27
1 Otewuujanga hu ebi onahahole obuhyeye
olwohuba somanyire ebinahabeeŋo.
2 Olehanga abaatu abandi bahutenda
sosi ewe omwene ohwepaaha.
3 Ebaale nʼomujehe, byombi bisitoŋa
aye sibyola hu bigosi ebi muŋubeebe aleeta.
4 Obusungu wubi era ehiruŋi hiri oti mataba
aye esaalwa esingisaho owubi.
5 Bamala gahuhayula mu lwatu
ohuhira ohuhwenda mu ngiso.
6 Meeriwo nʼahwoloobya aba ahwendesa ohulya
aye omulabe wuwo anahugwa mu hifuba aba ahudulinga.
7 Omuutu anaba ni gegutire, sigenda nʼohuhomba hu mudugere
aye ehyohulya wayire hiba hirulu hiitye, hiŋomera oyu enjala yiruma.
8 Enyuni eyibbama yalehaŋo ehiswi hyayo
yiri hyʼomuutu alehaŋo amago gage.
9 Amafuta agahaloosa ko nʼobubbaani
obuŋunya obulaŋi busangaasa omwoyo.
Era nʼohulabula ohuŋwa ewa meriiwo
huba hulaga huuti ahuliho.
10 Sodanyiriranga meriiwo oba meeri ya lataawo.
Era sotiinanga ewa mugandawo ohumusunga obuyeedi nʼoli mu bigosi.
Muliranwawo ohuli ohuupi ahusingira mugandawo ahuli aŋale.
11 Ba mugesi mwana wange, ehyo hija husangaasa omwoyo gwange
era hija hupeererera amaani ohugobolamo abo abanyooma.
12 Omuutu omutegeefu abona ebigosi ni biija gabyebaaya
aye omuŋubeebe atiina hutiina gabigwamo.
13 Omuutu oweyimirira oyu atamanyire olwʼebbanja,
asaana ohutaŋo omusingo.
14 Ohuhayuha nʼoheesa owahyo mu mugamba pwipwipwi,
oba hyʼomuhubba ehisiraani.
15 Omuhasi aduhanirisa
ali hyʼefula eyitonya ni tahya,
16 era omuhasi hyʼoyo higosi ohumulobera
ngʼolu hiri higosi ohutigalira embeŋo ohufuuŋa
oba ngʼolu hiri higosi ohudederera amafuta mu hyaba.
17 Ngʼolu ehyoma hiŋagala ehyoma hyahye
omuutu yeesi atyo ko agunjula omuutu wahye.
18 Oyo alabirira omusaala omutiini
aja hulya hu bibala byagwo,
ni nooyo aŋeeresa musengwawe
baja humuŋanga eŋono.
19 Ngʼolu omuutu gebona mu maaji
nʼomwoyo gwʼomuutu gwosi gulaga ehyo ehi ali.
20 Emagombe nʼohusihiiriha sibijula,
hiri hyʼabaatu ngʼolu baŋemba hu husuna ebiitu.
21 Ezaabbu nʼefeeza babita mu muliro ohutusamo obucaafu
nʼomuutu yeesi bamubona ngʼolu gebisyamo abaatu ni bamupaaha.
22 Wayire oŋuula omuŋubeebe mu hinu,
sooja humutusamo buŋubeebe wuwe.
23 Fubangaho ohulabirira ebyayo bibyo
era oteyo omwoyo ohulabiriranga etaama nʼembusi jijo.
24 Hiri hiityo olwohuba obuŋinda sibubaŋo emirembe nʼemirembe
era nʼengule yʼobuŋugi siyaluberera.
25 Oluvanyuma lwʼohusala enyaasi ohuliisa ebyayo, enyaasi erindi enyaaha limera
era enyaasi eryohu lusozi balisala balibunga mu sitoowa,
26 oja husuna ehyohwambala ohuŋwa mu mooya gʼetaama
era watunda embusi wagulamo eroba.
27 Embusi jinahuŋenga amabeere mangi
ewe nʼabomu mago gago
ko nʼabaŋeeresa babo abahasi, mwanywa.