7
Ofubanga ohusuna amagesi
1 Mwana wase, hebuliranga ebi kulaabbira,
era siwibiriranga biragiro byange.
2 Hola ebi kuloma ohuhola oja hubaŋo mulamu.
Huumanga ebi kusomesa ngʼolu ohuuma emunge yʼemoni yiyo.
3 Hiisi hiseera obihuumanga
era obiŋandiihe hu mwoyo gugwo.
4 Yendanga amagesi ngʼolu wenda mbojooyo
era wende ohutegeera hyʼolu wenda meriiwo owohu mwoyo.
5 Hija huhuhingirisa omuhasi omuhwedi
era bihuŋonie ohutiinira hu bibono bibye ebisendasenda.
Obukodyo wʼomuhwedi
6 Lulala naheja ebulafu ni ndi ŋa
dinisa yʼenyumba yange,
7 nga mbona abavubuka ababuyabuya
ne nehalirisamo mulala owaali omuŋubeebe.
8 Nabita mu ngira huupi nʼekoona,
aŋaali enyumba yʼomuhasi omuhwedi oyo,
9 ehyʼegulo mu hiirema ehidaayi,
ehiirema ehyʼamaani aŋa hiijira.
10 Ngʼaŋo omuhasi owambala ebyambalo ebisendasenda aŋwayo
ni genda amuŋigule omwoyo.
11 Omuhasi oyo gaali aŋuma soni
era atehalisa ŋango.
12 Gaberereranga ni gereresa mu hiisi luguudo
era nomu nabiŋwera.
13 Gatiina ngʼagwa omuvubuka oyo mu hifuba,
nga gooma emoni amuhejaho amuloma ati,
14 “Engo ndiyo nʼeŋongo eyʼohutabagana
olwa leero noherehise oweyamo wange.
15 Olwʼehyo nijire ni kwendula
era njono kwageene ŋano.
16 Naalire obuliri wange nʼamasuuka aga bahola
mu lugoye olulaŋi olwa laasi ohuŋwa e Misiri.
17 Obuliri mbuhubbireho ahaloosa ahamiira
eyi baahola mu bubbaani nʼaloowe ko ni sinamooni.
18 Nja hutiine huhyese owiire ni hunywa obulamu,
leha hwesangaasemo,
19 olwohuba engo wamwange aŋumaayo,
gatiinire mu lugendo aŋaleeŋi.
20 Gatiinire nʼehihapu hyʼebbeesa
aja hugobola ni ŋabitireŋo ewiiki ebiri.”
21 Nʼebibono ebi hooŋahooŋa,
galeetera omuvubuka ohubbaama
gamusendasenda nʼebibono bibye.
22 Aŋo ni naaŋo gamulondaho
hyʼeŋombe eyi baŋira ohwita,
hya namoli agwa mu mutego,
23 paka olu hasaale hamufumita omwoyo
hyʼenyuni eyingira mu lubanjo.
Sigamanya ati obulamu wuwe waali butiina emayeera!
24 Kale baana bange muŋulire ebibono ebi ndoma
era mute emyoyo hubi mbaloma.
25 Mutaleha muhasi oyo hwiba myoyo jenywe
oba hubbaamira hu magira gage.
26 Agwihiise bangi
era mu butuufu oweene abasihiirihiise sibabaliha.
27 Enyumba yiye ngira ehuŋira emagombe,
njʼengira eyaŋaapi eyitiina mu hufa!