28
1 Omuhosi wʼebibi aduluma ni ŋaŋuma nʼamubbinga
aye abagwalaafu baba basira hyʼepologoma.
2 Egwanga omuba etalo ejitaŋwesa liba nʼabaŋugi bangi
aye omuŋugi omugesi era omutegeefu agima egwanga lyatereera.
3 Omuŋugi anyigirisa abagadi
ali hyʼefula erimo hibuyaga
esihiirisa emere yosiyosi.
4 Abo abalehaŋo amagambi, batenderesa abahosi bʼebibi
aye abo abagaŋamba babaŋahania.
5 Abaatu abahosi bʼebibi sibategeera
ehi hutehubbira hitegeesa
aye abajumirya Musengwa
bahitegeera bugali weene.
6 Omala gaba mugadi nʼoli mwesigwa
ohusinga ohuba omuŋinda omukupanya.
7 Omwana agondera amagambi aba mugesi
aye ahola omuhumba nʼabaatu abaŋuma mahulu aswasa semwana.
8 Onasuna obuŋinda olwohutoosa abaatu amagoba mangi
obuŋinda wuwo bulitiina eyiri oyo aja huba wʼehisa eyiri abaatu abagadi.
9 Omuutu yesiyesi atagondera magambi,
nʼesaala yiye yiba yambiho mu moni ja Hatonda.
10 Oyo aleetera omuutu omugwalaafu ohwonoona,
aja hugwa mu mutego gugwe omwene
aye abo abaŋumaho mbalo balisuna ebiraŋi.
11 Omuŋinda aŋangire ohuba mugesi ngʼolu mwene gebona
aye omugadi ali nʼohutegeera amanyire ohumuhira.
12 Omugwalaafu anafuuha muŋugi abaatu basaŋalya
aye omuhosi wʼebibi anaba njʼomuŋugi abaatu baba mu hwehweha.
13 Oyo awiiha hu bibi bibye saaja huhulahulana
aye hiisi abyatula gebbwaga bamusoniŋa.
14 Gesiimire omuutu atya Musengwa hiisi hiseera
aye oyo ahahanyasa omwoyo gugwe aja hugwa mu bigosi.
15 Omuŋugi abisya wubi abagadi
ali hyʼempologoma eŋunduguma
oba hya nalaŋa owendula ehyohulya.
16 Omuŋugi atategeera anyigirisa abaatu
aye oyo acaawa enguzi aja huwangaala.
17 Omuutu omutemu geyabira omwene amagombe
era omuutu hyʼoyo somubeeranga.
18 Oyo ahola ebiruŋamu ŋaŋuma hibi ehirimwolaho
aye oyo atahola ebituufu aja husihiiriha.
19 Omuutu ahola emirimo nʼamaani asuna emere nyingi
aye oyo ahenera ebiseera hu biitu ebitagasa aja hufuuha mugadi.
20 Omuutu omwesigwa alisuna ekabi
aye oyo owenda ohusuna obuŋinda owamangumangu, balimuboneresa.
21 Sihiraŋi ohuba omuutu owehubbira
aye abalamuzi bahola ebitasaana olwʼohubaŋamo ahaatu.
22 Omuutu owʼamayiru abuguutana ohusuna obuŋinda
aye samanyire ati obugadi bumuhuumiriiye.
23 Oyo agolola omuutu esobi jije
oluvanyuma balimusiima, ohuhiraho oyo aba mu humupaahapaaha.
24 Oyo aŋeega ati sihibi ohwiba semwana oba nyina
ali hyʼomutemu.
25 Omuutu aluluhanira ebiitu aleeta ohusoola
aye oyo owesiga Musengwa
aja huhulahulana.
26 Oyo owesiga amagesi gage muŋubeebe
aye oyo agendera mu hwenda ohumanya ahola hiraŋi.
27 Oyo agabiraho abagadi ŋaŋuma ehi anadambenga
aye oyo atenda huheja hu mugadi
aja husuna ebiŋwabo.
28 Omuhosi wʼebibi anafuuha muŋugi
abaatu baba mu hyehwehere
aye omuhosi wʼebibi anasihiiriha
abagwalaafu baŋira obuŋugi.