24
1 Soŋambiranga bahosi bʼebibi esaalwa
era soŋembanga huhuhola muhumba ni nabo
2 olwohuba mu myoyo jaawe bategeha hukosa bahyawe
era ebi baloma bitabula bahyawe.
3 Amagesi njʼomusingi gwʼamago
era obutegeefu wugemeresaŋo.
4 Era ohuba nʼohumanya hireetera
ebisenge byʼenyumba eyo ohwijula ebiitu ebitaboneha aŋa naaŋa era ebyomuŋendo.
5 Omuutu omugesi wʼamaani mangi
era ali nʼohumanya geyongera ohuba nʼamaani,
6 olwohuba ko otandihe olutalo
wetaaga ohusuna amagesi
ohuŋwa eyiri abaatu bangi.
7 Abaŋubeebe sibategeera endoma eyʼamagesi
era bahaya ebyʼohuloma ni baba ni bateesa hu biitu ebyʼomugaso.
8 Oyo abererera mu huyiiya ohuhola ebibi,
baja humumanyira hu tegeha yiye.
9 Hiisi ehi muŋubeebe aŋeegaho ohuhola hiba hibi
era abaatu bacaawa omuutu anyooma abahye.
10 Singa oba munafu mu biseera ebigosi,
oba oli nʼamaani matono!
11 Onunulanga abo aba baba ni baŋira ohwita
ni ŋaŋuma ehi baholire.
12 Singa oloma oti, “Sihwahimanyaho kadi,”
Hatonda ategeera ehiri mu myoyo jʼabaatu, ahubona.
Era oyo ahuhuuma, amanyire ati wamanya
era aja husasula hiisi muutu ni geema hu bikolwa bibye.
13 Mwana wase, nywanga omudugere olwohuba mulaŋi.
Omudugere ogwomu biyali guhuŋomera.
14 Mu ngeri njʼenyene oli nʼohuhimanya oti amagesi malaŋi eyiri obulamu wuwo.
Singa ogasuna, obulamu wuwo owomu moni buliba bulaŋi.
Era ŋaŋuma alityaka mu suubi liryo.
15 Otabanga hyʼabahosi bʼebibi
abeteega abagwalaafu ohubanyagulula
babatuseho nʼamago gaawe,
16 olwohuba wayire omugwalaafu gehubbiraŋo emirundi musanvu aja hwinyoha nindi.
Aye abahosi bʼebibi baja huŋweraŋo erala.
17 Sosangaalanga omulabe wuwo nʼasunire ebigosi
oba ohusaŋalya mu mwoyo ko nʼatagala nʼebigosi,
18 olwohuba Musengwa
nʼalihibona atyo aja huleheraŋo ohumuboneresa.
19 Oteralihiriranga olwʼabahosi bʼebibi
era sobaŋambiranga saalwa,
20 olwohuba abahosi bʼebibi
baŋuma hiraŋi mu moni eyo ehi basuubiriramo
era etaala yʼabahosi bʼebibi yija husima.
21 Mwana wase tyanga Musengwa ni habaha
era soholanga muhumba nʼabajeemu,
22 olwohuba balisuna ebigosi
era ŋaŋuma amanyire ebigosi ebi balisuna ohuŋwa eyiri Musengwa oba habaha.
Ebibono ebindi ebya bagesi
23 Bino byosi bibono ebya bagesi:
Sihiraŋi ohwehubbira nʼosala emisango.
24 Hiisi aloma asaaye omusango ati, “Wejereeye,”
abaatu mu mawanga gosigosi baja humucaawa.
25 Aye abo ababoneresa asaaye omusango,
baja husuna ekabi era baja huba bulaŋi.
26 Ohugobolamo nʼotehubbira hiraŋi,
habonero ahalaga haati oli wʼomuhago omutuufu.
27 Hena ohutegeha endimiro jijo bulaŋi
ko otandiihe ohutongola enyumba.
28 Sooŋanga bujulizi owʼobudulingi hu wahyo
oba ohuloma ebyakalebule.
29 Solomanga oti, “Keesi nja humuhola ngʼolu gaakola,
oyo nja humwesasusa.”
30 Nabita hu ndimiro eyʼomuutu omudoto,
endimiro eyʼemizabbibbu eyʼomuutu aŋuma magesi.
31 Amaŋwa gaali gamerire hiisi ŋaatu nʼenyaasi ni lyejuuye endimiro yosiyosi
era nʼolukomera olu batongolesa amabaale ni lwagwa ŋaasi.
32 Ni nabona ngʼolu endimiro yifaana
hyapa ehyohwega ti hulomanga ti,
33 “Leha punguleho ahalo ŋatotono,
pongereho ŋatotono, pumuleho ŋatotono,”
34 aye obugadi wuja huhugwira hyʼomwibi,
obugadi bulihulumba hyʼomutemu.