20
1 Sihiraŋi ohumeera olwohuba hyabuŋubeebe eyi oli
era ohumeera huhuleetera ohusoola.
2 Habaha analuŋa abuluguma hyʼempologoma
olwʼehyo oyo amuleetera obusungu aba geyita omwene.
3 Ohweŋala ohusoola hihuŋeesa eŋono
aye hiisi muŋubeebe ganguŋirisa ohuduhana.
4 Omudoto sategeha hisambu mu hiseera
olwʼehyo mu hiseera ehyʼohuhungula ahenamo emoni ni ŋaŋuma ehi abonaho.
5 Ebigendererwa byʼomuutu mu mwoyo biri hyʼobuliba wʼamaaji
aye omuutu ali nʼohutegeera abisengeeja.
6 Abaatu bangi beeranga ohuba bʼamazima
aye sihyangu ohusuna omuutu omwesigwa.
7 Abahola ebiruŋamu obulamu waawe sibubaho mbalo,
era abaana baawe balisuna ekabi.
8 Habaha ni gehala hu tebe yiye eyʼobuŋugi ohusala emisango,
atambisa emoni jije ohusengeeja ehiraŋi nʼehibi.
9 Njʼani asobola ohuloma ati,
“Ese omwoyo gwange mugwalaafu
era puma hibi hyosihyosi mu bulamu wange?”
10 Musengwa acaawa abatambisa emizaani nʼebipimo ebicaamu.
11 Nʼomwana omuŋere omumanyira hu bikolwa bibye,
wamanya oba enebisya yiye ndaŋi era tuufu.
12 Amatwi ohuŋulira nʼemoni ohubona,
Musengwa njʼowawumba byombi.
13 Onenda ohuŋenyuha bugali obugadi buja huhuŋamba
aye onahalabana osuna emere mu bungi.
14 Agula apatana nʼajerega ati, “Ebbeeyi yaŋamugulu, ebbeeyi yaŋamugulu.”
Aye oluhena ohugula, atiina ni gebuuja ngʼolu adondooye.
15 Ezaabbu nʼamabaale agʼomuŋendo biri mu biha bingi
aye omuutu aloma ebyʼamagesi hyamuŋendo ehitaboneha aŋa ni naaŋa.
16 Owetaŋo ohweyimirira omuutu oyu atamanyire olwʼebbanja,
asaana ohutaaŋo omusingo ohuhahasa ati anahasasule.
17 Emere eyʼowiibi eŋoma
aye oheneresa nʼehutulira mu suulu.
18 Etegeha yolerera singa oŋamba amagesi agabahuŋa
era otatiina mu lutalo nʼoŋuma abaŋi bʼamagesi.
19 Owʼolugambo sabiiha hyama
olwʼehyo weŋale abaatu abali nʼeminwa ejitagwaho soŋera.
20 Singa omuutu aduha semwana oba nyina
obulamu wuwe buheneresa ni buli hyʼetaala esimiiye mu hiirema ehiŋambire ti ngu.
21 Obuŋinda owamangumangu ni huhiiri baŋere
sibubamo kabi hu komerero.
22 Solomanga oti, “Nja huhwesasusa olwʼehibukolire.”
Aye wesiganga Musengwa aja huhununula.
23 Musengwa acaawa abaatu abatambisa ebipimo nʼemizaani ebitali bituufu.
24 Musengwa njʼategeha amagendere gʼomuutu.
Olwʼehyo ŋaŋumaaŋo asobola ohutegeera ebitiina mu moni.
25 Otanguŋirisanga husuubisa Hatonda ehiitu nʼohiiri hweŋeegamo,
olwohuba hisobola ohuhuŋweramo ohwehebulisa.
26 Habaha omugesi asengeja abahosi bʼebibi
era ababoneresa aŋaŋuma husaasira.
27 Enjase ya Musengwa emuliha mu mwoyo gwʼomuutu
yaata ŋalafu hiisi higendererwa ehi bahweha.
28 Habaha aja hweyongera nʼaŋuga
anaba nʼali mwesiga nʼatehubbira era ni genda abaatu babe.
29 Abavubuka benyumirisa olwʼamaani gaawe
aye efi njʼeŋono lyʼabasahulu.
30 Endabusi yigira hwalehaŋo esambo embi
era ehibbooko higira hwacuusamo enebisya.