18
1 Oyo ataholagana nʼabahye
niye geyendulira bibye omwene
era aŋahania ehi hiisi muutu amanyire ati njʼehituufu.
2 Omuŋubeebe saafayo hutegeera hiitu
aye ganguŋirisa ohulaga ngʼolu ali wʼamagesi.
3 Ehibi nʼohuswala bitiinira ŋalala
era ehiswalo hisaala eduho.
4 Ebibono ebi omuutu aloma biŋangire ohuba simuho yʼamagesi
era biri hyʼamaaji agomu njuho
oba agaduluma mu lwabi.
5 Sihiraŋi ohuwihirira hu bikolwa byʼomuhosi wʼehibi
oba ohugaana ohuŋa omuutu aŋumaaho omusango ehimusaanira.
6 Ebibono byʼomuŋubeebe bimuŋweramo ohuŋahana
era byamuleetera ebihubbe.
7 Ebi muŋubeebe aloma bimuŋweramo ohusihiiriha
era ebibono bibye ebyene mutego eyi ali.
8 Owʼolugambo ebi aloma biŋomerera,
era biri hyʼemere eyi olya yeehala mu hida.
9 Omuutu omudoto ali hyʼoyo ahena ebiitu ohwonoona.
10 Musengwa ali hyʼomunaala omugumu,
abagwalaafu pomu badulumira basuna obuŋonere.
11 Omuŋinda aŋeega ati obuŋinda wuwe busobola ohumuŋonia
hyʼehiteepe ehigumu ehyeswanigirihiise ehibuga.
12 Amalala galeetera omuutu ohugwa
aye omuutu asooka hweŋomeha ko gasuna eŋono.
13 Ŋulira konyo obe nʼehyohugobolamo.
Nʼotahihola, oba oli muŋubeebe era oswasa.
14 Ohwenda ohweyongera ohuba mulamu hihuŋambiirira nʼolwaye
aye ohwesinya obulamu hihenamo esuubi.
15 Abaatu abali nʼamagesi benderera ohwega
era amatwi gʼoli nʼamagesi genda ohumanya.
16 Wenda ohulomaho nʼomuutu omwegingihiriri?
Onamuŋirira ehirabo hija huhwanguŋira.
17 Asooka ohweŋosyaho aboneha oti njʼomutuufu
ohwola oyu aŋosa ni naye ganja ebibye yeesi.
18 Ohuhubba ahalulu hihenaŋo embaha
era higaya abʼamaani.
19 Hyangu ohubbwaga ehiteepe ehyeswanigirihiise ehibuga ohuhira ohufaaŋana nʼomulebe oyu okohiise
era obuduhani buli hyʼomulyango ogwʼehibuga ogu bagunyira.
20 Omuutu asaanira ohugumira ebiŋwa mu bi aloma.
21 Amaani gʼobulamu nʼohufa gali hu lulimi.
Olwʼehyo, oli nʼohugumira ebiŋwa mu ebi oloma.
22 Oyo asuna omuhasi aba gesiimire
era aba asunire ekabi ohuŋwa eyiri Musengwa.
23 Omugadi gegayirira bamuŋambire ehisa
aye omuŋinda agobolamo nʼebbogo.
24 Omuutu ali mihago ejitesigiha saalwa hugwa mu bigosi
ne ŋaliŋo ohuba ni meriiwo nʼahusingira ni mugandaawo.