10
Engero ja Sulemaani
1 Engero ja Sulemaani:
Omwana omugesi asangaasa semwana
aye omuŋubeebe anakuŋasa nyina.
2 Obuŋinda obu osuna mu bukupania buŋuma ehi bugasa
aye ohuba owʼamazima hihuleetera ohuwangaala.
3 Musengwa saleeha mugwalaafu ohuhaya emere
aye aloberesa abahosi bʼebibi ohusuna ebi balubirira.
4 Ohulera engalo hireeta obugadi
aye ohutamba nʼamaani hireeta obuŋinda.
5 Omuutu awunga emere mu hiseera ehyʼegesa aba mugesi
aye oyo aba mu hufuluta mu hiseera ehyʼohuhungula aŋambya esoni.
6 Omugwalaafu aja husuna ekabi
aye abahosi bʼebibi baloma ni bawihirira hu bibi ebi bahola.
7 Omugwalaafu bamuhebulira ngʼomuutu owʼekabi
aye omuhosi wʼebibi baja humwibirira mangu.
8 Omuutu omutegeefu afugiirira amagesi aga bamuŋa
aye omuŋubeebe owerohopa, gesihiirisa omwene.
9 Omuutu owebisya obulaŋi abaaŋo neŋuma ehimuluma hu mwoyo
aye oyo agendera mu ngira engodami, sibalwa humuŋambya.
10 Omuutu ataloma mazima aleeta ebigosi
aye oyo aloma nʼatabbumbirya aleeta emiyaaya.
11 Ebibono byʼomugwalaafu biri hyʼesulo ejireeta obulamu
aye abahosi bʼebibi baloma ni bawihirira hu bibi ebi bahola.
12 Obucaayi buleeta ohuduhana
aye ohwenda huleeta ohusoniŋa ebibi byosibyosi.
13 Omuutu omutegeefu aloma ebirimo amagesi
aye omuŋubeebe asaanamo endabusi.
14 Abaatu abagesi benda ohumanya
aye endoma yʼomuŋubeebe yireeta ohusihiiriha.
15 Obuŋinda wʼomuutu buli hyʼehiteepe ehigumu ehyeswanigirihiise ehibuga
aye obugadi buleetera omugadi ohusihiiriha.
16 Omugwalaafu bamuŋa omuhemba ogwʼohuwangaala
aye enyingisa yʼomuhosi wʼebibi yimuleetera ohweyongera ohuhola ebibi.
17 Oyo afugiirira ebi bamusomesa ahuuma obulamu wuwe
aye oyo agaana ohumunenya, abbaamya abandi.
18 Omuutu ahweha obucaayi wuwe, aba mudulingi
era ni nooyo ageya abahye aba muŋubeebe.
19 Mu hwelomaaja obugali mubamo ohubbenga
aye oyo ahuuma olulimi lulwe mugesi.
20 Ebibono byʼomuutu omugwalaafu biri hyʼefeeza esengeje
aye ebi omuhosi wʼebibi aŋeega mu mwoyo biŋuma mugaso.
21 Ebibono byʼomuutu omugwalaafu bigasa bangi
aye ehiita abaŋubeebe hutamanya husalaŋo bulaŋi.
22 Ekabi eji Musengwa aŋa jireeta obuŋinda
era sijireeta naku.
23 Omuŋubeebe anyumirwa ohuhola ebibi
aye omuutu omugesi anyumirwa bugali ohwega.
24 Ehi omuhosi wʼebibi atya hija humwolaho
aye ebi omugwalaafu asuubira aja hubisuna.
25 Abahosi bʼebibi basihiiriha hibuyaga ni gaaja
aye abagwalaafu baba bagumu emirembe nʼemirembe.
26 Sotumanga omuutu omudoto,
aja huhulumya hyʼomwenge endota hu meeno oba eriisi mu moni.
27 Ohutya Musengwa hireeta ohuwangaala
aye abahosi bʼebibi sibawangaala.
28 Ebi bagwalaafu basuubira bibaleetera esangaalo
aye ebi bahosi bʼebibi basuubira sibyolerera.
29 Musengwa ahuuma abaatu abʼamazima
aye asihiirisa abahola ebibi.
30 Eŋuma ehiritiisatiisa abagwalaafu
aye abahosi bʼebibi sibalimenya hu hyalo huno.
31 Ebi abagwalaafu baloma byʼamagesi
aye baja huŋoleresa abadulingi.
32 Abagwalaafu bamanya ebi basaana ohuloma
aye abahosi bʼebibi bamanyire bigodami byereere.