5
Ohulabula hu biŋamba hu buhwedi
1 Mwana wase, ŋira ebibono ebyʼamagesi ebi kuŋa ngʼehihulu
oŋuliirise bulaŋi ebibono byange ebi huleetera ohutegeera,
2 wahamanya ehiraŋi ehyʼohuhola,
ko ebi oloma birage biiti oli wʼamagesi.
3 Ebibono byʼomuhasi omuhwedi biŋomerera hyʼomudugere
nʼendoma yiye yiri hyʼamafuta gʼemizayiti.
4 Aye hu komerero aluluŋa hyʼenduse
mwogi era wabulabe hyʼempiima enjogi hu mbega jombi.
5 Singa omwetehera, oja hutiina mu hufa
engira eyi aŋambire ehuŋira yimagombe.
6 Gabbaama gaŋwa hu ngira ereeta obulamu
amagira gage magodami aye sahimanyire bbe.
7 Olwʼehyo baana bange, mupulirise
mutabbaamanga huŋwa hu bibono ebi mbalomera.
8 Mweŋalenga ebikolwa bibye
era simutiinanga ŋaapi nʼomulyango gwʼenyumba yiye.
9 Singa ohihola oja hufiirwa eŋono liryo
abandi abaŋuma hisa baliriŋira,
10 abagwira baja huŋira obuŋinda wuwo
omuutu owundi gaaba njʼonyumirwa ohuhalabana huhwo.
11 Hu komerero yʼobulamu wuwo
oja hubinda omubiri ni guŋoyeho enyama.
12 Oja hwehebulisa oti,
“Lwahiina mu mwoyo gwange nacaawa ohulabulwa ohu bapanga
era mu bulamu wange nanyoomanga abandabula!
13 Sinaŋulirisanga basomesa bange
oba huŋuliirisa abo abandabbiranga.
14 Ŋaahani nolire ohusihiiriha
era swale mu lwijuuye!”
15 Omuhasi wuwo ali hyʼesobere yʼamaaji amalaŋi,
olwʼehyo nywanga amaaji agahuluhuta ni gaŋwa mu sobere yiyo.
16 Hisaana amaaji gago ohuhuluhutira mu nguudo,
esulo jʼamaaji gago ohuhuluhutira mu nabiŋwera?
17 Leha amaaji gomu sulo ejo gabe gogo weŋene
era sogabananga nʼabaatu abandi.
18 Leha omuhasi wuwo abenga hyʼesulo eyʼekabi
era osangaalenga olwʼomuhasi oyu wasuna ni muhiiri bavubuka.
19 Omuhasi wuwo muŋoono era mulaŋi
leha amabeere gage gahusangaasenga endaalo josijosi
era leha ohwenda huhwe eyi oli huhuŋambirirenga habuhyabuhya.
20 Mwana wase, lwahiina omuhasi omuhwedi ahuhenamo esamuuna?
Lwahiina muhabeene geeba omwoyo gugwo?
21 Musengwa abona byosibyosi ebi ohola
era hiisi aŋa oja ahubona.
22 Omuhosi wʼebibi agwa mu mitego jʼebibi bibye omwene.
Emitego jʼebibi bibye jimuŋamba.
23 Aja hufa olwʼohutaŋuga wongo wuwe
aja huŋaba olwʼobuŋubeebe wuwe.