17
1 Omala galya amahayaga nʼoli nʼemiyaaya
ohusinga ohulya ebinoli mu mago omuli ohuduhanaduhana.
2 Omwidu omugesi aliŋuga omwana owa musengwawe aŋuma mahulu
era alisuna omugabo ogwʼobusika oti hani yeesi mulala hu bomu mago ago.
3 Ezaabbu nʼefeeza babita mu muliro ohutusamo obucaafu
aye Musengwa njʼahebera emyoyo.
4 Abahosi bʼebibi baŋulirisa kalebule
era omudulingi aŋuliirisa olugambo.
5 Aduulira abagadi aba afodogola Owabatonda
baja huhuboneresa onaba nʼosangaala abaatu abandi ni baguuye mu bigosi.
6 Abaana bejuhulu hya ŋono eyiri abo abasaahulu
era nʼabaana benyumikiriza mu basaaye baawe.
7 Sihyabulijo omuŋubeebe ohuloma ebiitu ebyamahulu
era sihiba hyamahulu omuŋugi ohuloma ebyʼobudulingi.
8 Abaatu baŋeega mbo ohugulirira hihubisyamo
era hiisi ahihola abitaamo.
9 Oyo asoniŋa abahye agobosaŋo omuhago
aye oweŋambirira geeta omuhago.
10 Omuutu omutegeefu aŋuliirisa ni bamulabula
ohusinga olu ohubba omuŋubeebe efaalu cikumi.
11 Omuhosi wʼebibi anyumirwa ohuhola ebibi
aye baja humuboneresa nʼamaani.
12 Omala gasaŋaana engwe eyi bebireho enyana yayo
ohusinga omuŋubeebe mu buŋebeebe wuwe.
13 Singa omuutu ahuholera ebiraŋi
aye ewe wamusasulamo ehibi,
ehibi sihija huŋwa mu mago gago.
14 Ohutandiha obuduhani hiri hyʼohwigula omulyango ogwʼamataba
olwʼehyo, hihomye ni gahiiri gamutumbu.
15 Ohwejeeresa aholire omusango
nʼohusingisa oyo aŋumaaho songa omusango,
byombi Musengwa abicaawa.
16 Hyamugaso hi omuŋubeebe ohuba nʼebbeesa ejʼohwesasulira hu somero
olwohuba aŋuma mwoyo ogwenda ohwega.
17 Meriiwo ahwenda hiisi hiseera.
Era ehigumya olulebe huyeedagana mu bigosi.
18 Omuŋubeebe njʼoweeta mu buvunanyiziwa
owʼohusasula ebbanja eritali lirye,
oba gataŋo omusingo hulwa muliranwawe.
19 Hiisi anyumirwa ohuduhana aba anyumirwa ehibi
era hiisi owehudumbasa aba gendula husihiiriha.
20 Omuutu owʼomwoyo mubi saŋanga huhulahulana
era owʼendoma mbi emudaanya mu bigosi.
21 Ohusaala omwana omuŋubeebe hihuleetera enaku hu mwoyo
era eŋuma musaaye wʼomuŋebeebe aba musangaafu.
22 Ohuba nʼomwoyo omusangaafu woosi bulesi obuŋonia
aye ohuba nʼomwoyo omunakuŋafu hijoleesa omubiri.
23 Omuhosi wʼebibi afugiirira enguzi mu ngiso
ohugosya amazima.
24 Omuutu omutegeefu gehuunirira hu byʼamagesi
aye emoni jʼomuŋubeebe jiba hu hiisi hiitu ehiri hu hyalo.
25 Omwana omuŋubeebe anakuŋasa semwana
era aleetera nyina enaku.
26 Sihiraŋi ohuboneresa omuutu aŋumaaho omusango
oba ohufaduula omutangirisi olwohuba mwesigwa mu ebi ahola.
27 Omugesi gehuuma mu ndoma yiye
era omutegeefu aŋuga obusungu wuwe.
28 Singa omuŋubeebe aŋoleera,
bamubala mugesi era mutegeefu.