŋubeebe aja hufuuha mwidu wʼoyo omugesi.
30 Ebiitu ebi mugwalaafu ahola musaala oguleeta obulamu
era oyo ali nʼesambo endaŋi abandi bajironderera.
31 Obanga omugwalaafu bamuŋa omuhemba gugwe hu hyalo huno,
ne olwo hiriba hiitye eyiri abatamanyire Hatonda ko nʼabahosi bʼebibi?