23
1 Ni wiihalanga hu hiiŋulo nʼomuŋugi ohulya,
wegenderesanga ohuhuuma episa.
2 Nʼoba nʼolya bugali,
hulwo gesyaho ohwepima emere.
3 Soluluhaniranga mere eyi ahwiŋuuye, habibe binoli biitye
olwohuba aŋangire ohuba nʼahupima ohumanya esambo yiyo.
4 Siwehenererangamo olwʼohwenda ohusuna obuŋinda
onagesyaho wabona oti bigeene, baamo amagesi obirehe.
5 Obuŋinda buŋangire ohuhuŋwaho hyʼohubbalya hwʼemoni,
bumera amabaŋa wagululuha hya haŋungu watiina.
6 Solyanga mere yʼomuutu owenge
otegombanga binoli bibye wayire biba biraŋi biitye
7 olwohuba njʼomuutu mula mu mwoyo gugwe
aŋeega hu bbeesa ejitiinire hu mere eyo.
Aŋangire ohuhuloma ati, “Lya era onywe,”
aye ni geromesa hu mugulu.
8 Oja husesema ebi oliiye,
ohusiima huhwo huhufe wereere.
9 Sohenanga biseera mbo oŋa omuŋubeebe amagesi
olwohuba aja hutala hutala ehi omulomera.
10 Socuusanga hiroowa ehi bahoma ahalehale
oba ohwingiriranga omuŋuluko gwʼabafuubbi,
11 olwohuba Omununuzi waawe wʼamaani
aja hweŋambiramo mu songa jaawe ohuŋosya.
12 Taayo omwoyo hu bibahusomesa
era oŋulirisenga ebibono ebyʼamagesi.
13 Solehanga huhangavula mwana
olwohuba saaja hufa olwʼohumuŋamo endabusi.
14 Muŋeemo endabusi, oŋonie obulamu wuwe.
15 Mwana wase singa oba mugesi mu mwoyo gugwo, hija husangaasa.
16 Nja husangaala ni pulira nʼoloma ebibono ebyʼamagesi.
17 Esaalwa sehuŋambanga olwʼababbengi
aye genderanga mu hutya Musengwa hiisi hiseera.
18 Mu butuufu, onaholenga otyo
oli nʼesuubi mu moni eyo
era ŋaŋuma ehija huhutigatigania.
19 Mwana wase tegere ohutwi wahaba mugesi
era webisyenga bulaŋi mu mwoyo.
20 Soholanga muhumba ni naabo abanywa omwenge babitiirisa
oba abʼomulyerye,
21 olwohuba abameesi nʼabomulyerye bafuuha bagadi
era ohusiiba mwiro hibaleetera ohwambala ebireebo.
22 Ŋulirisanga lataawo owahusaaye
era sotalanga maawo nʼasahuluŋire.
23 Ofubangaho wagula amazima era sogatundanga
suna amagesi nʼesambo ko nʼobutegeefu.
24 Semwana yʼomugwalaafu aba musangaafu bugali
era oyo ali nʼomwana omugesi amwesiimisa.
25 Leha lataawo ni maawo basaŋalye,
leha omuhasi owahusaala asangaale.
26 Mwana wase, taayo omwoyo hu ebi kuloma
era pire ngʼehyohuboneraho eyi oli.
27 Abahasi abamalaaya nʼabahwedi bali hyʼeroŋo ereeŋi.
28 Hyʼabakondo, abahasi abo beteega abasinde bangi,
babaleetera ohwonoonoha.
29 Njʼani ali nʼebigosi hiisi hiseera?
Nʼjani asiiba mu huŋahana nʼohusoola?
Njʼani asiiba ni gemulugunya?
Njʼani ali nʼebinubulire?
Njʼani ali nʼemoni etwahaali?
30 Njʼoyo ahenera ebiseera mu hunywa omwenge
era atabula ebiha byʼomwenge.
31 Otahejanga hu mwenge huhusendasenda
ni gutumbeera efulo mu giraasi,
nʼogunywa guŋoomerera.
32 Oluvanyuma gumufuuhira hyʼobusagwa wʼefulugundu.
33 Emoni jijo jija hutandiha ohubona biroliroli
era sooja huŋeega nʼohuloma ebirimo amahulu.
34 Oja huba hyʼomuutu agendera hu maaji,
epunga ni muhubba yaŋira eyi ni neeyi hu nyanja.
35 Oja huloma oti, “Bakubba aye sibaakosa.
Bakubba aye sineŋulisamo.
Era nenyohe ŋaali nendule omwenge ogundi?”