22
1 Ohuholerera esiina eraŋi hyesiimisa hihira ohuba nʼobuŋinda obungi.
Abaatu ohuhuŋa eŋono hiraŋi, hihira ohuba nʼezaabbu oba efeeza.
2 Ehigaata omuŋinda nʼomugadi cʼehino ti:
bombi Musengwa njʼowabatonda.
3 Omuutu omutegeefu, abona ebigosi ni biija, gabyebaaya
aye omuŋubeebe atiina hutiina gabigwamo.
4 Ohweŋomeha nʼohutya Musengwa
bigima wasuna obuŋinda nʼabaatu ohuhuŋa eŋono nʼohuwangaala hu hyalo.
5 Nʼoba ni wenda obulamu wuwo, weŋalenga ohugendera mu magira gʼabahosi bʼebibi.
Ehyo hija huhuyeeda ohutagwa mu mitego.
6 Tendehanga omwana nʼahiiri muŋere ngʼolu ali nʼohwebisya
nʼaja huhula, saaja huŋwa hu ebi wamusomesa.
7 Omuŋinda aŋuga omugadi
era oweŋola afuuha mwidu wʼaba nʼamuŋolire.
8 Oyo amwa obucaayi aligesa ebigosi
era ohunyigirisa ohwanyigirisa abahye huja huhoma.
9 Omuutu ali nʼomwoyo omugabi Hatonda aja humuŋa ekabi
olwohuba aŋaho abagadi emere.
10 Webbingeho omuutu omunyoomi,
oliba wetusaho etalo nʼohuduhana nʼohuŋahana.
11 Oyo owenda ohuba mugwalaafu mu mwoyo gugwe
nʼohuba nʼendoma endaŋi,
aja huba meeri ya habaha.
12 Musengwa alabirira abo abamutegeera
aye afafagania etegeha jʼabadulingi.
13 Omudoto aloma ati,
“Epologoma yiri ebulafu,
sinja hutula yiŋangire ohunjita.”
Oba ati, “Sinatiine hutamba
olwohuba abatemu bali mu nabiŋwera.”
14 Ebibono byʼomuhasi omuhwedi biri hyʼomutego
era biŋambya oyo oyu Musengwa galuŋira.
15 Abaana bosibosi balimo obuŋubeebe
aye nʼobaŋamo endabusi batereera.
16 Oyo anyigirisa abagadi olwʼohwenda ohugagaŋala
ko ni nooyo aŋa abaŋinda ebirabo
bombi baja huheneresa ni bali bagadi.
Ebibono ebya bagesi
17 Ŋuliirisa ebibono ebya bagesi,
taayo omwoyo hu bikusomesa.
18 Hija huhuleetera esangaalo,
singa obihebulira era wabiŋayangaho.
19 Wesige Musengwa
cʼehigira mbihusomesa olwa leero.
20 Kuŋandihiiye ebiitu adatu
ebibono ebyʼamagesi nʼohumanya,
21 era bija huhusomesa ohumanya amazima
wagamye obuhwenda obutuufu eyiri abo aba hutuma.
22 Sonyigirisanga bagadi olwohuba bagadi
era nomu mbuga, sonyigirisa muutu ali mu wetaavu,
23 olwohuba Musengwa aja hubasoolerera
era aja hulumba abo ababanyigirisa.
24 Soholanga muhumba nʼomuutu owʼobusungu
era otemanyirisa omuutu atalwa huluŋa,
25 olwohuba oŋangire ohwega esambo jije
hyahubeera mutego nandi osobola hweŋunula.
26 Siweyamanga husasula ebbanja lyʼomuutu obundi.
Era sotangayo ehiitu hihyo ngʼomusingo olwʼebbanja lirye.
27 Ebbeesa ni jirihuhaya ohusasula
baja huŋira obuliri buwo.
28 Socuusacuusanga biroowa ebi basaaye babo baahoma.
29 Omutambi ahola emirimo jije bulaŋi
aja huŋeeresa mu mago ga habaha, sosi huba mwidu.