6
Obubi wʼohweyimirira abandi
1 Mwana wase, singa weyimirira
owahyo olwʼebbanja,
nʼoba nʼofugiiriye ohumuteraŋo
omusingo ohumuŋola,
2 singa weboŋa olwʼendagaano yiyo
ebibono ebi waloma ebyene byahuboŋa,
3 wedanya mu mihono jije.
Olwʼehyo otiinanga wamwegayirira
afugiirire musalemo endagaano.
4 Otagayaalanga huhihola
otaŋuumula nʼohiiri huhihola.
5 Wefubengaho hyʼenjobe olu yefubaho embiro ohuŋona omuŋiimi,
hyʼenyuni egululuha ohuŋwa mu lubanjo.
Ohweŋala obudoto
6 Mudoto ewe, ŋeega hu kola yʼamage
ohene weege ogobolemo amagesi.
7 Amage gaŋuma mutangirisi
wayire muŋugi oba nyapala,
8 aye gahola nʼamaani ohwendobooli
gewungira emere eyi galya ohwefula.
9 Kale mudoto ewe olyosa ŋe ohuŋenyuha?
Oja huŋwa ŋaali mwiro?
10 Oŋosa oti, “Leha punguleho ahalo ŋatotono,
pongereho ŋatotono, pumuleho ŋatotono,”
11 aye obugadi wuja huhugwira hyʼomwibi,
obugadi bulihulumba hyʼomutemu.
12 Abaatu abaŋuma mugaso era abahosi bʼebibi
batiina hiisi ŋaatu ni bageesya syetu.
13 Bahola obubonero wʼobudulingi ni baminanira emoni,
ni banyeenya amagulu era ni basoosya nʼolwala.
14 Abahosi bʼebibi bategeha huhola bibi mu mwoyo jaawe
era sibalehera huleeta bigosi.
15 Ebi bahola bija hubaŋweramo ebigosi ni batamanyire
era baja husihiiriha ni ŋaŋuma huŋona.
16 Ŋaliŋo ebiitu mukaaga ebi Musengwa acaawa,
biri musanvu ebyʼembiho eyi ali,
17 ekeja eyʼamalala
nʼebibono ebyʼobudulingi nʼobutemu
18 nʼomwoyo ogupanga ekwe
nʼohudulumirira ohuhola ebicaamu,
19 omujulizi ajofumula ebyʼobudulingi,
nʼomuutu aleeta ohutawuujuha mu mago.
Ohulabula ohuŋamba hu buhwedi
20 Mwana wase, oŋambanga ebiragiro bya lataawo
era solehanga ebi maawo ahusomesa.
21 Ebibono ebyo obihuumanga hu mwoyo gugwo
obyesidihanga mu mamiro.
22 Bija huhuluŋamyanga nʼogenda bija huhuhuumanga nʼoŋenyuhire
era bija hulomanga ni neewe nʼosisimuhire,
23 olwohuba ebiragiro biri hyʼetaala ohuhuŋa enjase,
bija huhusomesa ohufuga owongo
nʼohuhutangirira mu ngira eyʼobulamu.
24 Bija huhutaasa omuhasi omuhwedi,
bihutuse hu muhabeene
ali nʼebibono ebihongeresa.
25 Otegombanga buŋoono wuwe
otaleha keja yʼemoni jije huhuhongeresa.
26 Omuhasi malaaya bamugula hu bbeeyi yʼemere
aye ohwenda muhabeene hihuleetera ohufiirwa obulamu wuwo.
27 Omuutu aŋanga gagegera hu hifuba hihye amanda agekeeka,
engoye jije ndijinye?
28 Oba omuutu asobola ohugendera hu manda agekeeka
amagulu ndigababuhe?
29 Pohiri hiityo nʼomuutu aŋenyuha ni muhabeene,
hiisi ahihola baja humuboneresa.
30 Singa omuutu geeba
olwohuba abaaye afa enjala, sibamusoniŋa.
31 Singa bamuŋamba, aja huliŋa emirundi musanvu
nʼolu hiba ti ali nʼohutunda ebi ali ni nabyo mu mago gage byosibyosi.
32 Aye ahwedesania ni muha owahye aba muŋubeebe.
Oyo ahihola, asihiirisa bulamu wuwe omwene.
33 Bali mwosaho ebisago era balimutala
ehiswalo ehi aliba nʼasunire sihirimuŋwaho,
34 olwohuba ewuba lyʼomusinde omwene muhasi muhambwe
era saaliba nʼehisa ni gegalula.
35 Salifugiirira ndiŋi, saaja huŋira mutango
wayire mubbala guutye.