16
1 Omuutu ategeha mu mwoyo gugwe ebi gahendire ahole
aye Musengwa njʼasalaŋo.
2 Osobola ohuŋeega oti hiisi ehi ohola hiraŋi
aye Musengwa njʼamanyire ehiri mu mwoyo.
3 Etegeha jijo jiŋambye Musengwa
aja hujoheresa.
4 Hiisi ehi Musengwa gataŋo hiri nʼehigendererwa
era abahosi bʼebibi gabateeraŋo oludaalo olwʼohubaboneresa.
5 Musengwa genyinyalya abo bosibosi abepaahapaaha mu myoyo jaawe
era mu butuufu oweene aja hubahangavula.
6 Ba wa hisa era mwesigwa, Hatonda aja huhusoniŋa ebibi
era oyo atya Musengwa geŋala ohuhola ehibi.
7 Onaba nʼosangaasa Musengwa
afuula abasigu babo ohuba bameeri babo.
8 Omala gaba nʼehitono ne nʼoli mugwalaafu
ohuhira ohuba nʼehibbiryo hyʼobuŋinda nʼobusunira mu bukuyakuyi.
9 Hutegeha ebi hwahendire huhole
aye Musengwa njʼasalaŋo ngʼolu binagende.
10 Ebi habaha aloma abiroma hu buŋangi wa Hatonda
era ebi asalaŋo byʼamazima.
11 Emizaani nʼebipimo ebyolana bya Musengwa,
era ebi bapimiraho byosibyosi bibye.
12 Habaha acaawa ebikolwa ebibi
olwohuba ohuhola ebiitu mu buluŋamu
hinywanywasa etebe eyʼobuŋugi.
13 Abahabaha basangaalira amazima
era benda abo abaloma ebituufu.
14 Habaha analuŋa aŋanga geeta omuutu
aye omuutu omugesi amuŋooyaŋooya.
15 Habaha anasangaala aŋo ŋabaaŋo obulamu
era ohuba muhoda eyi ali hiri hyʼefula ohwendobooli.
16 Ohuba nʼamagesi hisinga ezaabbu
era ohuba nʼohutegeera hisinga efeeza.
17 Abaatu abaluŋamu beŋalama amagira agabaleetera ohuhola ebibi
olwʼehyo manya amagendere gago wahaŋonia obulamu wuwo.
18 Amalala galeeta ohusihiiriha,
ohwepaahapaaha huŋwamo ehigo.
19 Omala gaba muutu owaŋaasi
era waba ŋalala ni naabo ababanyigirisa
ohuhira ohugabana ebyʼomunyago ni naabo abehudumbasa.
20 Hiisi aŋuliirisa ebi bamulabbira aja huhulahulana
era gesiimire oyo owesiga Musengwa.
21 Omuutu omugesi omubonera hu butegeefu wuwe
abandi bamwigiraho ebibono bibye binaba ni biri byʼamahulu.
22 Obutegeefu sibuho yʼobulamu eyiri abo abagesi
aye ohugesyaho ohusomesa abaŋubeebe hiba huhena biseera.
23 Omuutu owʼamagesi gehuuma mu ndoma yiye
era ebi aloma biba byʼamahulu.
24 Ebibono ebyʼehisa biri hyʼomudugere
bigalusamo amaani era bireeta obulamu.
25 Ŋaliŋo ekola yʼebiitu eyiboneha ohuba endaŋi eyiri omuutu
aye hu komerero ni yimuŋira mu hufa.
26 Ohwegomba ohulya ohu mutambi aba ni nahwo humuleetera ohuhola bugali
era ehyo himuleetera ohusuna ehi genda.
27 Abahosi bʼebibi basiiba bayiiya engeri eyʼohukosamo abahyawe
era ebi baloma byohya hyʼomuliro.
28 Omuutu owakalebule aleeta etalo
era gabuhania abameeri.
29 Abaatu abʼemyoyo emibi badulinga abahyawe
era babagwisa mwiroŋo.
30 Oyo ahumiinamiinira emoni aba asala luhwe huhugwisa mu bigosi
era oyo ahusosya omunwa aba ahwendesa hibi.
31 Ohusahuluŋa wamera efi yiba ngule yʼeŋono
ohuyifuna oba obaaye ohola ebiruŋamu.
32 Omala gaba mugumiikiriza ohuhira ohuba musooli wʼetalo,
era omuutu afuga obusungu ohusinga ohusoola waŋangula ehibuga ehiramba.
33 Abaatu bahubba ahalulu
aye Musengwa njʼasalaŋo ngʼolu hanaabe.