9
Embaga nʼobuŋubeebe
1 Amagesi gatongooye enyumba yago
era gayiholeyeeho nʼesiiro musanvu.
2 Gategehire enyama yaago
nʼebyohunywa era gategehire emeeza eyʼohugabuliraho.
3 Gatumire abaŋeeresa baago abahasi ohwanirisa abaatu bosibosi.
Galanga ni geemire mu hifo ehyegingihiriri ŋamugulu mu hibuga gaati,
4 “Leha oyo atamanyire gaaje ewange.”
Era ehyo ahiroma abo abaŋubeebe ati,
5 “Muuje mulye emere
era munywe omwenge gwʼemizabbibbu.
6 Lehaŋo obuŋubeebe buwo ko wahaba mulamu
ogendere mu hutegeera.”
7 Hiisi anenya omuutu omunyoomi bamuduha humuduha,
oyo aloma hu muhosi wʼebibi njʼakosewa.
8 Sogesyangaho huluŋamya omuutu omunyoomi
olwohuba aja huhucaawa olwʼehyo.
Ne singa obuulirira omugesi aja huhwenda.
9 Laabbira omugesi, aja hweyongera ohuba mugesi
somesa omuutu omugwalaafu aja hweyongera ohumanya.
10 Ohutya Musengwa njʼetandiha yʼamagesi
era hyabutegeefu ohumanya Oyo Omwawufu.
11 Hiri hiityo olwohuba amagesi
gaja huhuleetera ohuwangaala emyaha emyene emingi.
12 Ohuba nʼamagesi hihugasa ndiiwe wamwene.
Era onaba muutu omunyoomi, ewe wamwene ndiiwe aja hubonaabona.
13 Obuŋubeebe buli hyʼomuhasi aŋumamo soni,
alomera ŋamugulu era aŋuma ehi amanyire.
14 Gehala ŋa mulyango gwʼenyumba yiye,
hu tebe aŋegingihiriri aŋa boneherera mu hibuga,
15 nʼalanga abo ababita,
abali hu ngendo jaawe ati,
16 “Leha oyo atamanyire gaaje ewange.”
Era ehyo ahiroma abo abaŋubeebe ati,
17 “Amaaji agowiibi gaŋooma
era ebiryo ebi baliira mu ngiso njʼebisinga ohuŋooma.”
18 Aye abaŋubeebe sibamanyire baati mu nyumba yiye yiriyo abafu
era baati abageni babe bali emagombe.