19
1 Hiraŋi ohuba mugadi ne waba wʼamazima
ohuhira ohuba omuŋubeebe omudulingi.
2 Sihiraŋi ohubugutanira ohuhola ehiitu ehi obulaho bumanyi,
onabugutana ohuhihola ogwa mu bigosi.
3 Abaatu abandi olwʼobuŋubeebe waawe beyita abeene
nga nindi banenya Musengwa.
4 Obuŋinda wugima waba nʼemihago mingi,
aye abameeri bʼomuutu omugadi bamuŋwaho.
5 Omuutu aŋa obujulizi owʼobudulingi saliŋona humuboneresa
ni nooyo aloma ebyakalebule salyejeerera.
6 Baatu bangi bendula obuhoda hu baŋugi
era hiisi muutu genda abe meeri wʼomuutu omugabi.
7 Omuutu anaba mugadi nʼabolulyo lulwe olwene bamunyooma
nʼabemihago jije bamweŋalama
era nʼolu mugadi abegayirira, bamuŋwaho.
8 Oyo osuna amagesi aba gefaaho
era hebuliranga ebi wasoma ko wahahulahulana.
9 Omuutu aŋa obujulizi owʼobudulingi saliŋona humuboneresa
ni nooyo aloma ebyakalebule salyejeerera.
10 Sihiraŋi omuŋubeebe ohuba mu bulamu owʼohwejalabya
ngʼolu hitasaana mwidu ohuŋuga abalangira.
11 Omuutu omutegeefu afuga obusungu wuwe
era ohutalonderesa songa hihuŋeesa eŋono.
12 Obusungu wa habaha, wuli hyʼepologoma ebuluguma
aye ehyere hihye hiri hyʼolume hu birime.
13 Omwana omuŋubeebe aba higosi eyiri semwana
era nʼomuhasi aduhanirisa ali hyʼefula etahya.
14 Abasaaye basikisa abaana baawe amayumba nʼobuŋinda
aye ohusuna omuhasi omutegeefu hiba hirabo ohuŋwa eyiri Musengwa.
15 Obudoto buleeta ero eryʼamaani
era ehihala busa hisaala enjala.
16 Oyo ahuuma ebiragiro ataasa obulamu wuwe
aye oyo abinyooma himuŋweramo ohufa.
17 Oyo owʼehyere eyiri abagadi aba aŋola nje Musengwa
era aja humuŋa omuhemba olwʼebyo ebi ahola.
18 Hangavula omwana wuwo ni gahiiri gamutumbu
aye singa sohihola oba omuyeeda hwonoonoha.
19 Omuutu owʼobusungu obungi ali nʼohugumira ebibuŋwamo,
singa lulala omuyeeda mu higosi nindi oja humuyeeda olundi.
20 Ŋulirisanga ebi bahulabbira
era oŋambenga ebiragiro, mu moni eyo oja huba mugesi.
21 Omuutu aba nʼetegeha nyingi mu mwoyo gugwe
aye Musengwa njʼasalaŋo.
22 Ehyere cehi muutu ahira ohwenda
era omala gaba mugadi ohutabaaye mudulingi.
23 Ohutya Musengwa hihuwangaasa
era hihuleetera obuhuumi nʼohuŋona ebigosi.
24 Omudoto aŋira engalo mu bbakuli ohubugula emere
aye yimuhaya ohuta mu hanwa!
25 Hangavula omuutu omunyoomi, omubuyabuya gahega,
omugesi geega banamuhangavula.
26 Abisya semwana bubi
oba abbinga nyina amuŋwere ŋa wuwe,
aswasa era hyʼembiho.
27 Mwana wase, onalehera ohuŋuliirisa ebibono ebi kulaabbira,
oja hwibirira nʼebi omanyire.
28 Omuutu aŋa obujulizi owʼobudulingi,
ahihola olwʼohwenda ohulumya oyu aŋosya ni naye.
Era abahosi bʼebibi benda ebiitu hyʼebyo.
29 Omunyoomi ali nʼohuhimanya ati baja humuvunaana
era omuŋubeebe baja humufaduula efaalu.