8
Amagesi galanga
1 Ŋuliirisa amagesi ni galanga
era ŋulira ohutegeera ni hulanga.
2 Hu lusozi ohuupi nʼengira
nomu masaŋangira gemeerera,
3 ŋa miryango ejingira mu bibuga
aŋa bengirira, paŋa alomera nʼamaani ati,
4 “Mbalanga enywe abasinde
nanga abaatu mwesimwesi.
5 Enywe abaŋuma ehimumanyire muŋangale
enywe abaŋubeebe musune ohutegeera.
6 Muŋuliirise olwohuba ndi nʼebyamahulu ebi nenda hubalomera.
Omunwa gwange ngwasamya ohuloma ebituufu.
7 Ebi ndoma byʼamazima
era sikolagana nʼobudulingi.
8 Ebi ndoma byosibyosi bituufu
era muŋumamo budulingi oba ohucaamya.
9 Ebi ndoma bitegereheha eyiri ategeera
era eyiri amanyire, biri ŋalafu.
10 Musaleŋo ohuŋira ebi mbalegera ohusinga ohuŋira efeeza,
ohumanya ohusinga ezaabbu ekenene,
11 olwohuba amagesi gamuŋendo bugali
ohusinga amabaale aga balanga baati rubbisi.
Eŋuma ehi oŋembaho ehiŋeraŋerana nʼamagesi.
12 “Ese magesi, menya ŋalala nʼohusalaŋo ohulaŋi.
Manyire aŋʼohwagaana amagesi nʼobutegeefu.
13 Ohutya Musengwa hihuleetera ohucaawa ehibi.
Ese caawa ohwehudumbasa nʼohwepaapaaha
era caawa ekola etali nuŋamu nʼendoma embi.
14 Ndi wʼamaani nʼohutegeera,
kola etegeha era najoheresa.
15 Njeeda abahabaha ohuŋuga
nʼabatangirisi ohutaaŋo amagambi amalaŋi.
16 Njeeda abaŋugi ohuŋuga
era njeeda abahombe ohulamula bulaŋi hu hyalo hino.
17 Nenda abo abanyenda
era abo abanyendula, bambona.
18 Ndi nʼobuŋinda nʼeŋono
obuŋinda owolubererera ko nʼohutehubbira.
19 Ebibala byange bisinga ezaabbu endaŋi,
ebi ngaba bisinga efeeza endaŋi.
20 Ebi kola biruŋamu,
era kola ni tehubbira.
21 Abanyenda mbaŋa obuŋinda
era esitoowa jaawe jejula.
22 “Musengwa gaali ni nange mu hutandiha,
gahihola nʼahiiri hutonda hiitu hyosihyosi.
23 Naaliŋo ohuŋwa mu hutandiha
ehyalo ni hihiiri nʼohubaŋo.
24 Nasaaliwa agayanja ni gahiiri hubaaŋo
nʼesulo ejiŋwamo amaaji ni jihiiri hubaaŋo,
25 naaliŋo esozi ni jihiiri hubaaŋo
ko engingi ni jihiiri hubaaŋo,
26 ko Hatonda atonde ehyalo
oba eroba hu hyalo.
27 Naaliŋo nʼataŋo egulu mu hifo hyalyo,
naaliŋo ko nʼataŋo esalo yʼenyanja.
28 Naaliŋo nʼatonda ebireri gabita mu bbanga
era nʼataŋo esulo mwiroba.
29 Naaliŋo nʼataŋo esalo ya gayanja
amaaji gatatuuma hiragiro hihye,
era nʼolu gataŋo omusingi gwʼehyalo,
30 ndiise owaali omuhubbi wʼepulaani oyu gaali ni naye.
Ndiise owamwesiimisanga habuhyabuhya.
Nʼasangaalanga olwʼohubaŋo huhwe,
31 naali musangaafu olwʼehyalo ehi gatonda
era ni sangaala olwʼabaatu aba gatonda.
32 “Ŋaahani baana bange, muŋuliirise
olwohuba bali nʼekabi abagendera mu magira gange.
33 Muŋulirisenga ebi mbasomesa mwahaba bagesi
era mutabigayaliriranga.
34 Gesiimire oyo aŋulira ebi ndoma
abo ababererera hu lwigi lwange
ni banindirira hu mulyango ogwingira ewange,
35 olwohuba abo abaneeŋa baba bafumbuuye obulamu
era basuna owende ohuŋwa ewa Musengwa.
36 Aye abo abataneeŋa bekosa abeene,
bosibosi abatanyenda baba bendula hufa.”