14
1 Omuhasi omugesi gemeeresaŋo amago gage
aye omuŋubeebe abbwagaŋo agage omwene.
2 Oyo agendera mu magira amaluŋamu atya Musengwa
aye oyo agendera mu magodajami, alaga ati amujerega.
3 Endoma yʼomuŋubeebe yimuleetera ohumuhubba
aye eyʼoyo ali nʼamagesi yimuhuuma.
4 Aŋaŋuma esaame ohulima eŋuma ehiba mu hyagi
aye aŋa jiba ni jirima ebyagi bijula emere.
5 Omujulizi owʼamazima sadulinga
aye omudulingi aloma ebyakalebule.
6 Omuutu omunyoomi nʼolu gendula amagesi sagasuna
aye hyangu omutegeefu ohugasuna.
7 Yeŋale omuŋubeebe olwohuba ŋaŋuma ehyʼamagesi ehi oja hwega.
8 Omugesi ategeera ehyʼohuhola olwohuba mugesi
aye omuŋubeebe aŋeega ati amanyire.
9 Abaŋubeebe bahola ehibi era ndibafeyo
aye omuutu omulaŋi genenya.
10 Omuutu omwene njʼamanya enaku oba esangaalo ebiba hu mwoyo gugwe
era ŋaŋuma aŋanga ohubigabana nʼowundi muwiijufu.
11 Amago gʼomuhosi wʼebibi gaja hufuuha gunda
aye olulyo lwʼomugwalaafu luja husigala ni luhiiriŋo.
12 Ŋaliŋo ekola yʼebiitu eyiboneha ohuba endaŋi eyiri omuutu
aye hu komerero ni yimuŋira mu hufa.
13 Enjeho jisobola ohuŋwamo enaku
nʼesangaalo ohuŋwamo ohunakuŋala.
14 Omuutu omubi mu mwoyo alisuna ehimusaanira
era nʼomulaŋi yeesi balimuŋa omuhemba ogumusaanira.
15 Omuŋubeebe afugiirira hiisi hiitu
aye omutegeefu ahena hwetegeresa ko gabaho nʼehi ahola.
16 Omuutu omugesi atya ohugwa mu bigosi era geŋala ohuhola ebibi
aye omuŋubeebe geranga mugesi era sigegenderesa mu ebi ahola.
17 Abaatu abatalwa hunyiiga bahola ebyʼobuŋubeebe
era omuutu owʼekwe bamucaawa.
18 Abaŋubeebe bagendera mu buŋubeebe
aye abategeefu basuna eŋono olwʼobumanyi.
19 Abahola ebibi balihubbira abalaŋi amafuha
era ababbengi balihubbira abagwalaafu amafuha.
20 Eŋuma owenda omugadi era wayire muliranwawe samwenda
aye abaŋinda baba nʼemihago mingi.
21 Hiba hibi omuutu ohunyooma muliranwawe
aye besiimire abo abayeeda abagadi.
22 Abo abahola ebibi baŋaba
aye abaatu abahola ebiraŋi babenda era babesiga.
23 Ohuhola emirimo nʼamaani hireeta amagoba
aye olugambo lusaala enjala.
24 Obuŋinda wʼabagesi njʼeŋono lyawe
aye omuŋubeebe amanyihira hu lwʼobuŋubeebe wuwe.
25 Omujulizi aloma amazima aŋonia obulamu wʼabaatu
aye obujulizi owʼobudulingi siwesigiha.
26 Oyo atya Musengwa aba nʼaŋohweŋogoma
era hireetera omuutu nʼabaana babe ohubaaho obuhuumi.
27 Ohutya Musengwa hiri oti sulo eyireeta obulamu,
era hireetera omuutu ohuŋwa mu mitego jʼohufa.
28 Obungi wʼabaatu njʼeŋono lya habaha
aye aŋaŋuma ehyo ŋaŋuma fuma.
29 Omuutu omugumikiriza aba mutegeefu
aye owʼobusungu owaŋaapi ŋaapi alaga obuŋubeebe wuwe.
30 Omwoyo ogwijuuye emiyaaya guleetera omubiri ohuba mu mbeera endaŋi
aye esaalwa yibosa amagumba.
31 Anyigirisa abagadi aba anyooma Oyo Owabatonda
aye omuutu aŋambira abagadi ehisa aba aŋa Hatonda eŋono.
32 Abahosi bʼebibi bereetaho ebigosi olwʼebi bahola
aye abagwalaafu nomu hufa baba nʼaŋohweŋogoma.
33 Hiisi hiŋeego hyʼomuutu omugesi hiba hyʼabutegeefu
aye omuŋubeebe aŋuma ehyʼamagesi ehi amanyire.
34 Abaatu banaba bagwalaafu ehyo hiŋeesa egwanga lyawe eŋono
aye ehibi hireeta ehiswalo.
35 Omuŋeeresa omulaŋi asangaasa habaha
aye ahangavula oyo atahola mirimo bulaŋi.