29
1 Omuutu asigala nʼahahanyala
oluvanyuma lwʼohumulabula efunda nyingi
aja husihiiriha ni ŋaŋuma huŋona.
2 Omugwalaafu anaba nʼaŋuga abaatu basangaala
aye abahosi bʼebibi banaba njʼabaŋuga, abaatu beŋunduguma.
3 Omwana owenda ohuba mugesi asangaasa semwana
aye ahola omuhumba nʼabamalaaya adubuuda buŋinda wuwe.
4 Habaha omwesigwa aleeta emiyaaya mu gwanga
aye oyo owenda enguzi aligwisa.
5 Omuutu ahiina owahye,
aba genda amudanye mu mutego.
6 Ebibi byʼomuhosi wʼebibi bija humufahira mu sobi jije enyene
aye omugwalaafu aja huyiŋona gembe nʼesangaalo.
7 Abagwalaafu bafaayo hu dembe lya bagadi
aye abahosi bʼebibi sibafayo.
8 Abaatu abatalumirwa bahyawe bagwisa ehibuga mu bigosi
aye abo abategeefu behahania ehiruŋi.
9 Singa omuutu omutegeefu aŋira omuŋubeebe mu mbuga,
omuŋubeebe aja huloma nʼobusungu nʼohuduhana era siŋaja hubaŋo miyaaya.
10 Abatemu sibenderaho erala abaatu abalaŋi
aye bendula ngeri yʼohubahenaŋo.
11 Omuŋubeebe alaga obusungu wuwe mu lwatu
aye oyo omugesi afuga owongo wuwe.
12 Singa omuŋugi aŋuliirisa ebyʼobudulingi
abatangirisi babe bosibosi bafuuha bahosi bʼebibi.
13 Ehigaata omugadi ni nooyo amunyigirisa hiri ti
bombi Musengwa njʼowabaŋa emoni ohubona.
14 Habaha nʼanasalenga emisango jʼabagadi nʼatehubbira
anawangalirenga mu buŋugi.
15 Hiraŋi ohuŋaamo omwana endabusi geega
aye onamuleha ohweholera ehi genda aja huswasa nyina.
16 Abahosi bʼebibi ni baba mu buŋangi nʼehibi hyosi hyeyongera obungi
aye abagwalaafu baja hubaaŋo bebonere ohugwa hwawe.
17 Omwana wuwo muŋeemo endabusi, ŋaja hubaaŋo emiyaaya onahola otyo
era aja huhuleetera ohwesiima.
18 Hatonda nʼatatangiriiye baatu, sibaabulaŋo hiraŋi nʼehibi
aye gesiimire oyo agondera amagambi ga Hatonda.
19 Ebibono byoŋene sibisobola huhangavula mwidu wayire aŋangire ohuhutegeera
aye saaja huhola ehi wenda.
20 Omuŋubeebe ali nʼesuubi
ohusinga omuutu aloma nʼatasookire huŋeega hu ehi aja huloma.
21 Omwidu oyu obisya bulaŋi ohuŋwera erala mu buvubuka
ali hufuuhira higosi hu komerero.
22 Omuutu owʼobusungu owaŋaapi ŋaapi
aleeta obuduhani nʼebigosi bingi.
23 Omuutu owepaahapaaha bamwisa ŋaasi
aye oweŋomeha bamuŋa eŋono.
24 Ahola omuhumba nʼomwibi alyecaawa omwene
olwohuba ni baliba ni bamulayisa ohuloma mazima
saligaloma hyamuŋweramo Hatonda ohumuboneresa.
25 Ohutya omuutu obuutu hyabulabe bugali
aye Musengwa ahuuma oyo amwesiga.
26 Abaatu bangi abenda ohuba bahoda eyiri abatangirisi
aye Musengwa njʼatehubbira.
27 Omugwalaafu genyinyalya atali mwesigwa
nʼomuhosi wʼebibi acaawa ahola ebiruŋamu.