21
1 Musengwa njʼaŋuga omwoyo gwa habaha
aguluŋamya ngʼolu aluŋamya amaaji mu lwabi gatiina eyi agendesa.
2 Ebi muutu ahola byosibyosi bimubonehera bulaŋi
aye Musengwa njʼahebera emyoyo.
3 Ohuhola ebiitu ebiruŋamu nʼohutehubbira
Musengwa ahisiima
ohuhira ohumuŋa eŋongo.
4 Ohulaga obuhambwe nʼohwepaahapaaha biŋuga abahosi bʼebibi era ehyo hibi.
5 Etegeha yʼomuutu owʼehyonji, yireeta ekulahulana
ngʼolu ohwanguŋirisa ebiitu huleeta obugadi.
6 Obuŋinda obu osuna mu budulingi
budumuuha hyʼomuuya era buhuŋira mu mutego gwʼohufa.
7 Obuhambwe obu bahosi bʼebibi bahola
bulibaŋiriramo nʼabeene olwohuba bagaana ohuhola ebiitu ebiruŋamu.
8 Abahosi bʼemisango bagendera mu magira amabi
aye abaluŋamu bahola ebisaana.
9 Omala gebanda ŋamugulu hu hasolya hʼenyumba ohutabaaye
mu nju ndala nʼomuhasi aduhanirisa.
10 Omuhosi wʼebibi aŋemba hu huhola ebibi
era sasaasira muliranwawe.
11 Singa baboneresa omunyoomi
liba somo eyiri oyo omubuyabuya.
Era onalaabbira omuutu omutegeefu geyongera ohuba mugesi.
12 Hatonda oyo omutukuvu amanya ehi hiisi bahosi bʼebibi bahola mu mago gaawe
era aja hubasihiirisa.
13 Singa omugadi gerira ne somudulumirire
weesi eŋuma ali hudulumirira ni wenda obuyeedi.
14 Singa omuutu ahuluŋira ne wamuŋa ehirabo mu ngiso,
himwisa obusungu.
15 Ohutehubbira husangaasa abagwalaafu
aye hireeta ohwehanga eyiri abahosi bʼebibi.
16 Omuutu aŋaba gaaŋwa hu hituufu,
amagombe gamulindiriiye.
17 Abo abenda ebyamasaŋalyo, baja hwafuŋala
era hiisi owenda ohunywa omwenge nʼohwejalabya, salifuuha muŋinda.
18 Abahosi bʼebibi bereetaho ohubonaabona ohu bendesa abagwalaafu,
ebi abatali besigwa baleetera abahola ebiruŋamu.
19 Omala gamenya mu lulafu,
ohuhira ohumenya nʼomuhasi aduhanirisa
era owʼobusungu.
20 Omuutu omugesi abunga obuŋinda
aye omuŋubeebe asalaania ebibye.
21 Fubangaho ohuba wʼehyere era omwesigwa, oja huwangaala
era abaatu baja huhubisya bulaŋi era bahuŋe nʼeŋono.
22 Omuutu omugesi alumba ehibuga ehyʼabanamaani
gabbwagaŋo ebyo ebi besiga.
23 Oyo atelombooja atyo atyo geŋonia ebigosi.
24 Omuutu owepaahapaaha era aduula abahye
bamulanga “Omunyoomi,”
ahola ebi ahola nʼaŋeega ati njʼahihenaho.
25 Omudoto geyita omwene
olwohuba aŋuuna hulera ngalo.
26 Era asiiba mu hululuhanira biitu
aye abo abagwalaafu bagaba nʼomwoyo mulala.
27 Eŋongo yʼabahosi bʼebibi lyenyinyasa,
ohusingira erala analiŋayo nʼehigendererwa ehibi.
28 Omuutu aŋa obujulizi owʼobudulingi aja husihiiriha
aye omwesigwa ebi aloma babiŋuliirisa.
29 Abahosi bʼebibi bekaza
aye abagwalaafu nibo baŋeega hubi bahola.
30 Ŋaŋuma magesi wayire tegeera oba etegeha yosiyosi
eyisobola ohuhayisa Musengwa.
31 Bategeha embalaasi ohuja mu lutalo
aye ohuŋangula huŋwa eyiri Musengwa.