15
1 Engobolamo endaŋi, yihahania ehiruŋi
aye ebibono ebyʼehabyo bireeta obusungu.
2 Omuutu omugesi aloma ebisaana
aye omuŋubeebe aloma ebiŋuma mahulu.
3 Musengwa abona hiisi ŋaatu
era emoni jije ajitaaye hu bahosi bʼebibi nʼabagwalaafu.
4 Ebibono ebiŋonia biri hyʼomusaala oguleeta obulamu
aye ebibono ebyʼobudulingi bibbwaga omwoyo.
5 Hya buŋubeebe ohuŋwa hu ebi lataawo gahusomesa
aye hiisi aŋamba ebi bamulabbira aba mugesi.
6 Amago gʼomuutu omugwalaafu mubaamo ebyʼobuŋinda bingi
aye ebyefuna byʼabahosi bʼebibi bibaŋweramo ebigosi.
7 Ebibono byʼabagesi bireetera abandi ohumanya
aye ehyo sihiri mu myoyo jʼabaŋubeebe.
8 Musengwa genyinyalya eŋongo lyʼabahosi bʼebibi
aye ohusaba hwʼabagwalaafu humusangaasa.
9 Musengwa acaawa esambo jʼabahosi bʼebibi
aye genda abo abafayo ohuhola ebiruŋamu.
10 Singa oleha engira endaŋi baja huhuhangavula luhulu lwene
era oyo acaawa ohumunenya aja mu hufa.
11 Musengwa aŋuma ehi atamanyire ehiŋamba hu hufa nʼohusihiiriha
olwʼehyo eŋuma ehi atamanyire ehiri mu myoyo jʼabaatu.
12 Omunyoomi sigenda humulomaho
era sigenda hwebuusaho hu bamuhiraho ohumanya.
13 Omwoyo omusangaafu guleeta amamwemwe mu moni
aye ohulumwa hu mwoyo huleeta ohunakuŋala.
14 Omuutu owʼamagesi genda bugali ohwega
aye omuŋubeebe gebona ati ali bulaŋi mu obuŋubeebe wuwe.
15 Obulamu wʼomugadi wijuuye bigosi
aye abasangaafu mu myoyo nibo baba mu hweyagala.
16 Hiraŋi ohwebeera nʼahadiidiri onaba nʼotya Musengwa ohuhira ohuba nʼobuŋinda ehibbiiryo
aye nʼoŋuma miyaaya.
17 Omala galiira eryani eryamagala ne ni mwendana
ohusinga ohuliira ebinoli aye ni mwejuuye obucaayi.
18 Omuutu atalwa hunyiiga atanula etalo
aye oyo aŋamba pola ebiitu gehahania obuduhani.
19 Onaba mudoto oja hwagaana ebigosi mu bulamu wuwo
aye onaba mwesigwa sooja huba nʼobugosi.
20 Omwana omugesi asangaasa semwana
aye omuŋubeebe anyooma nyina.
21 Obuŋubeebe wusangaasa abaŋuma magesi
aye omuutu omutegeefu ahola ebisaana.
22 Aŋaŋuma huhuŋa magesi, etegeha siyolerera
aye yolerera abaŋi bʼamagesi banaba ni bali bangi.
23 Hiisi muutu asangaalira engobolamo endaŋi
era nga hisangaasa ohuba nʼendomaloma eyolaana mu hiseera ehituufu.
24 Abaatu abʼamagesi bagendera mu ngira eja ŋamugulu eyiri obulamu
sosi engira eyija ŋaasi mu hufa.
25 Musengwa asihiirisa amago gʼomuutu owehudumbasa
aye ahuuma ebiitu byʼanamwandu.
26 Musengwa acaawa ebiŋeego byʼabahosi bʼebibi
aye ebyʼabagwalaafu bimusangaasa.
27 Omuutu owomuŋudu aleetera amago gage ebigosi
aye oyo acaawa enguzi aja huwangaala.
28 Omugwalaafu asooka huŋeega mu mwoyo hu ehi aja huloma konyo gagobolamo
aye omuhosi wʼebibi aloma hifaabi.
29 Musengwa aba ŋaleeŋi nʼabahosi bʼebibi
aye aŋulira ohusaba hwʼabagwalaafu.
30 Ohumwemwejera huleeta esangaalo hu mwoyo
era amaŋuliro amalaŋi gagobosa mu magumba amaani.
31 Aŋuliirisa ni bamunenya aja hufuuha mugesi.
32 Agaana ohwega gerumya omwene
aye afugiirira ohumunenya geeyongera amagesi.
33 Ohutya Musengwa hireetera omuutu ohuba mugesi
era ohuba omuutu oweyiisa ŋaasi, hihuŋeesa eŋono.